Hechos 17:12-21

¹²Lik e kꞌi chike waꞌ xkikoj rubꞌiꞌ ri Cristo. Yey chike ri e aj Grecia, e kꞌi xkikoj rubꞌiꞌ ri Cristo, na xew ta achijabꞌ ma chikixoꞌl e kꞌo ixoqibꞌ lik kꞌo kiwach.

¹³Echiriꞌ raj judiꞌabꞌ e kꞌo Tesalónica xketaꞌmaj katajin ri Pablo che utzijoxik ri Utzilaj Tzij re ri Dios pa ri tinamit Berea, xebꞌek chilaꞌ y jelaꞌ xeꞌkiꞌana chike rukꞌiyal winaq pachaꞌ ri kiꞌanom Tesalónica, xebꞌekichꞌiꞌo chaꞌ kakijeq ketukukik.

¹⁴Ewi ri hermanos na jampatana xkitaq bꞌi ri Pablo chaꞌ keꞌek chuchiꞌ ri mar y kukoj bꞌi juna barco; yey ri Silas y ri Timoteo xekanaj chiriꞌ Berea.

¹⁵E kꞌo kꞌu jujun xkachbꞌilaj bꞌi ri Pablo y xkikꞌam bꞌi chupa ri tinamit Atenas. Chilaꞌ ri Pablo xubꞌiꞌij chike ri aj Berea: «Chibꞌiꞌij chike ri Silas y ri Timoteo kakilij loq chaꞌ kakiriq kibꞌ wukꞌ wara.» Y echiriꞌ xetzelej Berea, xkibꞌiꞌij waꞌ chike ri Silas y ri Timoteo.

¹⁶Xaloqꞌ kꞌu ri Pablo eroyeꞌem ri Silas y ri Timoteo pa ri tinamit Atenas, rire lik xuꞌan kꞌax ranimaꞌ che echiriꞌ xrilo kiyaꞌom kibꞌ ri tinamit che kiloqꞌnimaxik ukꞌiyal tiox.

¹⁷Ewi pa ri sinagoga xujeq kachꞌaꞌt kukꞌ ri e aj judiꞌabꞌ y ri na e ta aj judiꞌabꞌ, ri lik kakiloqꞌoj uqꞌij ri Dios. Yey jelaꞌ xuꞌan ronoje qꞌij chwa ri kꞌaybꞌal kukꞌ konoje ri kakimol kibꞌ chiriꞌ.

¹⁸Chikixoꞌl rike e kꞌo jujun achijabꞌ kabꞌiꞌx chike “e aj naꞌoj”, waꞌ e kukꞌil raj epicúreos y raj estóicos. Rike xkichapalaꞌ kibꞌ rukꞌ ri Pablo puwi ri kukꞌutu. Jujun kakibꞌiꞌij: «¿Saꞌ ri karaj kubꞌiꞌij wa werewotel re chꞌaꞌtem?» kechaꞌ. Yey jujun chik kakibꞌiꞌij: «Waꞌ waꞌchi pachaꞌ tzijonel ke jujun chik dios e aj naj» kechaꞌ. Xkibꞌiꞌij waꞌ ma ri Pablo kutzijoj ri Utzilaj Tzij re ri Jesús chike y katzijon puwi ri kꞌastajibꞌal.

¹⁹Xkikꞌam kꞌu bꞌi ri Pablo y xeꞌkiyaꞌa pa ri luwar Areópago kecha che, pa kakimol wi kibꞌ rachijabꞌ lik kꞌo kinaꞌoj. Y jewaꞌ xkibꞌiꞌij che: «Riꞌoj kaqaj kaqetaꞌmaj saꞌ wa kꞌakꞌ kꞌutunik kaꞌan rilal,

²⁰ma lik junwi ri kꞌutunik katzijoj la chiqawach riꞌoj. Kaqaj kꞌut kaqamaj usukꞌ saꞌ keꞌelawi ri kakꞌut la» xechaꞌ.

²¹Jelaꞌ xkibꞌiꞌij ma konoje raj Atenas y ri e aj naj ejeqel chiriꞌ, xew bꞌenaq kikꞌuꞌx che taq ri kakito y kechꞌaꞌt chwi taq kꞌakꞌ naꞌoj katajin utayik.