Pɔpuɔr. 2:15-32 - Diiloŋ-nelma Tobisĩfɛlɛnni

Pɔpuɔr. 2:15-32

Click on verse(s) to share them!

¹⁵Na suyaa wuɔ bãaŋgu saa hi boŋ yogo aa na'a ba nyuɔŋ kolma, ba daa-ma hie?

¹⁶Na saa da, Diiloŋ uŋ puɔraa Yowɛl waŋ mamaŋ, ma'i ciɛŋ.

¹⁷Yowɛl waaŋ-ma wuɔ: ‹Diiloŋo ciɛra wuɔ: «Miwaaŋo tĩmmaŋ-huɔŋgu-na, mi ka gbuo nuɔmba‑i hiere baa mi *Yalle‑i. Na bisãlmba ka ta ba ce mi pɔpuɔruŋgu‑i. Mi kaa ta mi carra naaciemba‑i mi piiye baa-ba. Aa ta mi piiye baa bĩncuɔmba‑i dãnsãnniŋ.

¹⁸Coima saa fa, bamaŋ cãa-miŋ hiere, caamba‑i baa bɛmba‑i, mi ka gbuo-ba baa mi Yalle‑i huɔŋ daaku-na, ba ka waa mi pɔpuɔrbiemba.

¹⁹Mi ka ce gbɛrɛ-wɛima dɔrɔ‑i-na baa hĩɛma-na hiere: Tãmma kaa waa, dãamu kaa waa, nyaasĩnni kaa bi waa bɔi.

²⁰Bãaŋgu kaa bir cure ŋaa isuɔŋgu aa cɛiŋo bir ce dãa ŋaa tãmma. Mafamma ka ce aa Itieŋo jommaŋ-yiiŋgu suɔ hi. Yiiŋgu faŋgu temma siɛ ji waa; ku kaa waa yibuɔ.

²¹A ce dumaaŋo-na, umaŋ duɔ ji tuɔ gbuuse Itieŋo‑i, kutieŋo ka kor.»›»

²²Piɛr wuɔ suonu u ãndaaŋgu‑i wuɔ: «*Isirahɛl-baaŋ namaa, yaaŋ mi waŋ nelma diei baa-na: Diiloŋo pigãaŋ-na Nasarɛtitaaŋ Yesu fɔ̃ŋgũɔ‑i. U ciɛ u ce gbɛrɛ-wɛima bɔi na hɔlma-na. Namaa fɛrɛ‑i na saa yaŋ-ma damma.

²³Ba bel diiloŋo‑i bel-o hã-na. Diiloŋo suɔ wɛima‑i hiere; uu naa suɔ wuɔ na siɛ yaŋ-yo. Ma bi ciɛ: Na bilaa-yo a hã bamaŋ sa kãaŋ Diiloŋo‑i ba gbu-yo *daaŋ-nu ko-yo.

²⁴Ŋga hĩɛma saa naa waa ma gbãa wuo-yo. A ce dumaaŋo-na, baŋ kuɔ-yo, Diiloŋo yaŋ-ba aa sire-yuɔ.

²⁵Na saa da, *Davidi piiye u maama wuɔ: ‹Mi da Itieŋo‑i hɔnni maŋ joŋ mi yaaŋga-na. U sa taara mi kũɔma nyɛŋ, ku'i ciɛ u jo ji waa mi caaŋ-nu.

²⁶Kufaŋgu hɔfɛ̃lle yaa yuu mi huɔŋga‑i a ce mi ta mi piiye dumandɛ‑i-na. Mi suyaa wuɔ da mi ku, mi ka fiisa.

²⁷Diilo, mi suyaa wuɔ ŋ siɛ yaŋ mi tĩɛ dii kuoŋ-nelle-na. Ŋ siɛ siɛ yaŋ naŋ nolŋo hɔr dii hĩɛma-na.

²⁸Hũmelle maŋ kãaŋ ŋ wulaa, ŋ pigãaŋ-mi baa-de. Da mi waa ŋ caaŋgu-na ŋ ka ta ŋ ce baa-mi.›»

²⁹Piɛr wuɔ cor baa u ãndaaŋgu‑i wuɔ: «Tobiŋ namaa, mi ka waŋ ninsoŋo‑i baa-na i bĩncɔiŋo‑i Davidi kũŋgu-na: Davidi kuu ba fuure-yuɔ, a ji hi baa nyuŋgo u cĩncorre dii i hɔlma-na.

³⁰Davidi waa Diilopɔpuɔrbiloŋo. Diiloŋo naa pã nuŋgu baa-yo wuɔ duɔ saa ji waa, u jãmatigisĩnni‑i, u ka hã u hãayɛ̃lŋo naŋo'i baa-ni.

³¹A ce dumaaŋo-na, Davidi naa tĩɛna baa-ma wuɔ *Koŋkortieŋo ka ku aa sire. Na saa da u ciɛra: ‹Diiloŋo siɛ yaŋ u nolŋo tĩɛ dii kuoŋ-nelle-na› aa ‹u siɛ yaŋ u hɔr dii hĩɛma-na.›

³²Koŋkortieŋo faŋo yaa Yesu‑i. Diiloŋ uŋ siire-yuɔ, miɛ maŋ daaye‑i hiere i daa-ma nuɔ.