Ioane 3:2-15

²Maiona esau eai ie lau Iesu arinai, i ribalau, i ene, “Rabi e, ai itayao oa hetabu tauna Eaubada arinai u laoma: paana teina laulau gigiboridi u laulauedi wa, nige tau esau i ginauridi, Eaubada mo maena.”

³Iesu i ribalau ia arinai i ene, “Mamohoi, mamohoi, ea heribam ta, ena tau nige se labasiuioi, Eaubada ena basileia taba nige i ita.”

⁴Nikodemo ia i heriba i ene, “Taba tau edoha edi labalabasiuioina ena ia i tautaubadao? Ia abo i luuio sinana bogana eai, abo i labauioi?”

⁵Iesu i ribalau i ene, “Mamohoi, mamohoi, ea heribam ta, ena nige se laba goila eai, eo Earua arinai, taba nige i lusora Eaubada ena basileia eai.

⁶Ginauri buluma eai se labasi buluma ede; ginauri Earua eai se labasi earua ede.

⁷Tabu aruam i loi wau ea heribam wa ea ’ne, ‘Taba se labasiuioimiu.’

⁸Mana i toatoa gaibu, easasana u ataiei, ena aba laoma, eo ena aba lau nige u ita: tau esau, tau esau Earua eai se labasidi doha ede.”

⁹Nikodemo ie ribalau ia arinai i ene, “Teina ginauri ta edoha edi abiabidi?”

¹⁰Iesu ia i heriba i ene, “Oa Isaraela adi tanuaga esau ina ginauridi ta nige u nuatuidi wa?

¹¹Mamohoi, mamohoi, ea heribam ta, ginauri ai nuatuidio ia ede ai ribaedi ta, eo ginauri hinage ai itadio ai hemasarahadi: ema ribahemasaraha nige au ataiei.

¹²Taba tanoubu ribadi ea heribamiu nige au nuatuidi: abo edoha emi nuanuatuina taba galewa ribadi ea heribamiu?

¹³Nige tau esau i awasae galewa eai, iabom mo galewa eai i dobima, iaede Tau Natuna.

¹⁴Doha hinage Mose mota i ueisini barabara eai wa, doha ede Tau Natuna taba hinage se ueisini.

¹⁵Eai to eai ia se nuatui nige se mate, na mauri nige nosina abo se abi.