Godigo Nogi Ugwaba Sabo Tęąbi Po Wabo Buku Dabe 9:1-17

¹Te Devitgo asęani balia po me deli dao. God, eno nageba usu da weyu, gedu haluasa po mu obao. Eno te we bidi augwaliba te nago midigi sabo wiegi yai sę tigidali yali po waibao.

²Eno nageba homu koneama, tama eno te wiegi yai homu pemene ebo balia waibao. Te Ugwade Bidibo God mu, te eno balia weyu, nago nogi ugwaba saibao.

³Te eno boi bidi dabego nage sulama, tama wi pai. Augwali tulaluama, tama mu isalio.

⁴Nage te jas tiwai te siade dulalu, tama nago te doloba pai po tų ebao. Nago eno kolesaga osola suyu, dagalali, te nago suali, eno magi sę me deli ebeo.

⁵Nago po odisiąwai bidi hani dabe, te Israel hani isąwai hani dabe, te nago po tų ilali. Nago te dwai sę ebo bidi dolali, tama te bidi mego augwaliba te homu kone munu me ma egobeo, augwa hani nogi mu miyą saibao.

⁶Awe, te boi bidi dabe sesemane doludubadi usu nanio. God, nago te augwaligo hanu dabe dolama, tama te mena bidi me deligo te augwaliba homu kone ma egobeo. Mu menio.

⁷Tiali goli, God te sesemane king bididubadi usu yai. Agai te po tų yabo sisi yai dao.

⁸Mu tama, agai te tǫde we bidi tonalubo, tama agai bomai po te doloba pai mu da. Agai te tigidali we bidigo kolesaga dagalubo sę te deli tigi poai sęgo naga dagalubo dao.

⁹God te bomai be me deli tiwai. Te bidi dabe te boi bidide sęgę sobaso, augwa te agaba aselama, bidagasobo dao. Te sęgę sabo augwa te agaba pelama, te geme dualalubo dao.

¹⁰God, te nageba asobo we bidi te nago augwali tudiba munu me mugobeo. Tama tibaso, te nage koneani bidi dabego da, te nageba konealubo homu dąų mu wabo dao.

¹¹Genuai Bidi God te Saion hanude king bidibao. Dagego te aga nogi ugwaba siyu, te tęąbi waiyąo. Tama dagego te tigidali Israel hani isąwai bidiba po hanilama weyu, te agai yali tigidali bomai sę po waiyąo.

¹²Magi baso meni, Godigo te dene tolobo bidi homugo konebo da. Tama agai te augwaligo gela wabo te homugo me gegeda palugobeo. Agai te augwaliba dwai dene mabo bidi dabeba te dwai dene wei ponobo dao.

¹³Genuai Bidi, nago enaba te olo mu tau sabo wiegi yai kolesaga yao. Te boi bidi dabego enaba te dene me sęgę mabo, te nago suao. Te pąde ena isainu ebadi goli, tiali goli nage asiyu, ena dąų walao, te ena bugagia bidimainogo tiao.

¹⁴Tama tiyu, eno te nago yali sę po tigidali weyu, tama eno nago nogi ugwaba saibao. Ena te Saion hanu sunumide dolalu, tama te nago ena ma sali po weyu, te wiegi yai homu pemene yaibao.

¹⁵Te Genuai Bidigo po odisąbo Israel hani isąwai bagego te tǫ dedage diginama, te da kalabus emainu yali. Tiali goli, augwa digi teba tulaluai. Augwaligo te da tola somainu yabo bono gągą geme muani, tiali goli, te bono gągągo augwa digi ma tola sai.

¹⁶Awe, te tama tebogo te God agai kolesaga te bidi dabeba te po tų ebo sogo ola mawai dao. Te dwai sę ebo bidi dabego te gasa bidi dolabo sę yali, tiali goli te naigo begelama, te augwa digi ma dolai.

¹⁷Te dwai bidi dabe, me te God tudiba mubo we bidi hani dabe, te tigidali isimainu ebo dao.