Ihi 69:10-18

¹⁰Mpo, te iqi rataqi viha karavata aurumate vauramanta, vika tiriara qora uva qaqiqai tivaqi vi variara.

¹¹Te kovaara utavaaqavata nonkute vauramanta, vika qaqiqai ti naaraihama timite variara.

¹²Vaantaavura qentiana ruvaaqumavi variaka, vika ti tauvaqa vauraa uva ti variara. Uaini neha vueraiqi variaka, vika ti naaraihama timiteha vo ihi vo ihi tiriara ti variara.

¹³Vika mintiaveravata, te ai aareha tiha, Noravauvo, are nena kaama tena entaraqaa ti uva irihara ti kahaqama timitaane. Kotio, ai muntukavano tiriara voqama kero vairara irihara, vo tivakera ti ruaruama timitaane.

¹⁴Mpo, te kapoqi rupeqa vunaraqihaira ti ruaruama timitaane. Kia ti qaqi kairaqe te ekaara viraqi rupeqa vuare. Ti navutaiqi variaka kauquqihaira ti qaqini vara kaane. Varuva namariqihaira ti qaqini vara kairaqe ho variare.

¹⁵Mpo, kia qaqi kairaro huvura namarivano ekaara ti aqu ravaaqavu kaarire. Kia qaqi kairaro varuva namarivano ti nampiqama kaarire. Kia qaqi kairaro hiqainti novano ti ekaara tinta kaarire.

¹⁶Noravauvo, ai muntukavano tiriara enena vairara irihara, vo tivakera ti uva iriane. Tuqantaavira ti aaqurihama timitaane.

¹⁷Mpo, te ai kaiqa vaiinti vaurara kia kukeqavira variane. Nora maaravano tiqi vaimanta vaunarara tira, vaaka vo tivakera ti kahaqama timitaane.

¹⁸Te unanaini anintera ti ruaruama timitaane. Ti navutaaka kauquqihaira qaqini vara kairaqe te ho variare.