16Të₁lia'₂ jaun₂, caun₂ i₁të₅₄ bá₄ Pe₄ o₄'né₄ i₁chéin'₄. Jme₁ca₂niá₃, ca₂jɨ́in₂ Pe₄, jaun₂ ca₂i₃gó'₃ dsɨ́₅.
17La₁ jaun₂ ca₂jmo₃ 'éi₂ léi₄ quian'₅₄ mɨ₂gu₂ a₂ca₂juá'₂ a₂jmo₃ dsa₂ tei₄. Jaun₂ ca₂dsia₃ 'a₂ lia'₂ ca₂lë₃ ca₂jmo₃ Te₁gui'₅₄ a₂ca₂i₁dsei₂₃ 'né₅ 'má₃. Jaun₂ ca₂juá'₂: ―O₂dsia₄ 'nia'₂ o₂chei'₅₄ Jacobo, ca₂le₃jɨ́n₃ guë́₄ rɨn'₅₄ jniog₄. Jaun₂ ca₂o₃'ɨ́in₃ táng₃, ca₂ŋó₃ ja₁siá'₂.
18Jme₁jnia₃ jaun₂, ca₂tón'₂ 'lióg₂ go₂'i₃, ia₁ tsá₃ ŋi₅ 'e₂ ca₂lë₃ quian'₅₄ Pe₄.
19Jaun₂ Herodes ca₂chein₃ dsa₂ dsɨ₃'niog'₂. La₁ia₁ tsá₃ ma₃ca₂dsáu'₂. Jaun₂ jme₁ca₂cáun₂ jág₁ dsau₅ quió'₅ 'lióg₂ i₂jme₁jmo₅ 'í₁ 'éi₂, ca₂jmo₃ 'éi'₃ ca₂jme₃dsiog₅ dsa₂. Cang₂ jaun₂, ca₂o₃'ɨ́n₃ Herodes 'uë₃ Judea, jaun₂ ca₂ŋó₃ ca₂i₁gua₂ Cesarea.
20Jme₁'ne₂ Herodes quian'₅₄ dsa₂ i₂jme₁tián'₄ Tiro quian'₅₄ Sidón. La₁ dsa₂ 'éi₂ në́₃ ca₂jmo₃ caun₂ jág₁ ca₂i₁lein₅₄ ca₂jme₁jniai₂₃ ne₅₄. Ca₂jme₃'uáin₂ dsɨ́₅ jan₂ i₂chen₂ Blasto a₂jmo₃ dse₃ dsɨ́₅. Jme₁lɨ́n₄ Blasto jan₂ dsɨ₂tan₅₄ juɨn'₂ quián₅ Rag₅₄ Herodes. Ca₂nau₂ ne₄ jág₁, ca₂mɨ₃ dsian₅ mɨ'₅₄. Ia₁ juɨg₂ go₄ rag₅₄ bá₄ jme₁rau₂ a₂guë́'₅ dsa₂ chan₂ Tiro quian'₅₄ Sidón.
21Herodes në́₃ ca₂të₃, ca₂tióng₃ caun₂ jmɨg₄ a₂chi₁jŋiog₂₃ dsi₁lén₂ dsa₂. Jme₁ca₂të́₂ jmɨg₄ jaun₂, ca₂quɨ́'₂ Herodes tsɨn'₅₄ a₂rë₂lɨin₅₄ a₂lɨ́in₅ rag₅₄, jaun₂ ca₂i₁gua₂ ne₄ ne₄ta₁ quió'₅, jaun₂ ca₂ton₃ jág₁.
22Jaun₂ ca₂jme₃lióg₃ dsa₂ juɨg₂ qui₂ca₂guió'₃ ca₂juá'₂: ―¡I₂juá'₂ në₅, on₃jua'₅₄ dsa₂ mɨ₂güɨ́g₃! Jan₂ diú₄ bá₄ në₅.
23Co₂tan₅₄ dsɨ₂juɨ₅ le₂jaun₂ ca₂jmo₃ ángel i₂chen₄ quián₅ Te₁gui'₅₄ a₂ca₂rë₃dso'₅₄ Herodes, ia₁ ca₂cuë₃ jmɨg₄ a₂jme₃juag'₂ dsa₂ 'ŋiog₅, 'nió'₄ a₂jme₁jme₃juɨin'₂ Diú₄. Ca₂join₃ bá₄ jaun₂ në́₃, ca₂dsó'₃ i₁ja'₅₄ quió'₅.
HECHOS 12
HECHOS 12:16-23