Ihi 68:13-34

¹³Vehi nahenti vinavuka sipisipi naavu avutaqi variaka silvaa orive, kori orive, varake viraqohai nái vaata vaahehema/vaataiqama teha variara. Mirura arokavano nai vaata naavuma taintemake, vika vi haikara varakeha nái vaata vahehema/vaataiqama taavaro takuqiharo vaira. (Ves 13 Hiparu uva kia kankoma kero vairo.)

¹⁴Kotiva ekaa kempuka vataava taaruvano/kaampuravano Salamoni Aiqinaqaa ntintema kero, avuhainauka vonavu raumpirima kaimanta qetake vuara.

¹⁵Basaani Aiqinavano nai nora aiqinavano vaivaro vi aiqinaraqaa airi onkaivano vaira.

¹⁶Basaani Aiqinao, are airi onkai vataava vaihara nantiharae are Saioni Aiqina tavehara tihara, Tevata vi aiqinara voqaara variataarave, tiaro? Noravano Kotiva nai Saioni Aiqina vira kaama tero tiharo, Te vi aiqinaraqaa ekaa enta variqi virerave, tirave.

¹⁷Noravano Kotiva Sainai Aiqina mini kero ˻Saionini˼ nai naavuqiara vi vaimanta vira iqoka vaiinti nai airitahaa nái iqoka kaariqi vaiha vira ututumate vira hampata oru vi variavaro viva nai naavuqi turuaraini oru vaira.

¹⁸Are verara kantaaqaini vihara, airitahaa rumpataaka ntita varaaramanta vika ai hampata vuara. (Epasaasi 4:8) Are mini vuaramanta ai qoririmake variaka, vika ˻ai aatu qeteha˼, vo haika vo haika ai ami variara. Noravano Kotiva Saionini ˻tinavu hampata˼ variqiro vuanaro.

¹⁹Kaiqenavu Noravano Kotiva tinavu ruaruama timite vaira vira autu tuaheraqi vuare. Viva vo enta vo enta tinavu maara qaqini varakeharo naiqaa aqu vare vairave.

²⁰Tinavu Variqavano viva tinavu ruaruama timite vai Variqavama vaivo. Noravano Kotiva ekaa haikaqaa raqiki vaiva, viva tinavu kahaqi vaimanta tenavu kia qutiraiti, qaqi variqi vi vaunara.

²¹Vira navutaaka qora kaiqa kia qaqira karaiti, qaqiqai vare variaka Kotiva quqaama vika qiata rukavuma kaanaro.

²²Noravano Kotiva tiharo, Te ni navutaaka Basaanihaive, nora namari vevaihaive, ntita vare vuru ne vainaini kaari

²³ne vika naareqi nenta aiqu quntama taimanta ni vairi vika naare nevarave.

²⁴Tinavu Avuhainaao, Kotio, vaiinti nahenti tavaavara, are navutaaka naatara kaarava airi vaiinti ntita varera vika avuni vora ntuvaqira vihara nena Naavuqira oru vuanarave.

²⁵Ihi ti variaka avuni oru vuamanta vika naantiaraini musiki ruquti variaka oru vuamanta vika avutana varaatanavu tamparini rintatimaqi vuarave.

²⁶Ne airi vaiinti nahenti ruvaaqumavi variaka, ne Kotira autu tuahera kaate. Ne ekaa Isareri Nora Kotira autu tuahera kaate.

²⁷Tavaate. Benaminira anku inaara ankuvano avuni vi variamanta vika naantiara Iutaara ankuqihai qiata vaiinti airitahaa vi variamanta, vika naantiara Sebulunika Napataarika ankuqihai vika qiata vaiintivata vi variara.

²⁸O Kotio, nena kempuka okara vaiinti nahenti numiqairamanta vika tavaate. Are haaru autuanantema kera qaiqaavata nena kempukaqohaira tinavu kahaqiramanta

²⁹vo vatanaa vo vatanaa avuhainaaka ai aatu qeteha vo koqaa vo koqaa vare vuru Ieruharemini ai naavuqi kaate.

³⁰Qaakau aantau vovano kiara noruvaqi vaira, are vira atiane. Qaakau purumakau qoranavu nái naati hampata variaka, are vi vatanaakavata nitiane. Are vika nitiramanta vika ai aatu qeteha tori kauru aravi vaiha airi silvaa ori ai vuru amiate. Quaheha iqoka raqi varia vatanaaka, are vika vika ntaihehara raumpirima kaira vi anima vuate.

³¹Naantiara Isipi avuhainaava nititaika Ieruharemini anivarave. Itiopia vatanaaka Kotira vevaaraini vaireka, vika nái kauqu tuaherakeha vira aarevarave.

³²Ho ekaa naato vatanaaka, ne Kotirara iriha ihi tivaqi vuate. Ne Nora Kotira autu tuaheraqi vuate.

³³Haaru naaruva autukero vataiva viva tonavuqaa oquviro vaiharo vi ani vai Variqara, ne virara ihi tivaqi vuate. Naaruvavano uva tintema kero, uva ti vai Variqarara irihama

³⁴ne vaiinti nahenti tiva nimi tiha, Vira kempukavano uritarakero vairave, tiate. Viva tinavu Isareri Avuhainaavama vaivo. Tenavu naaruvaini vira mpeqa okara tave vaunarave.