Godigo Nogi Ugwaba Sabo Tęąbi Po Wabo Buku Dabe 73:12-23

¹²Te dwai sę ebo bidi dabego te tama tibo dao. Augwaligo doado bage te hauwa elaluali, tiali goli augwaligo umabo mu sabo sę ebo dao.

¹³Ena bugagia tonalubaso, tama eno haliga te wiegi yai elaluali, tama eno te dwai sę meba me ebeo. Te tiali sę te odolali hagawaibao, agawe?

¹⁴Magi baso meni, te giligade me hulide God, nago dene enaba mani, tama tigidali kigamude nago te dene enabolo mawai.

¹⁵Eno te bidi dwai dabego wabo po tiwai, te nago we bidi dabeba wagi da, teda eno augwali tibo po ola mayu, te augwali homu puna palagi dao.

¹⁶Eno homu hauwa elama, tama eno te sę page konemainu ebao, te dwai sę ebo bidi dabego ebo sę page. Tiali goli, te enade sesabo sę mu ebo dao.

¹⁷God te eno usu sesa pidubadi, te ena nago be tomoba peyu, usu nigi pai. Ena te nago bede bidiyu, tama eno homu peda pelama, tama te dwai sę ebo bidi dabeba mena nai pedelabo te eno koneai dao.

¹⁸Nago augwali bilabo sunumi te bedege mu emainu ilama, tama nago augwali tula mumainu elama, tama augwali mu dolomainu ilaibao.

¹⁹Augwali te polo tama dolali. Tama augwali te isibo te dwai mu ebo dao.

²⁰Genuai Bidi, augwali te na ebo bidi tiwai elama, tama te na yali te kigamu be posobode silaibao. Bidigo te kigamu hodaluama, tama te na yali te agai homude me ma elalugobeo.

²¹Te sogo eno homu te midigi selama, tama eno haligago te dwai mu yai.

²²Tama eno homu te pania selama, tama eno nago kolesaga me konesiąwai. Eno te nago gedude kolesaga yali, te uni hasago homu kolesaga umuna pabo tiwai ilali.

²³Tiali goli, ena nage dali sesemane bidibaso, tama nago ena nogo tolalubo dao.