Iluk 11:11-40

¹¹Yom muluwel mali mak i auk kumel aliwol yulo bokoyemomeliw: ‘Takam mak duyemew kano, nu wanuma!’, angbiw tewe, yu ilo ambew eisneng mak duyemiw sako?

¹²Beemdiw, yom muluwel mali mak i ‘Awon win mak duyemew kano, nu wanuma!’, angbiw tewe, yu ilo yongmonom mak duyemiw sako? Itel bate!

¹³Auk kumel aliwol yu sili sili nam kebiliw kate, yom aul im ibolow keyembiliw eisneng be fein duyemkabiliw kasike, yukal kilele kal keemboliwka! Num abiil tikin katem alakabe Aatim be kalfongsomi, akalem Sunbin-Finik e mali dakalakabiliw kawtiw ilo fein duyemoke kasike.”, yangse kale.

¹⁴Deiw mak ding mak, bontem kasi kolewse aneng matil em dim alakabe kunum mak telei, Yesus e elo atemeko, aneng matil beelo takala kolewse kale. Takala kolewei, kunum be iti ki keko, weng bokose kasike, ka biliw kawtiw banban bi kanese be atemeko, yol angsiliw kale.

¹⁵Kate, mali kawtiw mak bokolomeliw: “E aneng matil im kak yetebe finik Belsebul em kitil ete kuw aneng matil takala koyem kebe kai!”, angsiliw kale.

¹⁶Angsiliw kate, mali kawtiw mak i elo kak kelewomin weng mak dakalalomeliw: “Ku kitil eisneng mak nulo kukuyemew kano, nu atin kuw kal keluwete: ‘Ku fein, Sunbin-Got em aluwbamin kunum kute kai!’, kangeko, atemokoluw te.”, dangsiliw kale.

¹⁷Dangiwi, Yesus e im ibolow fukuneko, dangiw weng beem mongom e kal kese kasike, e ilo yan weng bokoyemomele: “Kawtiw mongom makmak amen kuw amen kuw keko, ganbiw tewe, ikalem kunum mongom wiin be atin kuw banimoke te. Beemdiw, auk diw alew diw yangdel ikalem akate amen kuw amen kuw keko, ganbiw tewe, ikalem wiin makmak bakati atin kuw gel so banimoke te.

¹⁸Kaneko kasike, yu bokonemomeliw: ‘Ne Belsebul em kitil so kawtiw im dim biliw aneng matil ilo takala koyemkabi te!’, nangbiliw tewe, Seten-Ataanim em angin ikati mongom amen kuw amen kuw keko, ganbiw kasike, im kitil ikati banim te.

¹⁹Kate yu kilele ibolow fukunina! Nakalem ete Belsebul em kitil kaneli tewe, yom angin isik kanem wiin so kitil so aneng matil ilo takala koyem kekabiliw a? Yu kilelbi boliwka! Kanekabiliw kunum bikati yulo diweko, geeyembokoliw kasike!

²⁰Kate, nakalem ete Sunbin-Got em teing kang em kitil so aneng matil biilo takala koyem kebi tewe, yu beem dulum elote kilele kal keliwete: Fein! Sunbin-Got em gawman ding dim e, kame bakalete.

²¹Kame yu fakam weng kale kililina! Seten-Ataanim e akalem abisom dim kel on balam so mobe kunum emdiw kebe te. E akalem on balam beem dulum elote fukunomele: ‘Mali kawtiw i ki keko, on balam beem kitil be nam de mit daliw te!’, angeko, fukunkabe te. Kasike, mali kawtiw i ki keko, teleko, akalem mesesem mesesem eisneng be nam kulamiw te. Kate nakalem ete, mali kunum atul nam kunum mak emdiw kesomi, teleko, on balam kitil nam so kunum beelo aneko, em on balam eisneng be alik alik kulusomi, nanew kawtiw ilo amen amen kuw duyemkabi kunum nete te.

²³Yu kilele kililina! Nelo dokoneminba kebiliw kawtiw i nelo maka kenemkabiliw te. Beemdiw, neso makuw mali kawtiw ilo nem mit mewso yamde telinba kebiliw kawtiw i mali kawtiw ilo yenbakalakabiliw te.

²⁴Yu kililina! Aneng matil mak kunum em dim teinbe kunum beelo kolewe tewe, e finengdalomin tiow dim aneng mak fenem unoke te. Uneko, fenem kakabiko, finengdamin aneng mak ateminba kele tewe, e bokolomele: ‘Ne iti kolew telesi am elo uno yo!’, angeko,

²⁵kolew tele am elo iti unoke te. Uneko, atemete: ‘Am be kukun kilelsomi, kait kelewsiliw kai!’, angeko, atemoke te.

