Ihi 89:38-48

³⁸Are minti tiaravavata, vate nana kaarae nena kaama taana vaiintirara arara itaivara vira qoririma kaaro?

³⁹Are vikantira vaihara tiva taatau taana uvara nunkakera vira avuhainaa tovaqa qaqini varakera horaqi aqu kaaro.

⁴⁰Vira vatuka ututumataa ori vaantaavurara ravantiaqa raavantiaqama aqu kera, vira iqoka naavu, vo naavu vo naavuvata rampairi raampairima kaaro.

⁴¹Are mintianara kaara aaraqaa vitare aitare i variaka viva i haikara muara varaamanta, vo vatanaa vo vatanaaka Isareri tataaqa variaka vira naaraihama amite variavo.

⁴²Are vira navutaaka qaqi kaaramanta vika avuhainaa vaiinti vira hampata iqoka raqiha vira aatarake, vora ntuva amitaavo.

⁴³Vira navutaaka vira aatara kaate tira, are vira auvihehavaa qoraiqama kaanara.

⁴⁴Are vira kauquqihaira avuhainaa kauru qaqini varakera, Isareriqaa raqiki vaira taiqa kera, vira avuhainaa taintavata vataini vara aqukera iaro.

⁴⁵Are viva vataini qaqi variqiro vuaina ihira iquqama kaararo viva vaaka vakaqoraiqama viro, vira kaara viva nora kaurira haika varaivo.

⁴⁶Mpo Noravauvo, are ekaa entae tinavu tivuqaa kukeqavira vainarave? Mpo, nanti nanti entae nora ihavano itaqiro vi vaintema kero, ai arara ite vaiva qaqi itaqiro vuanarove?

⁴⁷Mpo, are tenavu maa vataraqaa vahuqa variqi vuainarara irihara variane. Tinavuara vika variqi vi, qumina vuru qutu vuate tirae, are tinavu maa vataraqaa autu kera vataanarave?

⁴⁸Mpo, tavave tinavuqihairo kia qutiraitiro, qaqi variqiro vuanarove? Tavave kempukaiqama kero qutira haika aatara keharo kia qutuanarove?