Ioane 5:12-37

¹²Isi se oimurilau ia arinai si ene, “Aitea tau i heribam i ene, ‘Em eba u abidi, u lau?’”

¹³Tau se hemauri wa tauhemaurina nige i nuatui: na Iesu i lausuarao, paana ede moutuadi nei eai.

¹⁴Abotai Iesu tau wa numa tabuna alona eai i lobai, to i ribalau ia arinai i ene, “Hage! oa se helolom wa: baaea tabu u abiuioi, ata ginauri baabaaea ariri se hearom.”

¹⁵Tau wa abo ie lau Iudea tataodi i heribadi, i ene, “Tauhemaurigu ede Iesu.”

¹⁶Arinai Iudea tataodi Iesu bena se heamamna, eo se eooi bena si unui, paana ede teina laulau ta Sabati eai i laulauei.

¹⁷Iesu i heribadi i ene, “Tamagu i paipaisoa, eau hinage ea paisoa ta.”

¹⁸Arinai Iudea tataodi se eoodaoi ia bena se unui, paana ede Sabati laugagaeona i utusi, eo paana hinage i ene Eaubada ia Tamana ede, doha hinage i ene ia eo Eaubada gonogonoadi.

¹⁹Arinai Iesu i ribalau aridi eai i ene, “Mamohoi, mamohoi, ea heribamiu ta, Natuna iabom taba nige saha abina i ata i ginauri, Tamana ana paisoa ie ita meta mo abina i ata: eo ginauri gamagaridi Tamana i ginauridi doha ede Natuna i ginauridi hinage.

²⁰Tamana, Natuna i gadosisiei, ginauri gamagaridi ia i ginauridi ia i heita: hinage ginauri se gigibori ariri abo ia i heita bena abo au nooedi.

²¹Doha Tamana tatao se mate i hetorouioidi eo i hemauridi, Natuna hinage headi i henua abo i hemauridi.

²²Tamana nige tau esau i hedudurai, hedudurai gamagaridi i moselaei Natuna arinai.

²³Bena tatao gamagaridi abo Natuna se heasisiei doha hinage Tamana se heasisiei. Esau Natuna nige i heasisiei, ia Tamana, tauhetamariamana nige i heasisiei hinage.

²⁴Mamohoi, mamohoi, ea heribamiu ta, egu riba tauataiena, eo ia tauhetamariguma hinage i sunusunumaei, mauri nige nosina i abiyao, eo ia taba nige se hemaisa, ia mate i diogabaei, ie lage mauri eai.

²⁵“Mamohoi, mamohoi, ea heribamiu ta, huiana i lagema, hinage i lagemao, taumatemate tataodi Eaubada Natuna arinana abo se ataiei; isi hinage tauataiena abo se mauri.

²⁶Doha ede Tamana ena mauri i abi ia boeana eai, i moseheawa Natuna arinai, hinage ia mauri i abi ia boeana eai;

²⁷ia hinage i hetoro ma gigiborina ia tauhedudurai, paana ia Tau Natumamohoina ede.

²⁸Ina ta tabu au nooei: huiana abo i lagema isi gamagaridi bousa eai arinana abo se ataiei.

²⁹Abo se lulagema; isi laulaulolo‐tauabina mauri torouiona eai abo se torouio; isi laulaubaaea‐tauabina baaea torouiona eai se torouio.

³⁰“Eaubom mo egu gigibori eai taba nige saha ea ginauri; taba riba ea ataiei ea hedudurai, egu hedudurai hinage i dudurai; paana eau nige egu gadosisi ea eooi, Tamana, Tauhetamariguma, ena gadosisi ea eooi.

³¹Taba eaubom ea ribahemasarahauioigu mo egu ribahemasarahana taba nige riba mamohoina.

³²Esau mo ia tauribahemasarahagu ede; ea nuatui ribana arinai i ribahemasarahagu riba mamohoina ede.

³³“Au lauhetamari wa Ioane arinai, riba mamohoina i ribahemasaraha.

³⁴Tatao edi riba nige ea nuatuidi; teina ginauri ea heribamiu ta aridi eai bena au mauri.

³⁵Ioane doha lamepa i alaalasi i balebalelem: omi huiana wa aue kode ia marana eai.

³⁶“Na esau i ribahemasarahagu ia Ioane i saetawatawai: paisoa Tamana i ledima arigu eai bena ea ginauriheohidi, paisoa wa ia ede ea ginaginauridi se ribahemasarahagu Tamana i hetamarigu ede.

³⁷“Tamana, tauhetamariguma, i ribahemasarahagu hinage. Nige huia esau ia arinana au ataiei, eo ana ao hinage nige au ita.