Hechos 16:2-40

²Jesústa piantuz Listra pɨpulura uztuzkas Iconio pɨpulura uztuzkas us akwa wat kwinta kiara.

³Pablone Timoteora kanpazha kizta. Judío awa sun sura uzara akwa, Pablone paiña aya tɨtnin kit circuncisión kira. Uspane Timoteowa papihsh Griego awa azi pian. Sun Griego awane sun circuncisión kitchi.

⁴Wan pɨpulura pɨnamtasmin, uspane Jesústa piantuza ɨnintaruz nɨjkularɨt aizpa kamtanara. Jerusalén pɨpuluras ɨlapa ɨnintuz kaizara aizpa kamtanara, wan wat mɨanapa.

⁵Sunkanane wanmakturuzne an nil kiat kit an wat nɨjkulara. Jesústa piantuzne pailta payu an akkwan wanmakkamɨzta.

⁶Sɨnam Izpulne Pablorakas paiña kanpamtuzakas Asia sura Dios pit kainana ɨninnarachi. Frigia suwarakas Galacia suwarakas pɨntawane,

⁷uspane Misia sumamin pianaara. Bitinia sura napna minñakane, Jesúspa Izpulne usparuza napninnarachi.

⁸Suasne Misia suwara pɨnat kit Troas pɨpulura pimara kihshara.

⁹Suane Pablone amtawara chiwazha kainkizpara. Maza Macedonia suras awane ussa izpanta. Usne kun kit Pablora paikwat kit kaizta: “Macedonia sura anka, aumɨza kiwainnapa,” kizta.

¹⁰Pablo kainkizparawane, nane, Lucasne, Pablokasa wan watsaiznash, Macedonia sura ɨn. Aune Dios aumɨza ɨninta pianaiznash, Dios watsal pit kainanana.

¹¹Aune Troaskis kanuara nil ɨaiznash, Samotraciara pi paizka sura piannan. Tɨlawara Neápolis pɨpulura pianaiznash.

¹²Suas Filipos pɨpulura ɨaiznash. An pɨpulune Macedonia sukin anza katsa azi. Akkwan Roma pɨpulukis awaruzne sua uzara. Suane akkwan payuchikimain tumanash.

¹³Aune kwaizkulmu payu pɨpulukis pianamal puziznash pirakima, awa wanmakmukin piannan. Sua awane Diosta paikumkin ɨara. Sua aune uz kit ashampa wanmaktɨttuza Dios watsal pit kwinta kianash.

¹⁴Maza ashampane, usparuztas Lidia muntɨt. Usne Tiatira pɨpulukis at kit sam ishtam pĩn paininmika azi. Sun ashampane Diosta wakpuj wain kit paikwara. Uspa kaizara aizpa mɨra. Anpatne ussa kiwainta, Pablo kamta aizpa nɨjkulnapa.

¹⁵Sun ashampakas paiña kwalkas munnarawane, usne aumɨza paikwat kit kaizpailnash: —Nawa nil Anpatta nɨjkultamika ish minñamtune, ap yalta uznarain, kiznara. Usne aumɨza nukkulninpailnash.

¹⁶Maza payune Diosta paikumkin au ɨamtuasmin, aune saliz piztɨt kiwaim ashampara wanmalaiznash. Salizne ussa kiwainta, iznakulan. Us iznakulamtu akwa, paiña anpattuzne akkwan pial kana kiara.

¹⁷An nimpihsh ashampane Pablorakas aumɨzakas kanpat kit kwian kit saliz akwa ka kaizta: —An ampuruzne an katsa Diosta kiwainñamtu. Uspane usparuza sun pit kainanamɨztu, Dios uruza watsat mɨlnanapa, kizta.

¹⁸Nimpihsh ashampane sunkana kira akkwan payukima. Piztɨt ashampa ussa naizninta akwa, minpara Pablone salizta kaizta: —Jesús nawa kiwaintu akwa, nane nua puznintus, ashamparas puznapa. Sun urain salizne ustas tɨwij ɨra.

¹⁹Ashampara pamikaruzne ka minñat kit nɨjkulara: “Saliz puztɨt akwa, aune an ashampakasa an pial kana kisachimakpas.” Sun minñarawane, uspane Pablorakas Silastakas pizat kit pɨpulu ɨnintuza nankin mɨlara.

