Ihi 74:5-18

⁵Mpo, vaiintinavu roriqohai nantaqi vo katari vo katari teqa taaqama kaantemake, navutaaka ai Naavuqi vahehema/vaataiqama taa katarira, vo katari vo katari teqa taaqama kaarave.

⁶Vika nora roriqohaive, inaara roriqohaive, ai Naavuqi koqemake nkauruke qara ntuvataa katarira teqa taaqamake

⁷viraqaahai vika ai Naavu viravata qumpiarama taavaro ekaa ita taiqa virave. Mpo, vika mintima keha are tinavu Isareri hampata variana Naavura qoraiqama kaarave.

⁸Navutaaka tinavuara tiha, Tenavu vika ekaa ruqutu taiqa karerave tivakeha, tinavu vataini vi aniha ekaa ai maara naavu qumpiarama taiqa kaarave.

⁹Maa entara are nora kaiqa vo kaiqa vo kaiqa varaarava kia qaiqaavata qovaraiqivo. Ekaa ai paropeti vaiintinavu taiqa vuavaro kia voqavanovata vaivo. Mpo, tairentae qora enta viva taiqa vuanarove?

¹⁰Mpo Kotio, navutaaka nanti nanti entae ai naaraihama amitaqi vivarave? Vika ekaa entae ai autuara qora uva tivaqi vivarave?

¹¹Mpo, nana kaarae are tinavu qaqira kera kia nena kauqu tanaraqohaira tuvu tinavu kahaqiaro? Nantiharae are nena kauqu kia tutiraitira, qaqi variaro?

¹²O Kotio, nai haaru are tinavu Isareri Avuhainaava vaihara tinavuqaa raqikiqira vuanarave. Are airi tataa tinavu Isareri ruaruama timitaanarave.

¹³Are nena kempukaqohaira nora namari raira kaanarave. Qaakau haika airi qiata vataava nora namariqi vaira are vira qiatanavu rukavu kaanarave. (Vi uvara okara: Isipi iqoka vaiinti namariqi aru taiqa kairara tura.)

¹⁴Are qaakau haika airi qiata vataara vira qiatanavu rukavu kera, vira vaata qaakau vairinavu aahara vataini variaka nimiaramanta naarave.

¹⁵Arema vata qantua kaararo viraqihairo aruvu namarivano qovaramaviro tuvi vaira. Arema namari tuvi vaira vo namari vo namari aaharaiqama kaanara.

¹⁶Arema aatitairavata enta iravata autu kera vataanara. Arema kuarivata, toravata naaruvaini nái vatukaini vataanara.

¹⁷Arema vi vatava vi vatava mini mini mintimakero varianarove tivakera vataanara. Arema nora kuari itaaina entarave, aaqu ntuaina entarave, autukera vataanara.

¹⁸Noravauvo, are mintiarava variaramantavata, ai navutaaka ai naaraihama amite variarave. Kia avu aato vataa vaiinti nahenti vika ai autu vatainiqamake variarave. Ho virara virara iritaane.