Hebreos 6

1

2

3

4

5

6

7

8

9

10

11

12

13

¹Inchawei ke ne nørrøramnegatig ambubig amgun, tru Cristoimburabig ke srøsrø pølbasra kusrenanig købelane nøørø wemalsrøppa pønsra. Incha tru pølbasra kusrenaniilø: tru kaig marmønrrab isua møramigwanba, kwamigumay srua inrrabig kaig mariilan elachib amrruigwanba, isubigwan Tiusweinug pasra tøgagúigwanba, treeg kusrenanigutø katøle truigwandøwein kusreptø warømugun,

²katø pitøga chishmarøb kømeelan kusrenanigwanba, Tiuswei ureemeraim pala tasiimeran estsaramigwanba, kwabelø katøle øsiiramigwanba, kaig marimburø tru managatig maig kønrrabigwan kørrømaramigwanba, katøle truilandøweih, truilandøwei waminchib.

³Pøs Tius treeg kønrrain købene, trube, nørrøram maywan amrrab inchab.

⁴Kaguende yandø tru Tiuswei tørtrawa tør mariilø, srømbalasrøngurri ketigwan tab kui mørøb utarmera, katø Espíritu Santoiwan utarmera,

⁵katø Tiuswei wamyu tabigwanba, tru wendøsrø attrabigu maramburab marøbelø truilanba nømbe purø tab kui mørøb inchibelø købendø,

⁶Criston kerriguwan wendøbasra katøle kørrøbene, nømune katøyuube nømui kaig mariilan isua møra, Tiusweimay lliranrrai indamibe kaimamdiig køn, kaguende nømdøwei Tiuswei Nusrkawan katøle kurusyu mesrøb lataig maramba, misaamera nune kan chigucha kømíig kui lataig inchib ka indzatø mørtrai maramba inchibelø kua.

⁷Kaguende sre puimørig tru pirø sre piwan muchibiima tru kwallib melabelai tab kønrrai mamig tusrchig kønrrai tranene, Tiusbe tru pirøzhigwane mayanguen tab inchun.

⁸Inchen kal tusrmerabah, ka kaig kaubatø misrøb pirø tru ellmarig chi misrmíibe, ke kaig puindø mørtrabig køn. Incha yandø srabebe parrig kønrrun.

⁹Pøs nambe øyamay wamindindøgucha, nai undaarailø, ñimuimburappe mas tabig munig pasrain kui nambe asha pønrrer, tru kaigyugurri wesraig pønrrabigugurri arrubig.

¹⁰Pøs kaguende Tiusbe kalø marøptiig kømøtø, sølgandø tabig køppe, ñim chigøben marigwan pesannanrrab kømøwei, katø nui munchiwan ñim undaatøga kenamarigwan pesannanrrab kømøwein køn, Tiuswei misaameran ñim purugua, katøgucha purugubig purugub kuimba.

¹¹Ñim møitøgucha maig marøb melaigwan srabegatig treetø treetø kenamarøb melaimbemab isuer, tru ñim Cristoba tørguegwalmabigu purrønrrab isua munig melaigwan ke treeg kømnegatikke.

¹²Pøs nambe ñimun pøilø misrtrain kømøtø, tru nømui isubigwan Jesucristoinug pasra tøgagúitøgaba, tammay melabig melaitøgaba Tius tru trannrrab kørrømisrigwan utab pønrrabelø lataitøwein kønrrai inder.

¹³Kaguende Tius tru Abrahamwan ‘øyeeg martrab’ cha kørrømisrøb urasma, katøgan mas nuigwei merrab ‘¡katø! marmø kømø, nabe maramønrrun’ cha, trendamdiig mu katøgan kaabene, pøs Tiusbe nøasiitøwei pasramisra,

¹⁴trendaig købig køn: “Isa kømø, cierton nabe ñun mayanguen tabig kønrrai marøb, katø ñuinukkurri maya nu misag larrøbichib kønrrai maramønrrun” cha.

¹⁵Inchen Abrahambe tammay muniirabig muniirab megawa, Tius tru trannrrab misrigwan utig købig køn.

¹⁶Pøs møgueløbe nøm lataguen kømø, mas nuigwei merrab pønrramisrabe, martrai indigwan ‘¡katø! marmø kømø, nabe maramønrrun’ chib pønrrabelø køn. Inchen tru nuigwei merrab nøm trenchib pønrraigwane nøm trenchib pønrraitøwei treeg marig kørrømisrtrai marøbig køn, yandø mas wamindamikkaikke.

¹⁷Inchawei tru trannrrab kørrømisrigwan ketig utønrrabelan Tiusbe nui isuigwane yunømartrab wamíig kuin kui ashchai tørgandø kenamartrappe, nøbe, ‘¡katø! marmø kømø, nabe maramønrrun’ cha kørrømisriitøga treeg kønrrai mara pasrig køn.

¹⁸Inchawei iig tru pabaløwane chinchaguen yunømaramgaig, tru trannrrab kørrømisriitøgaba, tru ‘¡katø! marmø kømø, nabe maramønrrun’ taitøgaba marig kua, Tiusbe chincha isønrraamøn. Treeg købene, nambe kullaaramø, mas mur pønrrønrrab inchigun, tru Cristoba tørguegwalmabigu purramigwan nam isua munig melamig namui merrab pasrabigwan ke tab tøga pønrramisra, Tius purømisrøb wainug nam kemendønrrab luløbeløbe.

¹⁹Iig tru tørguegwalmabiisrø purramigwan isub munig melaibe kan ancla piumbu ellgwawa barcon merrarrab pasrabig lataitøwei namui møsiizhigwan yandø chi isumikkaig treeg pasrønrrai merrarrabigwan tøgaguer. Tru muniirab melaibe, tru “Kerriguba Tiusweindiig Kønrrain” cha pasrinug tru tab llensuzhig kelarrab megai wendausrøngatig kebya pasran,

²⁰tru yandø managatigweyasig, tru Melquisedec maig køben treetøwei Jesúsbe Maya Sacerdotesmeran Nø Karub Sacerdote misra, tru namuyasig may kura trarrøb nømerrig kebyaisrø.