Hwan 4:3-21

³A ta pakkamu ni Hesus ta nadamag na Pariseyu kiden tentu a nagtugut kid na ituldu na kiden ta lugar na Hudeya, te nagpaamyanan kid ha ta iten Galileya,

⁴ammi mappya ta angen da ya lutak na Samariya.

⁵A nakatugtugut kid la nakatugtugut addet ta pingit na ili na Sikar, a nagimmang kid na ta bikat na lutaken nga neatad ni mina Hakob ta anak na en Hose ta palungu na araw.

⁶A gafu ta nabannag na i Hesus ta inange da en, te tangnganan na araw hapa, a nagibannag hapa ta bibig na huhunen nga kinali ni mina Hakoben.

⁷A ta pagibannag ni Hesus a nagdulot hala ya ituldu na kiden ta umag na ili petta gumatang kid ta kanan da. A ta kawan da para la a itta ya babbay nga taga Samariya nga umange nanagab ta huhunen. A ya uhohug ni Hesus tentu a “Ikwa nak haen ta danumina,” kunna.

⁹Ammi nagpaka-lat ya babbayen ta uhohug ni Hesus, a “Anum hud magadang ta danum teyak, bakawa Hudyo ka, a Samariyano yak nga babbay?” kunna. Te ya gagangay kan na Hudyo kiden a aweda kan uminum ta paginumān na Samariyano.

¹⁰A ya tabbag ni Hesus hapa a “Awem garay amu ta itta ya iatad na Namaratu ewan teko, a awem amu am inya ya nagadang teko ta inuman, te am amu nak mina a iyak mina ya nagadangam ta inumam, a inatadan ta ka mina ta matolay na danum,” kunna.

¹¹“Awan haman ta pagsiruk mu, Ser, ta huhunin, yaga pake naumag ya danum na in. A had kukum mantu makaalap ta matolay na danum nga iatad mu teyak?

¹²Dakdakal hud ya amum ammi te mina Hakoben nga nangisirak ta huhunin tekami, te maski intu hapa ya kanayun imminum ta danum na in, kontodu anak na kiden ikid na ayam na kiden,” kunna ha na babbayen.

¹³A ya uhohug ha ni Hesus tentu a “Onay, ammi gumtang hala sangaw ya ngamin kiden uminum ta isin na danum.

¹⁴Ammi ya uminum ta iatad kin nga danum a awena sangaw gumtang, te ya danumin nga iatad ku a magbalin sangaw ta kuman na huhun ta umag na en, a kuman na sigida tumuhayuk tentu petta magnayun ya angat na,” kunna.

¹⁵“A atadan nak mantu, Ser, ta kinamina danum, petta awek na sangaw gumtang ikid na ange managab ta isin,” kun na babbayen.

¹⁶“A em bit ayagan ya atawamen, te dumatang kanan sangaw ta isin,” kunna hapa ni Hesus.

¹⁷“Ay awanak haman ta atawa,” kunna ha. Ammi ya uhohug ni Hesus tentu a “Kustu ya uhohug men ta awan ka ta atawa,

¹⁸te nakigungay kan haman ta lima na atawa, a bakkan hapa ta atawam ya pakidaggam ta ayanin,” kunna.

¹⁹A gafu ta nagpaka-lat ya babbayen ta uhohug ni Hesus a takwan ha ya nebar na; “Ser, ya kuman na mariknak teko a iko hala ya takday aglavun nga paguhohugan na Namaratu ewan.

²⁰A itta mantu ya damagan ku teko, te ya gagangay na gingginafu mi kiden ta pangdayaw da ta Namaratu a kanayun nakigimung kid kan ta bagetayewan. Ammi ya kagittam kiden nga Hudyo a ibar da ta awan mina ta takwan na pangdayawan tam tentu am bakkan ta ili na Herusalem. A had sin mantu ya kakurugan na pangdayawan tam?” kunna.

²¹A kunna sin hapa ya tabbag ni Hesus ta nebar na en: “Mappya, Aboy, ta kurugam ya uhohug ku teko, te ikamuy nga Samariyano a dayawan muy hala ya Namaratu, ammi awemuy pake amu ya dayawan muy. Ammi ikami nga Hudyo a amu mi ya dayawan mi, te ikami ya nangalapan na Namaratu ta mangikerutan ta ngamin tolay. A yen ta ibar ku teko ta mauli sangaw ya pangdayaw muy, te bakkan la sangaw ta bagetayewan ono ili na Herusalem ya pangdayawan muy ta Namaratu.