Aposel 13:38-50

³⁸Cotigeil, dah meiga. Ija me je i maadigina. Dana ina himec Anut uqa agena silail cagasiadena.

³⁹Odocob age Mosesna loo je toodoginana dih Anut uqa agena silail cagasiadecwe qee. Euqa age dana inu wawaga meleecebfi uqa ihoc agena silail cagasiadigian.

⁴⁰Eunu je hahun madec dana madein eu ageca calecdainnu batut feiga. Age odi madein:

⁴¹‘Age Anut madena cewudegina eu feiga! Agena saenna odoc oso ija odigina. Eunu wawaga dadaneceb cal meiga! Dana oso odoc inu sildiadecebfi age wawaga qee meleeiaun!’ ein,” aden.

⁴²Odocob Pol Banabasca cuha jonadec cajesin nuuwasa oodosin dana age cuha deel osona humesi me je haun madecebil doqagannu cesusaali maalein.

⁴³Odocob dana cegulec eunadec wele budocobil Juda danaca Juda dana qee eundec age Juda agena kobol toodoginaca mati bahic age Pol Banabasca tooalein. Pol Banabasca waldumesi dahiniga hewec je maadimesi Anutna eeladec uqa uum aden euna bilecnu cesusaadi maadesin.

⁴⁴Odocob cuha deel osona dana cajaca cunug bahic odi age taun euna bilein Anutna je dah moqagannu cegulein.

⁴⁵Euqa saen Juda dana eu age dana am ben cegulein eu meciadimeig age Polnu heel mimeig je eu mele qee ec mamadeig Polnu je me qee mamadiein.

⁴⁶Odocob Pol Banabasca ale je saluqi u maadesin, “Ele casac Anutna me je maadouhqa age je eu hibemdogina. Odocob agedodoc madegina ege euna cebac bilec catanec eu ocwe qee egina. Eunu ele age cuculadi Juda dana qee eundecca lowona.

⁴⁷Ge, eu odiwe Tibud uqa ege je gatiti magen: ‘Ija Juda dana qee eundecnu hina fulacdocwe mihigina. Hina dana mahamaha cunug bilegina eundec Anut cahahaadigiannu cesuladegan,’ gen,” adesin.

⁴⁸Saen euna Juda dana qee eundec age je eu dah mimeig age celeboeeig Tibudna je binan sulein. Odocob leih Anut cebac bilec catanecnu nesiladen eundec age wawaga meleec dana ibuldoin.

⁴⁹Odocob Tibudna me je hatu cunug ihoc len.

⁵⁰Euqa Juda dana age caja age ijanagaca, eundec age Anut binan suloloig euca, dana ben age taun ben euna bileginaca jajahil adecebil age Pol Banabasca me qee odalimeig age hatu ben uqana gadacna ititacalein.