Hechos 22:4-18

⁴Ja Jesús ikonhaibora, retenoxonbo en jato benakatitai, yatanxonbora benboboyabi ainbobo inonbi, en jato cárcel meran niakatitai.

⁵Jaskara jawékibora, ja *sacerdotebaon koshin, itan jatíbi ancianobaon onanke. Jabaonbira ja Damascoain ikana non kaibo judíoboiba jayá kati kirika ea menikana iki. Jatianra jainoa joi akaibo yatanhanan, neno Jerusalénhain bexon, jato castiganti shinannax ea jain kaa iki.

⁶Ikaxbi ea bain kaai iitainbi, moa Damascoain nokóti ochóma, bariapanshaman iketian, ratéresi naikanmeax kikin koshi joé eki paketa iki.

⁷Jaskáketian en mai tsakaa iki. Jainxon en ninkata iká iki: ‘Saulo, Saulo ¿Jaweatiki ea ramianoxon min benai?’ iki yoyo ikai.

⁸Jatian en yokata iki: ‘¿Miaki tsoa iki Ibó?’ akin. Jatian ea yoia iki: ‘Ea riki ja Nazarethainoa Jesús, ja ramianoxon min benai iitai’, akin.

⁹Jatian ja ebé boaibaonra, ja joé oinkana iki, ikaxbi ja ebé yoyo ikaiton joi ninkáyamakana iki.

¹⁰Jaskáketian en yokata iki: ‘¿Enki jawe atiki, Ibó?’ akin. Jatian non Ibon ea yoia iki: ‘Wenitax Damascoain karestanwe, jainxonra ja min ati jawékibo mia yoikanti iki’, akin.

¹¹Jatian ja joé penekan moa ea benche banémaa iketian, ebé boaibaon metsonhanan ea Damascoain bokana iki.

¹²Jain iká iki, westíora joni Ananías janeya, Moiséssen esé senenhai itan Dios akin shinannai joni. Ja iká iki, jatíbi ja Damascoain jakana judíobo jaki jakoni yoyo ikanai.

¹³Jatian Ananías ea oinni joá iki, joxon ea neskáakin yoia iki: ‘Saulo, moa jakiribi oinwe’, akin. Ea jaskáatianbi en moa oinna iki.

¹⁴Jainxon ea yoiribia iki: ‘Non reken papashokobaon Diossenra mia katóke, jawen keena keskábores ati min onannon ixon. Jainxon já ponté shinanya joni min oinnon ixon, itan já yoyo ikai joiboribi min ninkánon ixon.

¹⁵Miara iki kaai, ja min oinna itan min ninkatabo, jatíbi jonibo jaakiriakin jato yoiai.

¹⁶Jaskara iken, moa basiyamai, wenitax bautizameexon, ja non Ibo yokáwe, min ochabo mia soaxonon’, akin.

¹⁷Jatian iiti, Jerusalénhain joríbaax, Dios rabiti xobonko ea kaa iki orani. Jainxonra en westíora namá keska meran oinna iki.

¹⁸Enra non Ibo oinna iki, janra ea neskáakin yoia iki: ‘Ishton Jerusalénhainoax pikówe, nenonxonra mia ikonhayamai bokanai, ekiriakin min jato yoiaitian’, akin ea akai.