Hechos 2:12-31

¹²Saymi fiyupa cushicur quiquinpura parlayargan: “¿Imatä päsaycan?”

¹³Sayno niyaptinmi burlacuyashpan waquin runacuna niyargan: “Caycunaga shincash carmi imata parlayashgantapis musyayansu.”

¹⁴Sayno niyaptinmi apóstol mayincunawan jamaraycashganpita ichircur Pedro nergan: “Jerusalencho y may-saychöpis tag Israel mayëcuna, shumag wiyayämay.

¹⁵Manami gamcuna yarpäyashgayquinösu nogacuna shincash caycäyä.

¹⁶Saypa trucanga Tayta Diosninsipa profëtan Joel guelgashgannölami canan cumplicaycan.

¹⁷Paymi Tayta Diosninsi nishgancunata cayno guelgargan: ‘Tiempo chämuptinnami Santu Espirituta cachamushä lapan chasquicamagcunaman. Santu Espirituta chasquicurnami nogapa wilacuynëta wilacuyanga olgu suriquicuna y warmi suriquicunapis. Magtacunapis noga ricasishgäcunatami elagpita ricayangapä. Saynölami auquincunata sueñuynincunacho ima päsananpä cagcunatapis musyasishä.

¹⁸Say wisanmi munashgäta ruragcunaman Santu Espirituta cachamushäpä. Saynöpami warmipis olgupis wilacuynëta wilacuyangapä.

¹⁹Ciëluchömi ricacäsimushä imaypis mana ricayashgayquita. Intimi sacacäconga. Quilami yawar-nirag ricacäconga. Cay pasachöpis runacuna segaypa wanusinacogtami ricayanquipä. May-saychöpis rupaptinmi cay pasa goshtaywan sapash caycagta ricayanquipä. Saypitarämi chämonga noga juzganä junag. Say chämushgan junagnöga manami imaypis yapay canganasu.

²¹Sayno cananpä captinpis nogata manacamag cäga salvashmi cayangapä.’ ”

²²Tayta Diosninsipa profëtan Joel sayno guelgashganta yarparcasirmi Pedro nergan: “Israel mayëcuna, cay parlamushgäcunata shumag wiyayämay. Nazaret marcapita cag Jesusga Tayta Diosninsi cachamushgan runami cargan. Sayno cashgantaga Tayta Diosninsi musyasimashcansi milagrucunata ruraptinmi.

²³Sayno caycaptinpis gamcunami Jesusta prësu sarircur jusasapa runacunapa maquinman entregayashcanqui crucificaypa wanusinanpä. Sayno entregaptiquimi Tayta Diosninsi palabrancho guelgarashgancuna cumpliyargan.

²⁴Sayno wanusiptinpis manami wanushgalanchöga usharashgasu. Saypa trucanga Tayta Diosninsimi payta cawarisimush.

²⁵Sayno cawarimunanpä cashganpitami rey David cayno guelgargan: ‘Imaypis nogawanmi caycanqui, Tayta Dios. Saymi imatapis mansarësu.

²⁶Shongöpis cushicunmi. Cushishlami cantashäpis. Saymi gamman yäracular cawaycä.

²⁷Munashgayquita ruraptëmi almäta Hadischo cachanquipäsu. Saynöpis manami cacharinquipäsu pamparashgalächo ayä ismunanta.

²⁸Gammi tantyasimashcanqui munashgayquino cawanäpä. Imaypis yanapämaptiquimi cushishla cawaycä.’ ”

²⁹Sayno David guelgashganta wilapayta ushasquirmi Pedro nergan: “Israel mayëcuna, sayno guelgar unay rey David manami quiquinpäsu guelgargan, sinöga Jesucristupämi. Musyansimi David wanur maynincho pamparashgantapis.

³⁰Tayta Diosninsipa profëtanmi rey Davidga cargan. Paytami Tayta Diosninsi nergan castanpita juc runa yurir imayyagpis mandag rey cananpä cashganta.

³¹Saymi Davidga quiquinpä guelgananpa trucan say yurinanpä cagpita guelgargan. Payga salvamagninsi Jesucristumi caycan. Jesucristo cawarimushganta ricaycagnöpis paypämi David guelgargan Hadischo almanta Tayta Dios mana cacharinanpä cashganta y cuerpun pamparashgalancho mana quëdananpä cashgantapis.