Hechos 2:15-32

¹⁵Cꞌani inwareox que e winicobꞌ era machi war acarayobꞌ cocha nox war ani ibꞌijnu, porque era wartocto atꞌabꞌay ut e qꞌuin.

¹⁶Ma cocha erer. Lo que war iwira era jax taca lo que chꞌar tzꞌijbꞌabꞌir umen e profeta Joel xeꞌ che cocha era:

¹⁷Tama e tiempo conda axin acꞌapa tunor or e rum era, che e Dios, cꞌani inwechꞌe axin Ninawalir tama tunor e gente xeꞌ turobꞌ tama tunor or e rum. Y cꞌani inware isitzobꞌ y iwijchꞌoctacobꞌ inteꞌ inteꞌ ojroner y jaxirobꞌ tuaꞌ asutpa uyareox tucꞌa era otronyajr, y e chꞌom maxtacobꞌ tuaꞌ amayjutiobꞌ tamar lo que cꞌani inwirsiobꞌ, y e onian winicobꞌ tuaꞌ uchꞌamiobꞌ cora wayac lo que cꞌani inwajcꞌuobꞌ, che e Dios.

¹⁸Y cꞌani inwechꞌe axin Ninawalir tama nimanobꞌ xeꞌ winicobꞌ y xeꞌ ixictacobꞌ, y cꞌani uchecsuobꞌ tut e gente lo que cꞌani inwareobꞌ, che e Dios.

¹⁹Y nen cꞌani inwirsiox meyra seña tut e qꞌuin xeꞌ imbꞌacꞌajr uwirnar, y cꞌani inwirsiox meyra seña tor e rum ubꞌan. Y cꞌani achecta e chꞌich y e cꞌajc y e sian bꞌutz, che e Dios.

²⁰Y e qꞌuin cꞌani asutpa incsibꞌan uwirnar, y e luna cꞌani asutpa uwirnar bꞌan cocha e chꞌich. Bꞌan tuaꞌ anumuy bꞌajxan que acꞌotoy e día conda watar Iwinquirar, xeꞌ jax e día xeꞌ más imbꞌacꞌajr uwirnar y xeꞌ más nojta tama tunor, che e Dios.

²¹Y tunor tin e axin upejca Cawinquirar cꞌani acorpesnobꞌ. Bꞌan chꞌar tzꞌijbꞌabꞌir tama uyojroner e Dios umen e profeta Joel.

²²’Niwermanuox xeꞌ tuox e Israel, ubꞌinic ninuc era. Cꞌani inwareox era que e Jesús xeꞌ tuaꞌ e chinam Nazaret jax inteꞌ winic xeꞌ chectesna umen e Dios que tuaꞌ ixto yaꞌ umen que cay uche meyra sian maravilla, y meyra sian milagro, y que cay uche meyra sian checsuyaj cocha jax e Dios xeꞌ cay uyajcꞌu ucꞌotorer tuaꞌ uche tunor era. Tunor era chequer tiut cocha bꞌan cay iwira nox.

²³Pues natanwa y cꞌajna umen e Dios ixnix e tiempo que e Jesucristo ucꞌani tuaꞌ aꞌjcꞌuna tama icꞌabꞌ nox. Pero conda chequer tiut que tama icꞌabꞌ turu e Jesús era, iware tuaꞌ achꞌubꞌna tut inteꞌ cruz tuaꞌ achamay tama ucꞌabꞌobꞌ e winicobꞌ xeꞌ mabꞌambꞌan uwirnarobꞌ.

²⁴Pero e Dios usuti ubꞌixqꞌues Cawinquirar Jesucristo tujam e chamenobꞌ; pues ixin ucorpes tama ucꞌotorer e chamer, porque ma cocha erer acꞌotori más e chamer tujor Cawinquirar Jesucristo.

²⁵Y canata que bꞌan porque ayan lo que utzꞌijbꞌa e rey David tama uyojroner e Dios tamar Cawinquirar Jesús tama e onian tiempo xeꞌ che: Nen inwira que turu Niwinquirar taniut tama tunor e tiempo, y que turu jaxir tama ninojcꞌabꞌ tuaꞌ ucojcuen tuaꞌ machi imbꞌajcꞌusena, che e David.

²⁶Y tamar era bꞌutcꞌa niwalma taca inteꞌ nuxi tzayer este que ojronen meyra ojroner tama niwej, y tamar era cꞌani aturuan atzay nicuerpo ubꞌan umen que war incojco tama e Dios, che e David.

²⁷Porque net, Nidiosiret, machix tuaꞌ awacta aquetpa niwalma tujam e chamenobꞌ, y nien machix tuaꞌ awacta oꞌcꞌoy nicuerpo tama e mujr, cocha nen amanen xeꞌ yajtanbꞌir niut amener, che e David.

²⁸Y net, Nidiosiret, awirsenix cocha tuaꞌ inxana tama abꞌir tiaꞌ ayan e cuxtar xeꞌ machi tuaꞌ acꞌapa, y tamar era cꞌani abꞌutcꞌa niwalma taca e nuxi tzayer conda incꞌotoy tawejtzꞌer net. Bꞌan chꞌar tzꞌijbꞌabꞌir umen e David tama e onian tiempo tamar Cawinquirar Jesucristo.

²⁹’Niwermanuox, cꞌani inwareox era que natanwa umen tunor que chamay catata viejobꞌir David, y que mujca y que ya turu umujr tara tama e chinam Jerusalem este coner.

³⁰Pero e David jax inteꞌ profeta tuaꞌ e Dios y tamar era unata que e Dios uyacta inteꞌ ojroner tacar que tamar uchꞌajnarir e David era cꞌani achecta inteꞌ sitzbꞌir xeꞌ tuaꞌ aquetpa e Cristo, y que jaxir cꞌani aturuan tama uturtar e David.

³¹Pues e David unata ixnix tucꞌa cꞌani uche e Dios, y tamar era cay ojron tamar e tiempo conda cꞌani asujta abꞌixqꞌuesna e Cristo. Y tamar era chꞌar tzꞌijbꞌabꞌir tama uyojroner e Dios que uyalma e Cristo machix tuaꞌ aquetpa tujam e inmojr chamenobꞌ, y nien machix tuaꞌ oꞌcꞌoy uwerir.

³²Pues e Dios ixin usuti ubꞌixqꞌues e Jesús tujam e chamenobꞌ, y tunoron era ajchecsuyajon que bꞌan numuy cocha cawirix que bꞌixirix e Jesús.