²⁶Atemeko, iti uneko, aneng matil atin kuw wa wa ben kel mali ilo yemde teleko, i sua kel beem dim teinse kunum beem ibolow tem be iti atin kuw wa wa kuw kelewokoliw te.”, yangse kale.

²⁷Yangesomelei, ka biliw kawtiw im mutuk e, mak waneng mak gaaneko, Yesus elo bokolewomelu: “Waneng kom dukuko, non kamensu waneng ute kalfongeko, kakat fian mak kemuka!”, dangsu

²⁸kate, Yesus e yan weng mak bokolomele: “Sunbin-Got em weng kiliko, gelewkabiliw kawtiw ite kuw kalfong fian keko, kakatemoliwka!”, angse kale.

²⁹Kawtiw mali mak so teleko, Yesus em mit mewso wensansiliw ding dim bakate, e ilo weng mak bokoyemomele: “Kame biliw kawtiw yu ibolow wa nam te. Yu kitil keko, auk so kitil so eisneng atemomin gaanem teliw kate, ne yulo auk so kitil so eisneng gel mak nam kukuyemi te. Sunbin-Got em sua kel akate akalem bontem dim bakamin kunum Yona elo kukulewse auk so kitil so eisneng bakate kuw yukati iti atemokoliw te.

³⁰Sua e, Sunbin-Got e Yona beelo Ninibe abiw mutuk fian em kasel im kiin dim e auk so kitil so eisneng atew kelewse kale. Beemdiw kame, Sunbin-Got e Kawtiw Aul nelo kawtiw yom kiin dim e auk so kitil so eisneng atew kenemei, yu netemokoliw te.

³¹Yu kilele ibolow fukunina! Sua kel akate, Seba aneng fian em emisik kamok fian kebu waneng u ukalem singam aneng be kolewko, Isalael kawtiw num sua kel alenale emisik kamok fian Solomon em kal fian beelo atebam talsu kale. Talsu kasike, waneng bu ka biliw kawtiw yulo fein geeyemoku te. Nimtew angom? Nakalem ete Solomon elo bakilewkabi kunum nete kate, yu nelo ‘Fein!’, nanginba kebiliw kasike.

³²Sunbin-Got em kawtiw alik alik ilo diwyemeko, geeyemoke ding dim kabalak e, Ninibe abiw mutuk fian kasel i ka biliw kawtiw yulo geeyemokoliw te. Nimtew angom? Ite Sunbin-Got em bontem dim bakamin kunum Yona em yangse weng be kiliko, ‘Fein!’, dangeko, im ibolow sili sili nam be kolewsiliw kasike. Kolewsiliw kate, nakalem ete Yona elo bakalewkabi kate, yu nelo ‘Fein!’, nanginba kebiliw te.”, yangse kale.

³³Yangeko, iti weng mak bokoyemomele: “Yu yongom dong mak aileko, mesesem eisneng so kasi kolewkabiliw sako? Babo! Abisom dim kel ail kolewbeliw kano, mali kawtiw i yongom dong be atemeko, am kawtem telemoliwka!

³⁴Num mutuk kayak em kiin e yongom dong atew aileko, be tewe, kal so dem so alik alik akati ken kuw keko, boke te. Kate, num mutuk kayak em kiin e ailinba keko, mililiw ange tewe, kal so dem so alik alik bakati miliw mutuk keko, wa keboke te.

³⁵Kasike yu kilelbi boliwka! Mesik esik yom mutuk dim alakabe ailbin be mesesem eisneng wa so kasi kolewbiliw kasike. Kolew keliw tewe, yu atin kuw mililiw mutuk atew kakabokoliw te.

³⁶Kasike, yom mutuk kayak e atin kuw aileko, mililiw atuk gel mak banim kebe tewe, ailbin fian be yongom dong atew yom kal so dem so alik alik be kilele ailoke te.”, yangse kale.

³⁷Yangei, Falisi kunum mak teleko, Yesus elo em am elo wanomin debele unse kale.

³⁸Unse ding dim bakate, Yesus e Suda kawtiw im kukuw gelewinba kesomi, teing o, yan o, ginginba keko, sak teineko, wanin wanse kale. Kanelei, Falisi kunum be ibolow fukunin tiaktiak keko, yol angese kale.

³⁹Angei, Kamok Fian e elo bokolewomele: “Falisi kunum yutaka! Yu kal tikin kais atite kebe ok sen emdiw kebiliw kate, yom mutuk kawyak e yu ninik so ibolow sili sili nam so gekbiliw kunum kebiliw te.

⁴⁰Ibolow teifuluko, biliw kawtiw yutaka! Sunbin-Got e yom kal tikin akal, yom mutuk tem akal, alew be makuw dukuse kasike.