Godigo Sęba Tagala Palai Bidigo Po 12:3-21

³Te Jems elebo sulama, Juda bidi hanigo bugai homu yali. Tama Herot agai te sulama, tama agai Pita gegali. (Tama agai tilama, te sogo Juda we bidigo moni nai mu udumai hagede, tama augwaligo homugo ‘Te polobadu Godigo dago wąį dabe tau sali sogo, te bo disąwai bret tuali sogo da,’ te homu yai.)

⁴Tama augwaligo Pita nogo dulama, aga kalabusiba muani. Tama augwaligo Pita tonaluabo enesigi bidi nogo si olama, me badu sągą kibisa deli wagi solama sali. Me si me si nama bagego giligade me, hulide me, augwaligo me hasegeleyu, me hasegeleyu ilama, Pita tonaluali. Herot agai homugo Pita te tigidali we bidi gedude po tų ela mawainu yaibao, te moni nai nogeai sogo silibo si.

⁵Tama tibaso, augwaligo Pita kalabus bede tonaluali. Tiali goli, Jisasgo po wali pabo we bidi augwaligo Godibolo gedu haluasa po hauwa sogo mu oduali, te Pita tau somainu yai.

⁶Te Herot agai homugo ‘Pita te we bidi gesabiba do kigamu odasa asaibao, po tų yai hagede,’ homu yai. Tama te sogo hulide Pita te tonaluabo enesigi bidi si tomode piai. Augwali sigo nogo dali Pitago nogo dali daganama, aligabo bonogo kęwai. Tama te kalabus be tųde tonalubo enesigi bidi dolaluali.

⁷Tama Godigo dagalude sę ebo ensel bidi me deli polo te kalabus be tomoba sabolama dolaluagasali, tama te be tomode ulago sela pali. Tama ensel bidigo Pita pila mubadi, tigiba diąnama, hodolai. Tama agai agabolo te po wali, “Nage polo hodaluao.” Tama tibadi yaide, te aligabo bono si augwa digi tǫba tuloluai.

⁸Te ensel bidigo te po wai, “Naga ugwa bugagia gudama, kibu wali dąų wao. Naga sągą nadoba bulao,” wali. Pitago tilama, te ensel bidigo agabolo te po wai, “Tama nago moni ugwa homu pagede belama, tama nage ena wali asao,” wali.

⁹Pita te ensel bidi wali pelama, te kalabus be taga pelama, buluba pai. Tama Pitago te ebo sę konebe, agai homugo ‘Mu ebowe, ma nade ebowe?’ homu yali.

¹⁰Tama augwali sigo tomo tųde tonaluali enesigi bidi bidibadi ela soali. Ela solama, ma pelama, tama tomode me tonaluali enesigi bidi me, te me ela pali. Ma pelama, te moni dila pai aingo nigali tųba sabolali. Tama te moni dila pai aingo nigali tų sunumi aga digi dalasa pali, te augwali si te kalabus be taga pelama, te be nani tomoba pai. Tama augwali si tųdu dwasianu pabo ąǫ elama, ensel bidigo Pita polo taga pali.

¹¹Tama Pita agai homugo ‘Te yali sę te nade ebeo homu eyu, te eno mu koneanio,’ wali, ‘Genuai Bidi agai ensel bidi tagala palama, tama agai ena Herotgo nogode ma sali. Te Juda bidi hani augwaligo ena dali dwai sę yai hagede yali, tiali goli te Genuai Bidigo augwaligo homu dolai,’ Pitago te homu yai.

¹²Te Pitago te homu elama, aga te we nogi Maria, Mariago beba pali. Te Maria aga ogwa agai nogi Jon, agai nogi me Mak. Tama te bede we bidi umabo sisinagaselama, Godibolo po weyu bidali.

¹³Tama Pitago te be tųba bebego wali. Tama te bede sę ebo gesi we tųba suagasali, te gesi we nogi Roda.

¹⁴Tama te wego Pitago dogoni koneai, tama agai dwagi yai homu mu ebaso, be tomoba polo ma pali, te tų dabe kegeda pali. Agai te we bidibolo te po wai, “Te Pita aga asai, bulu badu dolalubo,” wali.

¹⁵Augwaligo te webolo “Nage wabo pabo po wabowe?” wali. Tiali goli, “Eno mu po obao,” wali. Augwaligo te po wai, “Te da, te Pitago noma dolagasali bogo,” wali.

¹⁶Te augwaligo te po obadi yaide, Pitago te be tųba bebego oduali. Tama augwaligo tų dalama, Pita dolalubo sulama, noma mu sali.

¹⁷Pitago agai nogo paliama, “Dage po tagalao,” te po wai. Tama Genuai Bidigo aga kalabus bede buluba dią palama soali po augwalibolo pusa mani. Agai te po augwalibolo wali, “Te po dagego Jemsbolo pusao, te Jisasgo po wali pabo tobolu bidi dabebolo me pusao,” wali. Tama olama, Pita te be tagalama, gasa beba pali.

¹⁸Te sogo kigamu, te kalabus bede bidali enesigi bidi dabe augwa hasi te po wai, “Pita mena tama paliwe?” Augwaligo moni homu mu eyu bidali.

¹⁹Tama Herotgo te yali sę po odama, “Pita gegegi piąo,” wali. Augwaligo gegegi pali, Pita sube. Tama tibaso, Herotgo te enesigi bidi dabe po tų elama, tama agai me badu bidibolo walama, “Augwali ela muao,” wali. Tama augwaligo te enesigi bidi dabe ela muani. Te sę elama, Herot te Judia tǫ tagalama, te Sisaria bulude osogo bidali.

²⁰Te nosali Herotgo te Tair bidi dali, te Saidon bidi dali, te bulu si bidi dabe dali agai moni sębę yai. Tama tibaso, tigidali sisinama, aga sugi pali. Hasia bolo augwaligo te Herotgo be tonalubo sę ebo bidi deli suali, agai nogi Blastas. Augwaligo te bidi ‘Abagi mu’ wali. Tama augwaligo agabolo hanalu wali, “Te Herotgo wado po mena tama isilaibawe?” Tama nosali augwali te Herot pageba pelama, te po wai, “Te dago nai abelebo nago bulude naga dago nai abelama, tubo dao. Tama tibaso, dago te hwįbo sę tagalinao,” wali.

²¹Te Herot me deli sogo bodolu mani. Tama te bodolu mani sogode agai dwagi yai ugwa aluama, tama agai genuai bidigo wiegi yai ni namide dugayali. Tede agai te we bidibolo bobobage po ola mani.