Ihi 139:11-21

¹¹Te konkira arinaini oru variarera, te kia ho ai avuqaa kukeqavi vairara. Enta ira haikavano ti mantaaqa kairaqe te kukeqavi variare tiarera, are mini qaqiqai qoqaa ti tavenara.

¹²Voqamakero konkira ariva vaivaravata, are virara aatitairave ti varianara. Are aatitairaqaa ho tave varianantema kera, entaqivata ho tave variaravama variaro. Enta ivavata aatitaivavata ai avuqaa vohaa qarama keroma vaivo.

¹³Arema ekaa ti vaatave, ti avu aatove, autukera vataaravama variaro. Are ti nora auhaqi ti vaata akukumakera autukera vataanara.

¹⁴Mpo, are minti mintima kera ti autu kera vataanarara irihama, te kauqu runkinkiri iha ai aatu qeteha ai autu tuaherake vauro. Te kankomake irunara. Ekaa are vare variana kaiqava nai voqaraa kaiqama vaivo.

¹⁵Te tenta nora auhaqi kukeqavi vauna entara are ekaa ti vuhaarinavu tavaanara. Vi entara are ti mative, vuhaarive koqema kera taataukera vataararo ti vaatavano koqemakero akukumavi vaira.

¹⁶Mpo, ti nova kia ti vatatai entara are ti kankoma kera tavaanara. Te kia qovaraiquna entara are ekaa te maa vataraqaa qaqi variaina entanavura nena vukuqi qara ntuva taanara.

¹⁷Ike, Kotio, ai avu aatoqira nai nora uva, vo uva vo uva vaimantara ti, te vi uvara vi uvara kankomake iriarirava kia ho vaivo.

¹⁸Are avu aato uti variarava nai airi vaimantara ti, te ai avu aatoqiraara kaara ntuarera, nai nora namari auvahini airi nuqa vaira viravatama aatara kaanaro. Te vira ho kaara ntuva taiqa kaareravata, te kiama ho ai okara vira kankomake irirara.

¹⁹Mpo Kotio, are qora kaiqa vare variaka aru taiqa kairaqe, te hove tiataara. Ne vaiinti aruke variaka, ne tiqaahai qaqirake niaraini vuaterama turo.

²⁰Kotio, vi vaiintika ariara qora uva ti variakave. Vika ai navutaiqiha ai autu koqera qoraiqamake variavo.

²¹Noravauvo, ariara kia antuqa ari vaiintika ti kia vikara hantuqa harivo. Ai navutaiqi variaka kia vikara ti muntukavano vaivo.