2Listera â Ikonioŋ haeonec miti mamana jaŋe Timoteore fuŋne muafeckehuc Paulo âzâcnembiŋ.
3Âzâcnepie Paulo e jume ju eocte âzâcnewec. Eme mâreŋ ira Judaŋic jurambiŋ jaŋe motecte mamac e Grikŋic i mana‐fârembiŋ. Irec Paulozi jaŋere erâ sahacnao Mosere ma bawec.
4Eme hae sâc rahuc, aposolo â micne Jerusalem haeo mumupaŋ mumbiŋ, i reŋkeniŋte opâ ruac jaza rapic.
5Iŋuc ehuc gie bapire Jesure kikefuŋ jaŋere mamanasiŋ ɋârâŋkewec â ʒoaŋ sâc qâpuczi jaŋerao ra heacmârec ekupie bocjaha embiŋ.
6Eme Asia mâreŋko miti murazo mupie Tiri Mârozi hecke‐jareme Frigia â Galatia mâreŋ fotâcnehuc rambiŋ.
7Raku Misia mâreŋ qaŋeŋnao fisirâ ŋifec bâŋorierâ Bitinia mâreŋko razo mupie Jesure Mârozi iŋuc jaha mi mana‐jarewec.
8Irec jaŋe Misia mâreŋ qacnerâ raku hâwecmecko Troa haeo fisimbiŋ.
9Ira fisirâ ŋafeo Paulo e maŋnezi ŋerisieme wiac kecʒiŋuc honewec: Makedonia ŋic moczi erao fuarâ domahuc mu wâsic ecnehuc ʒiŋuc âzâcnewec: “Go Makedonia mâreŋko fârâ bafic‐nâpozemec.”
10Paulo e wiac i honeme ʒiŋuc mumbeŋ: “Anutu e Makedonia mâreŋko ra Biŋebiaŋ jazanaŋte munârekac hâcne.” Iŋuc murâ izia ranaŋte ʒawiembeŋ.
11Ʒawierâ wokeo ferâ Troa hae beherâ fofotâc raku Samotrake nucko fisimbeŋ. Hae fureme irecnec raku Neapoli haeo fisimbeŋ.
12Ira wokeonec waharâ raku Filipi haeo fisimbeŋ. I Makedonia mâreŋ irec hae sâko moc, Romaŋic jaŋe hae rune erâ jumbiŋ. Hae ira ʒoaŋ gâcnao jukupene
13sabata hombaŋ maickeme hae upeo opâ moc fowec ira ʒiŋuc muhuc humbeŋ: “Judaŋic numueŋgopieŋ irec toma opâo moc fokacko hurâ honenaŋ.” Iŋuc muhuc hurâ ŋokac tumaŋnerâ juhapie bâfuac‐joparâ waha ŋehuc miti jazambeŋ.
14Eme jaŋere guruo ŋokac moczi Anutu araŋ bacnehuc juwec, ʒâŋene Lidia, e qoruc situâc rune, Tiatira haeonec. Ŋokac e hâcne Wofuŋzi maŋne bâuŋtome Paulole dâŋ hazec hâric manawec.
15Erâ e jahacne â wiacfâc‐ticne Miti Opâ ruarâ ʒiŋuc nâzâwec: “Ŋoŋe honecnupie Wofuŋte biŋe ekopacko nore ficko wefurâ ŋeŋe juju enʒepieŋ.” Iŋuc muhuc hota‐nâreme fembeŋ.
16Dameŋ mocko nunumure tomao huhapene kiŋaŋ naru moczi bâfuac‐nâpowec. Naru e faŋfaŋ demoŋ‐ticnehec juhuc ŋic jaŋere fuŋne mufua jujec, ehuc rufâc‐ticne moneŋ mafa bocjaha hure‐jare jujec.
17Eme eki hâcne bâfuac‐nâporâ Paulo â nâŋe bâjâpec‐nâpohuc dâŋ wiwira kecʒiŋuc ewec: “Ŋic kecʒizi Anutu femicne sâko ere kiŋaŋ qaqa juhuc biaŋkeniŋte hata muʒâwe‐ŋareeŋgopieŋ.”
18Dâŋ wiwira i sasawa ʒoaŋne ʒoaŋne enârekume Paulo e irec takickeme forisierâ demoŋ ʒiŋuc âzâcnewec: “No Jesu Kristo ere micte gazape ŋokacte maŋkonec wefu rac.” Iŋuc mume izia wefurâ rawec.
