Iluk 10:9-25

⁹Keko beli, abiw beem kal wakamin so kebiliw kawtiw ilo wokmino kilelyemeko, abiw kasel biilo bokoyemomeliw: ‘Sunbin-Got em gawman ding dim e yom mit mewso tele kai!’, yangboliwka!

¹⁰Kate, yu mali abiw mutuk mak elo teliwi, i yom weng be kililinba keko, ibik kuyemiw tewe, yu abiw mutuk beem wensankabiliw dim elo uneko, ka kel gaaneko, bokoyemomeliw:

¹¹‘Yukalem sen kasike, num yan dim fewtokobe man kukun be abiw ka akate yewel kalis koleweko, iti unokoluw kate, yu kilele ibolow fukuneko, kililiwete: ‘Sunbin-Got em gawman ding dim e kame mewso tele kai!’, yangoliwka!

¹²Feinka! Sunbin-Got em diwyemoke ding dim kabalak e, yulo ibik kuyemoke abiw fian beem ilum e Sodom abiw mutuk fian em kuluse ilum bakiyemoke te!”, yangse kale.

¹³Yangeko, e iti bokoyemomele: “Kolasin so Betsaida so, abiw mutuk fian alew biim kasel yu weng kale kiliko, kilelbiboliwka! Yom mutuk kabalak e, ne auk so kitil so aluwbamin banban kukuyemsi kate, yu ibolow famdelinba kebiliw te. Ne Tail so Saidon so Isalael kawtiw im ibik biliw kawtiw im abiw mutuk fian alew biim mutuk e aluwbamin fian bakatetew kukuyemi tewe, i ikalem kukuw wa be koleweko, ilim wa minggiko, tawal aneko, ibolow famdeko, kikis deiw ken kabalak be uniw tew te.

¹⁴Yu kililina! Sunbin-Got em diwyemin ding dim kabalak e, yom kulokoliw ilum be Tail so Saidon abiw mutuk fian alew biim kasel im kulokoliw ilum beelo bakiyemoke te.

¹⁵Kafelneam abiw kasel yutaka! Yu ibolow fukunomeliw: ‘Nu abiil tikin katiw elo unokoluw te!’, angbiliw kate, itel bate! Feinka! Yu Seten-Ataanim em weing dong tem kalo unokoliw te!”, yangse kale.

¹⁶Yangeko, iti bokoyemomele: “Yom weng kili kebiliw kawtiw i nem weng akati kili kebiliw te. Yulo ibik kuyemiw kawtiw i nelo akati ibik kunem kebiliw te. Sunbin-Got e nelo namdase kasike, nelo ibik kunemiw kawtiw i Sunbin-Got elo akati ibik kulew kebiliw bakate.”, yangse kale.

¹⁷Yangei, akalem gelewkabiliw kunum bi em yange weng be de unsiliw kale. Uneko, iti teleko, Yesus elo kalfong so weng bokolewomeliw: “Kamok Fian kutaka! Nu kom wiin dim e aneng matil ilo weng kitil weng mak bokoyemuwi, ikati num weng kiliko, gelewsiliw te!”, dangsiliw kale.

¹⁸Dangiwi, Yesus e ilo yan weng bokoyemomele: “Seten-Ataanim e abiil tikin kawtem elote bamneng ailbin atew mit telei, ne atemsi te.

¹⁹Yu kililina! Ne yulo wiin so keyemsi kasike, yu ki keko, sokyan so, yongmonom so, kimon so mesesem alik alik biim kak kawtol keyemeko, yeitsansan koyemokoliw te. Yulo maka keyembe Seten-Ataanim em kitil akati yom afak kuw duyemsi kasike, wa eisneng mak yulo nam wa keyembe te.

²⁰Kate, yu kanelom aneng matil im yom weng afak kebiliw beem mongom ete kalfongyemokoliw te. Ba! Kate, Sunbin-Got em yom wiin akalem abiil tikin katiw alakabe fut tem kel boyembe beem dulum elote yu kalfong fian keyemboliwka!”, yangse kale.

²¹Yangei, beem ding dim bakate, Sunbin-Finik e Yesus em ibolow tem wenei, e kalfong fian keko, bokolomele: “Aatim kutaka! Ku abiil tikin so kawin dim kale so alik alik beem kak kunum kute te! Feinka! Aatim ku kukalem ibolow fukunin kuw gelewsomi, mesesem kitil so auk so kale kal so wiin fian so kawtiw im dulum elote okiw dabelew kate, aul gel ibolow atew kebiliw kawtiw biim kiin dim e fitew kuw kukuyembelew kasike, kom wiin fian daokembi te.”, dangse kale.

²²Dangeko, iti bokolomele: “Nakalem aatim e alik alik mesesem mesesem eisneng angom be nem teing dim elo kuw dase te. Kawtiw i Sunbin-Min nelo akokow kebiliw kate, nakalem Aatim ete kuw nelo kilele kal kenembe te. Beemdiw, kawtiw i nem Aatim elo akati akokow kelewbiliw kate, Sunbin-Min nakalem so, elo kukuyembi kunum waneng so, nute kuw Aatim elo kilele kal kebuluw te.”, angse kale.

²³Angeko, akalem gelewkabiliw kunum ilo kuw bokoyemomele: “Yu kankabiliw eisneng kale atemiw kasike kalongeko, kakatemoliwka!

²⁴Yu nem weng kale kililoliwka! Sua sua kel akate, Sunbin-Got em bontem dim bakamin kunum banban so, emisik kak kunum banban iso, alik alik i yom atemeko, kilikabiliw eisneng beem dulum elote ‘Nu atemeko, kililomin ibolow kebuluw o!’, angsiliw kate, i atemeko, kililinba kesiliw kale.”, yangse kale.

²⁵Deiw mak ding mak, Sunbin-Got em kukuyemin sawa weng em kak kunum mak teleko, Yesus elo dakalalomele: “Kukuyemin kunum kutaka! Ne nono kesomi, diwkuw diwkuw sunsun finik so bin kuloki a?”, dangeko, dakalase kale.