Hechos 6:1-10

¹Chupa taq laꞌ la qꞌij lik xekꞌiyar ri kajlibꞌal ri kikojom rubꞌiꞌ ri Cristo. Ekꞌu ri hermanos e aj judiꞌabꞌ ri kechꞌaꞌt pa ri chꞌaꞌtem griego, xkijeq kechꞌaꞌtibꞌen chikij ri hermanos e aj judiꞌabꞌ ri kechꞌaꞌt pa ri chꞌaꞌtem hebreo. Ma echiriꞌ kaꞌan ri jachanik chike ri e nibꞌaꞌibꞌ, ri malkaꞌnibꞌ ri kechꞌaꞌt pa ri chꞌaꞌtem griego na kekajmax ta chi utz rukꞌ ri toꞌbꞌal ke kakikꞌul ri jujun qꞌij.

²Ekꞌu ri kabꞌlajuj taqoꞌn xkimol kichiꞌ konoje ri kikojom rubꞌiꞌ ri Cristo y xkibꞌiꞌij chike: «Na usukꞌ taj we riꞌoj kaqatanabꞌaꞌ utzijoxik Rutzij Upixabꞌ ri Dios chaꞌ kaqaya qibꞌ che ujachik ri kajawax chike ri e nibꞌaꞌibꞌ.

³Ruma kꞌu laꞌ hermanos, tzukuj alaq wuqubꞌ achijabꞌ chixoꞌl alaq, chom ri kibꞌinik kisilabꞌik, lik kiyaꞌom kibꞌ puqꞌabꞌ ri Ruxlabꞌixel ri Dios y lik kꞌo kinaꞌoj, chaꞌ kaqaya wa chak pakiqꞌabꞌ.

⁴Jekꞌulaꞌ riꞌoj xew kaqaya qibꞌ che kaqaꞌan orar chwach ri Dios y che rutzijoxik Ruchꞌaꞌtem» xechaꞌ.

⁵Konoje kꞌu ri hermanos kimolom kibꞌ, xukꞌul kikꞌuꞌx wa xbꞌiꞌx chike. Xkichaꞌ kꞌu ri Esteban, jun achi lik kubꞌul ukꞌuꞌx rukꞌ ri Dios yey lik kꞌo ri Santowilaj Ruxlabꞌixel ri Dios rukꞌ. Y xekichaꞌ ri Felipe, ri Prócoro, ri Nicanor, ri Timón, ri Parmenas y ri Nicolás, jun achi aj Antioquía xex utaqem lo ri kꞌutunik ke raj judiꞌabꞌ.

⁶Ewi xekikꞌam lo chikiwach rutaqoꞌn ri Jesús. Ekꞌu wa taqoꞌn xkiya ri kiqꞌabꞌ pakiwiꞌ y xkiꞌan orar kukꞌ.

⁷Jekꞌuriꞌlaꞌ ri Utzilaj Tzij re ri Qanimajawal lik xeꞌek utzijoxik y lik katajin kikꞌiyarik ri kajlibꞌal ri kikojom rubꞌiꞌ ri Cristo chiriꞌ Jerusalem. E kꞌo ne ukꞌiyal e aj chakunel pa Rocho Dios xkijeq kakitaqej ri Utzilaj Tzij.

⁸Ri Esteban lik kꞌo ri unimal rutzil ukꞌuꞌx y ruchuqꞌabꞌ ri Dios rukꞌ. Ruma kꞌu riꞌ, kuꞌan nimaq taq kꞌutubꞌal re ruchuqꞌabꞌ ri Dios chikiwach ri winaq.

⁹Ekꞌuchiriꞌ, xeyaktaj jujun re ri sinagoga, ri kabꞌiꞌx che “Ri sinagoga ke ri ebꞌelinaq lo pa ri kꞌax”, yey kukꞌ rike xeyaktaj jujun e aj Cirene, e aj Alejandría, e aj Chipre y e aj Asia. E taq kꞌu riꞌ waꞌ xkijeqo xa pa chꞌaꞌtem kechꞌoꞌjin rukꞌ ri Esteban.

¹⁰Yey na kakiriq ta ukꞌulik uwach ri kubꞌiꞌij ri Esteban ma rire kachꞌaꞌt rukꞌ ri naꞌoj uyaꞌom ri Ruxlabꞌixel ri Dios che.