Hataholi Nadedenu nala Tutuin 13:38-50

³⁸De tolanoo nggalei, mamanene matalolole! Hataholi ndia, ndia Yesus! De mete ma ita tamahele neu Ndia, na bei fo Ndia nau lemba ita sala-singgo nala, te mete ma tungga teteꞌben, na ita mesa nggata musi lemban. No leondiak, Manetualain ana koka heni ita sala nala. Tehuu ita bubuluk so tae, mae ita tungga basa Baꞌi Musa heti-heu haꞌdan, tehuu ndia tana mesa kana tao ita neulau nai Lamatuak matan.

⁴⁰Huu ndia, de ei musi duduꞌa neu lalaun dei. Boso losak hata fo Lamatuak mana kokolan lele ulu kala lafaꞌda so, ana tuꞌda neu ei. Ala sulak so lae, ‘Mata neuk, neu ei mana haumemee kala, fo mateme makadadaek hataholi! Huu Au, de Manetualain, ana tao dedeꞌa kala fo hataholi la heran lalan seli; tehuu neu ko ei simbo ei babaꞌen, fo ei mate nduaꞌdak miu. Au tao dedeꞌak sila, lelek fo ei bei masoꞌda tehuu ei taa nau simbo kana. Mae hataholi la ala tao manggaleleꞌdon so boe oo, ei taa nau malela kana. Malolenak ei duduꞌa neulalau dedeꞌa kala sila, fo ei heran boe.’ De, tolanoo nggalei. Duduꞌa neulalau hata fo isinaak au afaꞌdak ndia. Boso mbia heni hata fo isinaak ei mamanenen so, sama leo mana haumemee kala tataon. Baꞌu kaꞌda leondiak au kokolang. Makasi noꞌuk!”

⁴²Nakokola basa, boe ma Paulus no Barnabas lambadeik, de ala sangga laꞌo ela uma huhule-haladoik ndia. Boe ma hataholi manai ndia kala, loke fo dua sala fali main nai sosoꞌda ina mana maik ia, fo tao manggaleleꞌdo lutu-lutuk seluk, hata fo isinaak ala kokolak ndia.

⁴³Ala kalua tutik leme uma huhule-haladoik ndia mai, te hambu hataholi noꞌuk lai ndia, fo ala mai tungga Paulus no Barnabas. Boe ma dua sala fee sala nanoli-nafaꞌdak, lae, “Ita bubuluk Lamatuak dalen malole hiak neu ita. Huu ndia de ei musi toꞌu mahele Ndia.”

⁴⁴Sosoꞌda ina mana maik nandaa no hataholi Yahudi la fai hahae tao ue-leꞌdi nala, de elabaꞌik basa hataholi manai kota ndia ala mai fo sangga lamanene Lamatuak Dedeꞌa-kokolan.

⁴⁵Tehuu leꞌdoeik fo hataholi Yahudi malangga nala lita hataholi noꞌu kala lahiik mai lamanene Paulus asa, boe ma ala dale heꞌdi sala. De leꞌdoeik Paulus bei kola-kola, boe ma ala laꞌban Paulus no huu-okan, ma ala kokolak latuꞌda sala.

⁴⁶Tehuu Paulus tala heo kasa, de ala kokolak taa babaꞌbi-babaa so. Lae, “Memak Manetualain ana soi dalak nakahuluk fee ita hataholi Yahudi la so, ma Ana fee Dedeꞌa-Kokola Malolen neu ita, de memak ndaan ndia! Tehuu ei taa nau simbo kana. No leondiak na ei taa mandaa hambu soꞌdak makandoo mia Manetualain. De hatematak ia, ai sangga mini Dedeꞌa-Kokola Malole ndia fee nusa-nusa feꞌe kala, huu ei timba henin.

⁴⁷Te Manetualain ana haitua ai so, ndandaak no Yesaya ana sula kana so, nae, ‘Au soꞌu ala ei so, leo banduk fo mini manggaleꞌdok neu nusa-nusa feꞌe kala, fo taa Yahudi la, fo suek ei loti tao manggaleleꞌdo dalak mana neni Au mai, fo ela Au mboꞌi heni sala leme sila sala-singgo nala mai. Ma ei boe oo, musi matuꞌdu dalak ndia nai daebafok neme mbeꞌdan esa losa mbeꞌdan seli.’ ”

⁴⁸Leꞌdoeik hataholi leme nusa-nusa feꞌe kala fo taa Yahudi la lamanene leondiak, boe ma lamahoko lalan seli. Boe ma ala koa-kio Manetualain, lae, “Koa-kiok neu Lamatuak, fo mana maena Dedeꞌa-Kokola Malole ndia, lolen seli!” Ma nai ndia, hambu hataholi la fo Manetualain naketu basan neme makahulun mai, fo ala bisa lasoꞌda lakandoo lo Ndia. Boe ma basa sala lamahele lae Lamatuak Yesus ana buka dalak fee sala so.

⁴⁹Manetualain Dedeꞌa-kokolan ana natanggela neme bafak neni bafak neu nai basa nusak ndia.

⁵⁰Nai kota ndia, hambu hataholi inahuu kala, touk ma inak. Hambu luma ala dokodoe Lamatuak. Tehuu hataholi Yahudi malangga nala, ala mai dunggu-mbau hataholi inahuu nala sila, losak ala husi kalua heni Paulus no Barnabas, leme nusak ndia mai.