Godigo Sęba Tagala Palai Bidigo Po 22:4-18

⁴Tama polobadu eno Godigo gesi tųdu wali pabo we bidi tigidali eno dolai dao. Tama eno dwai sę mu elama, we bidi me badu eno aligabo bonogo augwali kęnama, eno augwali kalabus ilai dao.

⁵Tama te pris tobolu bidi me, te Juda lotu po wabo kaunsil bidi tigidali me, augwaligo dagebolo pusabo te yali sę po eno tibo po wabeo. Tama augwaligo enabolo pas me deli mawai dao. Eno te pas selasa pelama, te Damaskusde bidibo Juda hanibolo momainu eyu tama pali. Eno homugo ena Damaskusba pelama, Juda bidi hanigo ena konemainu, eno Jisasgo po wali pabo we bidi kalabus yainogo asai yaba homu emainu yali. Tama eno homugo augwali Jerusalemba odasa pelama, augwali moni sęgę me, dene me somainu tiwai dao.

⁶Tialima, ena Damaskusba pabo tųdu pelama, tama da Damaskus pąba sabalobadi, giliga tomode, tama moni sole ula gagawai dagaludu polo aselama, te ulago ena tigidali bologobea sali.

⁷Tama ena tǫba degasa pali. Tǫde munalubadi, eno bidi mego enabolo te po wabo odali, ‘Sol, Sol, nago ena magi baso dolobo sę ebawe?’

⁸Eno te po wei ponoyu, tama wali, ‘Genuai Bidi, nage dewe?’ wali. Tama agai enabolo te po wali, ‘Ena Nasaret bidi Jisas dao, ena nago te dolobo sę ebo bidi dao,’ wali.

⁹Tama ena dali pali bidi dabego te ula suali. Tiali goli, te bidi me deligo ena dali te po wabo augwaligo odobe.

¹⁰Tama eno aga te po hanalu wali, ‘Genuai Bidi, nago homugo ena megi magi egowe?’ Tama te Genuai Bidigo enabolo te po wali, ‘Nage hodaluama, Damaskus tomoba pao. Bidi me deligo nagebolo Godigo homugo nago yabo sę po tigidali ola mawaibao,’ wali.

¹¹Tialima, eno gedu tigidali halua sali. Magi basowe? Te genuai sole ula gagawai nai eno geduba dolama, eno gedu hulia selama, hǫsana pai dao. Tama ena dali pali bidi dabe augwaligo ena nogo tulama, Damaskus be nani tomoba odasa pali.”

¹²“Te Damaskus be nanide te bidi me deli bidali, agai nogi Ananaias. Te bidi Godibolo lotu po wabo da, da Juda dabego bomo yai po me agai wali pabo da, tama tigidali Juda te Damaskus tǫde bidali bidi dabe augwaligo homugo ‘Te dwagi yai bidi da,’ homu yai dao.

¹³Tialima, te bidi Ananaias aga ena pageba dolagaselama, agai ena dali te po wai, ‘Sol, nage dago ama dao. Megi nage usu elama, gedugo ma suao,’ te po wai. Tama te bidigo te po ola silibo si, eno gedu usu elama, aga eno suali.

¹⁴Agai enabolo te po wai. ‘Te God dago wąįgo lotu po wai dao, te da, agai homugo agai yabo sę tigidali nago konemainogo te yali dao. Agai sę ebo dwagi yai bidi nage sumainu homu eyu, nage sa muai dao. Tama agai homugo agai pedauwaligo po wabo nago odomainu yali.

¹⁵Tialima, Godigo homugo nage agai po pusabo bidi nigilali dao, tama nago tigidali we bidibolo nago gedugo suali nai me, te ologo odali po me pusagameo.

¹⁶Nage magi baso tonalubawe? Nage hodaluama, tama baptais sao. Nago dago Genuai Bidi i wao, tama agai nago dwai kolesaga yali sęgę tigidali sela sąmainu tama yao,’ Ananaiasgo enabolo te po wai,” Pol agai te po wali.

¹⁷Te bidi Pol agai te po me wali, te Jerusalem we bidibolo, “Te nosali ena Jerusalemba geasa asali. Tama ena te Moni Lotu Be tempel tomoba pelama, Godibolo po obadi, te sogo eno nai me deli suali, ma nade subo ąǫ yali.

¹⁸Tama eno suali ma, Genuai Bidigo ena dali po mibo suali. Tama agai te po tama wali, ‘Odao, nage te Jerusalem be nani megi polo taga pao. Nago e we bidibolo te enade po wabo si, augwaligo odogobeo.