²⁰Uspane usparuza katsa mikwawakin karat kit kaizara: —An awaruzne aumɨza kiwainamtuchi. Auruzpain pilchapuzamtu. Aumɨza paimpa naiyamtu. An ampuruzne Judío awa mai.

²¹Aune Roma awa makpas. Aune uspa kamtara aizpa sapsachimakpas. Uspa kamtara aizpa kisachimakpas.

²²Suasne awane usparuza aim kiamɨzta. Katsa mikwane pĩn uknapa ɨninnara, tɨkasa pianna.

²³Kwisha aim kiarawane, kajchira sɨppat kit kajchi izmumikasha usparuza kwisha wat izanapa ɨninta.

²⁴Sunkana kizkane, kajchi izmumikane usparuza anza ayukmal sɨpnat kit mittɨ tɨkulta nukninta.

²⁵Kakwamta panakima Pablokas Silaskas Diosta paikwamtuaiyasmin, Diosta kanta kiztuaiyasmin, mamaz sɨptɨt waruzne mɨara.

²⁶Suasne masain su ulmu amɨzta. Kajchi yal saktɨ kwisha tɨnta ulmalta. Sun urain wan pɨjta azkulara. Wan cadena kuhtɨttuz sɨpnaruza chɨhtkul kit taizara.

²⁷Sun kirɨkane, kajchi izmumikane sun kit aizpa izkulta. Kajchi pɨjta chɨhtkulara iztawane, usne paiña mashti pizta, usmin piantana. Maza sɨptɨtmika kajchiras puzkane, paiña mikwane, ussa kajchi izmumikasha, piantashina. Usne wan sɨptɨttuz kajchira waruza chɨhtaraka minta.

²⁸Pablone ussa kwianta: —Nua kwail kimun. Wan akki puramakpas.

²⁹Suasne izmumikane impil paikwat kit kajchira ayukta ãĩn ɨt kit napta. Ul kit ishkumtuasmin, Pablo tukinkas Silas tukinkas wakpuj wainta.

³⁰Usne usparuza tas ukkanat kit mɨmara: —Anpattuz. ¿Chima kinpai, Dios nawa watsat mɨlnapa?

³¹Uspane sɨnkailta: —Anpat Jesucristora nijkultane, Diosne nua watsat mɨlnazi. Up kwaltakas watsat mɨlnanazi, kizara.

³²Pablokas Silaskas Anpatpa pit ussakas paiña yalkin uztuzakas kaizpailta.

³³Sun amtain izmumikane usparuza mamaz pɨjtamal mɨlnara, aim kirɨt kitna. Suasne uspane ussakas paiña kwaltakas munnanara.

³⁴Kwiztane paiña yalta mɨlnat kit kumira kwinara. Uskas paiña kwaltuzkas kwisha wat kulara, Diosta nɨjkulara akwa.

³⁵Tɨlawain tɨlawara mikwane policíaruza kajchi izmumikasha ɨninnara, paasta chɨhtnanapa.

³⁶Suasne kajchi izmumikane Pablora ɨt kit kaizta: —Mikwane nawa ɨninziish, umɨza chɨhtnapa. Une puzshinai, puñain ɨilnapa.

³⁷Pablone policíaruza kaiznara: —Mikwane aumɨza wan iztukin tɨkasa piannara. Au Roma pɨpulukis awa akwa, uspane amɨza sunkana kinchi. Aumɨza kwail kizarachasmin, uspane aumɨza kajchira sɨpparɨt. Mane uspane puintain aumɨza chɨhtashimtu. Sunkana kiasachi. Uspain anpa, aumɨza puzninnapa, kiznara.

³⁸Policíane mikwaruza sun kainanara. Roma pɨpulukis awara ilta akwa, uspane ishkuat

³⁹kit Pablorakas Silastakas ɨara, sun kwail kiarɨt kizna. Suasne kajchira aat kit usparuza paikwaara: “Pɨpulukis ɨrain.”

⁴⁰Kajchiras puzpailtawane, Pablokas Silaskas Lidiawa yalta ɨilta. Izmuruza iznarawane, wantuza wat kiwaintawane, pɨpulukis puz kit ɨilta.