Hechos 18:6-19

⁶Jato jaskáakabi yoitimakin Pablo jakonmaakinbo yoinkana iki. Jaskáakana moa jato jenebaini kaai onankanon ixon, jawen chopa peren ataanan neskáakin jato yoia iki: —Maton jaskaraninbira maton masá tenenoxiki, en mato imaa ikama. Rama peokootaxa ja judíoma joniboibabiribi ea kaai, jain jato joi yoii —akin.

⁷Jato jaskátaanan, ja *tsinkíti xobomeax pikókaini, Ticio Justo janeya jonin xobon kaa iki. Ja iká iki Diossakin shinanni jaa joniribi; jawen xobo iká iki jain tsinkíti xobo patax.

⁸Ja tsinkíti xobonkonia joni koshi iká iki Crispo. Ja joninra jawen xobon ikáboyaxonbi Cristo ikonhakana iki. Jatian ja Corintoainoa jonibaonribi ichaxon non Ibon joi ikonhakana iki. Jatianra jato bautizankana iki.

⁹Jatian westíora yaméra, namá keska meranxon non Ibon, Pablo neskáakin yoia iki: “Rakéyamawe, jeneyamakin nokon joi jato yoireswe.

¹⁰Eara miibetan iki, tsonbira mia jakonmaakin yoixon ramiati atipanyamake. Nato jemanra icha ea ikonhaabo jakanke”, akin.

¹¹Jaskáara Pablo westíora baritia wetsa iti pochínikon jain iká iki, jato Diossen joi yoii.

¹²Ikaxbi Galión ja Acaya main joni koshi inontianra, judíobaon tsinkíxon Pablo jakonmaakana iki. Jaskáxon jakonmaakin yoinoxon Galiónhiba bokana iki.

¹³Jain boxon Galión neskáakin yoikana iki: —Nato joninra akai, jaton akai keskáribiakin Dios rabikanon ixon, jatíbi jato axeakin, ja non esekan jaskáati yoiaimabi —akin.

¹⁴Jaskákanketian moa Pablon jato yoii ikaibi, Galiónmanpari neskáakin jato yoia iki: —Nato jonin jakonmaira aká iketianra en mato axonkeanke.

¹⁵Ikaxbi matora ja maton onanna join paranan, jainoax janebaon paranan, itan ja maton esekan parananbores, ikí iitai. Jaskara joibora maton ebé benxoati yamake. Matonbikaya, mato jaskataibo betan benxoakanwe —akin.

¹⁶Jaskáaxon ja joi benxoati xobonkonia jato pikoa iki.

¹⁷Jatian Sóstenes iká iki ja tsinkíti xobomea jaton koshi. Ja joni jatíxonbi yataanan, joni koshi Galión bebonxonbi rishkionkana iki. Jainxonra abákanon ixon Galiónman jato oinresa iki.

¹⁸Jatian Pablo basichaapari, Corintoainbi iká iki. Jain iitibi moa wetsanko kakin, ja joi akaibo yoitaanan, moa Siriain kaai wapóronin naneta iki. Kaitian Priscila betan Aquilan chibana iki. Kaax Cencreas ikain nokotax, wetsanko kaai tekitamabi, jaskánoxon Dios yoia ikax, ja senenhai Pablo maxtani maxkoroota iki.

¹⁹Jatian boax, Efesoain nokóxon, ja tsinkíti xobonko jikii kakin, Pablon ja Priscila betan Aquila potabaina iki. Jatian moa jikiax, jain tsinkíkana judíobo betan yoyo ika iki.