Acts 2:12-31

¹²Ale enira mo isoiso, la mar̃urahi la hutura, la lo vereverera hinia lara, “Matamata mata sava nahai?”

¹³Pani tatuara la kerehira lara, “Hara sei, la drong na waen meji!”

¹⁴Ale Peter peresi la tupu sangavulu r̃omana matea atu, la turu mai na nahora, ale mo ulo mo verea isara mara, “Mara Judea, ale mara Jerusalem tari, ha tapurongo! Ha levosahi mamahuni hinau nike!

¹⁵Matan la tamlohi nike la sopo drong sohen ka lo r̃omr̃omia, matan mo pa lo r̃alavuho purongo nahai.

¹⁶Pani hinau nike pr̃ovet Joel mo verea moiso mara,

¹⁷‘God mo verea mara: Na pongi hitahu, a pa surei na Tanumeku na tamlohi tari, ale natumim peresi na venatumim la pa retimangovi, ale uluvoumim lamane la pa hite na hinau sohena mavuho a pa vujangia isara, ale vajiahamim a pa silera na mavuho;

¹⁸hin pongi atu sohena, a pa surei na Tanumeku isana noku slev lamane peresi na slev har̃ai, ale la pa retimangovi.

¹⁹Ale a pa vujangi na matamata mar̃urahi tavera aulu na masapa, ale matamata mata r̃ae, hapu peresi na asu hapu atano na varama,

²⁰ale alo i pa posi i mai i r̃or̃oha, majhi vitu i pa hahara sohena r̃ae, la pa pala tiroma hin rani atu Moli i pa mele mai, rani tavera atu i pa r̃uhur̃uhu jea.

²¹Ale rani matea i pa mai vara sava tamlohi la tau na nora rasu na hijan Moli la pa juri.’”

²²Ale Peter mo mele verea mara, “Tavtavuin Israel, ha tapurongo! Iesu mara Nazareth, tamlohi matea God mo taua na nahomim, mo lo vai na vavahinau mata suiha, matamata r̃uhur̃uhu tavera, peresi na matamata mar̃urahi sei God mo vaira na nahomim hin Iesu, sohen kamim mo isoiso ka levosahi mamahunia —

²³tamlohi atu, ka taua na lima tamlohi sasati, matan vara la pa vosaea na talopeilopei vara i mate, pani haratu mo pa lo usuri na r̃omr̃omi tavera non God, ale enia mo levosahia tiroma moiso vara i pa sohena.

²⁴Pani God mo sauteterahia, mo teria na liman mateia, matan mateia i pa sopo er̃i tauria na suihana.

²⁵Matan supe David mo retireti matana mara, ‘Tarea na lo hite Moli na nahoku, matan enia mo lo toho na matuaku, enau a pa sopo hisu.

²⁶Matan haratu mapuku mo avulahi, ale leoku mo uloulo na hasohasona! Epeku i pa toho na liman r̃omtoho,

²⁷matan engko God o pa sopo tinar̃ihia vara a toho na varama mata mateia, teni vara o tinar̃ihia vara nom tamlohi tapu i r̃ovo na taptap.

²⁸Engko ko vujangiau moiso na malele mata mauri; engko o pa vaiau a avulahi tavera na nahom.’

²⁹La vorai, na levosahi mamahunia vara a er̃i verea isamim, vara pua David mo mate ale la tavunia. Ale tapuna mo lo toho peresir̃a mo kakau nake.

³⁰Matan David enia pr̃ovet matea, mo levosahia vara God mo vai na retitauhi matea peresia, vara mahapina matea, i pa sakele na nona jara sakele mata supe,

³¹David mo hiteulia tiroma moiso, ale mo verea mara Kr̃isto i pa sauteterahi, ale vara i pa sopo taua vara i lo toho na varama mata mateia teni vara epena i r̃ovo.