Föför 3:18-25

¹⁸Nge iei usun Kot a apwönüetä met a fen apasa me lomlom ren ekewe soufos meinisin, lupwen a apasa pwe nöün we Kraist epwe küna riaföü.

¹⁹Oupwe ekieksefäl o kul ngeni Kot, pwe ämi tipis epwe mola,

²⁰pwe Kot epwe awora ngenikemi eu fansoun ngünümi epwe küna pöchökül. Epwe tinato Jesus, i ewe Kraist, Kot a fen filätä fän itemi.

²¹Jesus epwe chök nom lon läng tori epwe war ewe fansoun pwe ekewe mettoch meinisin repwe försefäl, usun Kot a fen apasa me lomlom ren nöün kewe soufos mi pin.

²²Pun Moses a apasa, ‘Ewe Samol ämi we Kot epwe tinato eman soufos usun chök ngang, i eman seni püsin aramasemi. Oupwe fokun aleasochisi meinisin mine a ürenikemi pwe oupwe föri.

²³Nge eman esap aleasochis ngeni ena soufos epwe käriwu seni aramasan.’

²⁴Iwe, ekewe soufos, pwal Samuel me chokewe mi tapw me mürin, ir meinisin mi afalafal, ra fen kapas usun met epwe fis lon ekei rän.

²⁵Än Kot kewe pwon nöün kewe soufos ra aronga ra fän itemi, nge ämi oua pachelong lon ewe pwon, Kot a föri ngeni ämi kewe lewo, usun Kot a kapas ngeni Apraham, ‘Üpwe afeiöchü aramasen fanüfan meinisin ren mwirimwirum.’