19Eme naru rufâc‐ticne jaŋe moneŋ mafa fufua‐jeŋic arictac eme manarâ Paulo â Sila rocjofarâ
20hae ʒâʒâŋiŋko kia jaŋerao fârec‐jofa rarâ qoric‐jofahuc ʒiŋuc mumbiŋ: “Jahe Judaŋiczi hae‐nâŋecko warerâ maŋbâiŋ enârekopirec,
21ehuc mâsi qâreŋ furune, Romaŋiczi mi eene â mi babajune, i hâcne bâfuakopirec.”
22Eme ŋic guru sâko domambiŋ jaŋe aaric mana‐jactehuc râsi ʒâŋe honec‐jofapie kiazi ŋaqi‐jekic heuc qâunuckerâ mume kâcbiŋzi jofambiŋ.
23Kâcbiŋzi mâretec qâtâc bâtâc‐jofarâ kâpâcwâru ficko râec‐jofarâ soŋaŋ e motâc basanaŋkerâ aimuŋ soŋaŋ‐jofaocte âzâcnembiŋ.
24Âzâcnepie kâpâcwâru fic maŋne ʒâʒâŋiŋko râec‐jofarâ kike‐jekic jâc fifitacko râeme kindeŋneme fopic.
25Ŋafe ʒâʒâŋiŋko Paulo â Sila jahe Anutu gae nunumu ecnehuc muteŋkepic. Epire kâpâcwâru ŋic gâcnezi micfânâŋ‐jekic manambiŋ.
26Ehame homeŋ sâko ututuŋ bame kâpâcwâru fic sâpene qiriŋ qame motâc aŋke‐fârewec â ŋic sasawa kâpâcwâru‐jeŋic ŋeŋgoroŋkewec.
27Eme kâpâcwâru ficsoŋaŋzi guŋkonec mana ɋâɋârerâ faharerâ motâc aaŋ doma‐fâreme honerâ, kâpâcwâru ŋic wise‐fârembieŋ muhuc sâqe‐ticne becsahackonec unuckerâ sahac‐ticne âeckezo ewec.
28Iŋuc ezo eme Paulozi owackerâ muwec, “Sahacge mi sipirickec, nâŋe furu jaha ŋeŋgopeneŋ.”
29Eme soŋaŋ e lambere mume wiacfâcne jaŋe râcnepie ficmaŋko ferâ ɋarac ɋarac qahuc Paulo â Sila jahere kikefuŋko fodapewec.
30Erâ ficmaŋkonec jowacjofa waharâ wio‐jacterâ muwec, “Ŋicbomboŋ jahec‐nane, no weniŋuc erâ biaŋkepemu?”
31Eme jahe ʒiŋuc âzâcnepic: “Wofuŋ Jesu Kristo manasiŋkehuc go â wiacfâcge biaŋkeniŋmu.”
32Iŋuc murâ e â wiacfâcne Wofuŋte dâŋ jazapic.
33Jazapire soŋaŋzi ŋafeoa hefârec‐jofarâ kâcbiŋ micrâfâcne ʒure‐jactewec. Erâ mume e jahacne â wiacfâcne Miti Opâ rua‐jarepic.
34Eme e jahacne ficmaŋko râec‐jofarâ mume nânâ rike bâmoc ejactembiŋ. Eme e â wiacfâcne Anuture biŋe embiŋte bujeŋic biaŋkewec.
35Hae fureme kia jaŋe polisman ʒiŋuc muhuc jaza sorec embiŋ: “Ŋic jahec firuec‐jofazo.”
36Eme soŋaŋzi manarâ Paulo ʒiŋuc âzâcnewec: “No sorec‐ŋofape ranicte kia jaŋe dâŋ râepie warekac, irec ŋohe waha rarâ wamao juzepirec.”
37Mume Paulozi ʒiŋuc âzâcnewec: “Jaŋe Romaŋic guruonec fuakicne nâhe dâŋficko mi râec‐nâfohuc ŋichofao qâtâc bâtâc‐nâforâ kâpâcwâru ficko râec‐nâfombieŋ. Eme ʒi wemocte kamicnea sorec‐nâfoŋgopieŋ? Iŋuc aricne, jaŋac ware jowac‐nâfopie razeperec.”
38Paulo e dâŋ iŋuc mume polisman jaŋe risie rarâ kia jazapie jaŋe ŋic jahec Romaŋic guruo fuakicne biŋe i manarâ fâfârembiŋ.
39Fâfârerâ ŋic jaherao warerâ mu bâmiriŋ ejacterâ kâpâcwâru fickonec jowac‐jofa waharâ hae‐jeŋic beherâ ranicte jasambiŋ.
40Eme jahe kâpâcwâru fickonec waharâ Lidia ere ficko rarâ Jesure kikefuŋ honec‐joparâ mu sawaŋ ejarerâ rapic.
Aposolo Jaŋere Binaŋ 16
Aposolo Jaŋere Binaŋ 16:2-40