Hechos 3:18-25

¹⁸Tan ech chit itzojpu viyol u Tioxh tziꞌ vaꞌl bꞌaxabꞌsamal talax taqꞌo tu qꞌu alol tetz viyol, aas ministeer chit ikam viTxaaom u Tioxh.

¹⁹Echtzixeꞌt kꞌaxataj qꞌul epaav. Chꞌexputaj qꞌul etxumbꞌal. Ech sasotzsal qꞌul epaav. Ech laul u bꞌaꞌnla tiempo tzexeꞌ tu u Tioxh. Ech silochꞌoꞌ.

²⁰Utz sichajuꞌl u Jesucristo tikaꞌpaj. Ayaꞌ vaꞌl alel nal taqꞌo, sauli.

²¹Loqꞌ ministeer taꞌn aꞌ saꞌatinku u Jesuus tu Amlika. Anal sauli aas saꞌtektoksa kajay qꞌu kam u Tioxh tu jik tu u vatz amlika txꞌavaꞌ. Echaꞌ vaꞌl tal titziꞌ qꞌu alol tetz viyol xaanaj el kꞌatz paav atich oꞌtene.

²²Utz antu u Moisees alon tu qꞌu kukꞌuy kumam ech tzaꞌ: «Saꞌnalicheesa maꞌl alol tetz viyolbꞌal u kuBꞌaal Tioxh texoꞌl echaꞌ in tzaꞌ. Utz lamotxenima kajayil kam vaꞌl latala.

²³Tan oj abꞌil yeꞌ laniman, sotzchil siꞌan xoꞌl vitenam u Tioxh.» Texhtuꞌ.

²⁴Ech antu tereꞌn qꞌu alol tetz u yolbꞌal Tioxh taabꞌaul tzaꞌ, motx yolon tiꞌ qꞌu kam nituch cheel. Aꞌ bꞌaxal xeꞌt alon u Samueel.

²⁵Utz ex vetilon itzojpu qꞌu kam tal qꞌu alol tetz u yolbꞌal Tioxh tiꞌ koꞌxtene. Ex vetilon iqꞌaqꞌal u nukꞌu vaꞌl iꞌan u Tioxh tuchꞌ qꞌu kukꞌuy kumam u Abrahaam. Tan tal te ech tzaꞌ: «Kajay qꞌu aanima tu u vatz amlika txꞌavaꞌ, sikꞌul u bꞌaꞌnil kꞌatz vatuꞌxh axalam.» Texh te.