Lukaj 11:11-40

¹¹De ij jam amen nan pun omail, ma na putak pan poeki na kijin prot, pan ki on i takai eu? De ma a poeki mam, pan ki on i jerpent amen?

¹²De ma a pan poeki kitor eu, pan ki on i jkorpion amen?

¹³Ma komail, me jon jued, aja duen kijakij mau on noumail jeri kan, nan melel kaualap. Jam omail nanlan pan ki on Nen jaraui ren me poeki re a.

¹⁴A ap kotin kauje wei tewil amen, me loton. A kadekadeo tewil lao koiei janer, me loton o ap lokelokaia, a aramaj puriamuiki.

¹⁵A akai ir katitiki: Nan Peeljepup, jaumaj en tewil akan, me a kaujeki jan tewil akan.

¹⁶A akai kajonejon i, poekipoeki kilel eu jan nanlan.

¹⁷A ap kotin ani ar lamelam, majani on irail: Wei karoj ma a pan u pena nan pun a, a pan ola; o ma toun im eu pan u pena nan pun a, a jota pan pwaida.

¹⁸A iaduen, ma Jatan u on pein i, a wei pan kak pwaida? Aki komail indinda me dene nai kauje wei tewil akan ki Peeljepup.

¹⁹Ma I kin kaujeki wei Peeljepup tewil akan, a ij me noumail ol akan kin kauje kin irail? Irail ari pan omail jaunkapun.

²⁰A ma I kaujeki wei lim en Kot tewil akan, nan wein Kot lel on komail er.

²¹Ma me kelail o, me audeki kapwa en pei, pan jinjila im a, nan a kapwa nekinekid mau.

²²A ma amen, me kelail jan i, pan palian i o kaloedi i, ap pan atia jan a kapwa en pei, me a kelekier, o nek pajan kapwa en kul.

²³Meamen, me jota ian ia, iei me palian ia, o me jota kin dolun penan ia, iei me kin kajapoka pajan.

²⁴Nen jaut lao kowei jan ren aramaj, a kin tanatan jili nan jap tan akan, rapaki wajan kamol, a jota, me a diarada, i ap kin inda: I ap pan purelon on nan im ai, me i pedoi janer.

²⁵A lao puredo, a diar, me a kokok o kapwater,

²⁶I ari koieila, ale on i nen ijimen, me jued jan pein i. Irail ap pedelon on lole, rap kakaujon ia; a aramaj pan jued jan maj.

²⁷A kadekadeo ni a kotin mamajani mepukat, li amen, kijan pokon o, ap potoan on i: Meid pai kupur o, me wia ir adar, o didi kan, me re kotiki!

²⁸A i kotin majani: Ei, meid pai, me kin ron majan en Kot ap kapwaiada.

²⁹A pokon o lao teneten pena, a kotin majani: Di wet meid jued! Re kin rapaki kilel eu, a jota kilel pan janjal on ir, pwe kilel en Iona eta.

³⁰Pwe duen Iona kilel eu on men Niniwe, iduen Nain aramaj on di wet.

³¹Li nanmarki en pali air amen pan u on ol akan en di wet ni kadeik o pan kari ir ala, pwe a pwrarado jan ni imwin jappa, pwen ron lolekon en Jalomo. A kilan, me laude jan Jalomo mi met.

³²Ol en Niniwe kan pan u on di wet ni kadeik, o pan kariala i, pwe re kalula ni ar ronadar padak en Iona. A kilan, me laude jan Iona mi met.

³³Jota me kin ijikeda lamp, ap kila waja rir, pil jo pan kopa, a pon deu a, pwe me pan pedelon on, en kilan marain o.

³⁴Por en maj marain en pali war. Ma maj om makelekel, war om karoj pan dir en marain. A ma maj om me jued, war om karoj me pil dir en rotorot.

³⁵En kalaka, pwe marain mi lol om, der rotorot!

³⁶Ma war om dir en marain kaualap, o jota kijan rotorot mia, karoj pan dir en marain dueta linan en lamp, me kin jenjere uk ada.

³⁷A ni a kotin kaparok, Parijär amen luke i, en konot re a. I ari kotilon kotidi nin tepel.

³⁸A Parijär lao udial, ap puriamuiki, me a jota kotin omiom mon konot.

³⁹A Kaun o kotin majani on i: Nan komail Parijär akan kin widen likin dal o plet, a lol omail me dir en me re kuliada o me jued.

⁴⁰Nan pweipwei komail, kaidin i me wiadar pali liki, pil wiadar pali lole?