Hechos 15:5-20

⁵Niꞌr gulayasëꞌ laꞌquëꞌ bönniꞌ gdauꞌ fariseo chtaꞌyejlëꞌë Cristo, taꞌnë́ꞌ: ―Run bayúdx grugu lu xpë́laꞌquëꞌ bönniꞌ gzaꞌa naꞌ taꞌyejlëꞌëꞌë Cristo, len gna béꞌiruꞌ lequëꞌ lunëꞌ ca rna bëꞌ zxba queëꞌ Moisés.

⁶Niꞌr guludubëꞌ gbaz nasölëꞌë Cristo len bönniꞌ gul tun chiꞌë bunách queëꞌ, quië laꞌbequi xbeynëꞌ lë ni rac.

⁷Gdöd gluꞌë zian didzaꞌ, gzuinëꞌ Pedro len gudxëꞌ lequëꞌ: ―Böchaꞌa. Nö́ziczliꞌ ca guc dza niꞌtë, Dios gröczëꞌ nedaꞌ quië gunaꞌ lban laugac bunách gzaꞌa quië laꞌyönnëꞌ didzaꞌ dxiꞌa len laꞌyejlëꞌë Cristo.

⁸Dios, Nu nunbëꞌcz le yuꞌu icj ládxiꞌdauꞌgac bunách, buzóëꞌ le nac bëꞌ runëꞌ lequëꞌ ba laꞌn, le bsölëꞌë quequëꞌ Dios Böꞌ Laꞌy, lëz ca bsölëꞌë queëruꞌ Lëꞌ.

⁹Cutu butsë́ꞌë ca benëꞌ quequëꞌ len queëruꞌ, atiꞌ lëzcaꞌ lequëꞌ bunëꞌ dxiꞌa icj ládxiꞌdauꞌquëꞌ le taꞌyejlëꞌë Cristo.

¹⁰Naꞌa, ¿bizx quië run leyliꞌ‑nëꞌ Dios, ruspágaꞌliꞌ yuaꞌ xyengac böchiꞌ lzaꞌruꞌ? Yuaꞌ ni, le nac le taꞌná bëꞌ zxba queëꞌ Moisés, cutu guc guaꞌruꞌ rëꞌu, len cutu guc luꞌë xuz xtauꞌruꞌ.

¹¹Rëꞌu ni, réjlëꞌruꞌ nularuꞌ niꞌa qui le buzáꞌ ladxëꞌë queëruꞌ Xanruꞌ Jesús, len lëz ca nularuꞌ rëꞌu, lulë́ꞌ caꞌ lequëꞌ.

¹²Catiꞌ budx bëꞌë didzaꞌ ni Pedro, gulacuꞌë dxiz yúguꞌtëꞌ, atiꞌ guluzë́ nagquëꞌ didzaꞌ gluꞌë Bernabé len Pablo, gulaguíxjöiꞌnëꞌ lequëꞌ le tac bëꞌ len le tun ga tuꞌbani bunách, yuguꞌ le benëꞌ Dios lu naꞌquëꞌ ga nacuáꞌ bunách gzaꞌa.

¹³Catiꞌ budx gluꞌë didzaꞌ ni Bernabé len Pablo, bubiꞌë didzaꞌ Jacobo, gnëꞌ: ―Böchaꞌa. Gul‑zë́ nagliꞌ le gyëpaꞌ lbiꞌiliꞌ.

¹⁴Chgdíxjöiꞌcznëꞌ rëꞌu Simón Pedro ca benëꞌ Dios, buluꞌë lahui yöl‑laꞌ huac queëꞌ le ziꞌal lzu laugac bunách gzaꞌa quië bubijëꞌ quizi queëꞌ bunách nútsaꞌgac ladjquëꞌ.

¹⁵Ca nac lë ni rajlözgac xtídzaꞌquëꞌ bönniꞌ gluꞌë didzaꞌ uláz queëꞌ Dios, ca naꞌ nayúj lu guich laꞌy, rna:

¹⁶Dza töd lë ni huödaꞌ len uchisaꞌ Nu gna bëꞌ, Tsaziëꞌ xlatjëꞌ David, Gunaꞌ ca run nu ruchís tu yuꞌu naguíndj. Uchisaꞌ caꞌ bunách laꞌcuáꞌ lidxëꞌ, nup nagaꞌngac, Gunaꞌ ca run nu ruchís tu zöꞌö gul. Cni uchisaꞌ le gna bëꞌë David

¹⁷Quië luguílj Xanruꞌ yezicaꞌ bunách. Luguílj Lëꞌ bunách gzaꞌa, Atiꞌ siꞌ lagac: bunách queëꞌ Dios.

¹⁸Cni rnëꞌ Xanruꞌ, Nu naꞌ dza niꞌtë ben ga nac bëꞌ yúguꞌtë lë ni.

¹⁹’Qui lë ni naꞌ runi nedaꞌ cutu ral‑laꞌ gun níguiruꞌ bunách gzaꞌa, nup tuꞌhuöác queëꞌ Dios.

²⁰Ral‑laꞌ uzujruꞌ quequëꞌ lu guich quië lucaꞌnëꞌ yuguꞌ le cural‑laꞌ lahuëꞌ, le nadö́d laugac bdauꞌ guiöj bdauꞌ yag, len cui lunëꞌ le cunác, len cui lahuëꞌ xpë́laꞌcbaꞌ böaꞌ guixiꞌ cunarujcbaꞌ rön, len cui lahuëꞌ xchönbaꞌ nútiꞌtëz böaꞌ guixiꞌ.