Godigo Nogi Ugwaba Sabo Tęąbi Po Wabo Buku Dabe 69:1-25

¹God, ena tau sao. Wę te pedelama, te eno dogoniba usu igulalio.

²Ena te genuai ąį pu tomoba hoa sigiluai. Te ena doligiluabo madi te tǫ dili yai me elalubeo. Ena te wę ge bo delama, te aiyanu mu igulai madi bilibao, tama te ge bo dali węgo ena mesegelainu mu ebo dao.

³God, eno nageba te i wedu wedu gebo sę edubadi, tama eno bomo te silalio. Tama eno dogoni wa pelama, tama eno gedu dene yai, magi baso meni, eno te sesabi elama gana nago ena tau sabo tonaluai.

⁴Te enaba odolali boi bidi ebo bidi dabe, augwali te hauwa umabo mu dao, te eno tobolu nisigo namba te augwalide usu isąwai. Te boi bidi dabego enaba dwai sę yainu yali, tama augwaligo te ebo kolesaga pagede tibo po wali. Te bidi dabego bomo mu elama, te ena ela muabo homu yali. Eno te augwaligo nai doado bage me deli te eno wi me sabe, tiali goli augwaligo te po hauwa enaba kisilama wali. Tama tialima, eno ena doado bage digi te augwaliba mawai.

⁵God, nago ena koneanio, ena te kolesaga geda mubo bidi naga dao. Te eno dwai sę yali dabe te nago gedude geme me duala sabeo.

⁶Genuai Bidi, nage te Tigidali Bomo Elalubo God da, nago eno te kolesaga meba emainogo eyu, te konealubo homu dąų wali bidi dabe hale somainu elamuo. Te da Israelgo God, nago eno te kolesaga meba emainu eyu da, te bidi dabego te nageba lotu po wabo we bidi dabeba te po dwai omainogo elamu dao.

⁷Eno nage wali pobaso, tama te bidi dabego posobo po enaba weyu, tama augwaligo ena hale emainu ebo dao.

⁸Te eno ama dede augwaligo ena te gasa hani bidi tonobo tiwai yai. Tama ena hani we wai sibigo ena te augwaligo digibulu bidi tonobo tiwai gilama yai dao.

⁹Eno te nago tedali wiegi yai be te godolo mu elama, tama eno te be wiegi yai bugagia elalumainu, te sę bomo ebao. Te bidi dabego nageba wabo dwai po, tama te po enaba me boaga sobao.

¹⁰Eno te nai me habu seliyu elama, tama te kolesaga ebogo te nago gedude ena digi te ena aiyaba elalubao. Tiali goli, te we bidi dabego enaba po dwai wai.

¹¹Eno te homu dene ebo ugwa gudali, tiali goli, te bidi dabego enaba dwai po weyu, tama posobo po enaba wai dao.

¹²Te bidi dabe sunumiba sisinama, tama enade po miani. Tama te wain wę tulama, te gęǫ ebo bidi dabego te balia mebade te dwai po enaba weyu yali.

¹³Tiali digi tagalao, eno te nage Genuai Bidiba gedu haluasa po waibao. God, te me sogo deli nago digi te sa muani sogo, nago te eno gedu haluasa po wali wei ponao. Nago tama tiaibao, te magi baso meni, nago te ena godolo mu elama, tama nago ena ma sabo po dąų walali, tama nago tibo po me wagobeo. Mu menio.

¹⁴Nago ena te wę pude ma sobaso da, teda ena te tomoba hoa selama, tama tede me hagagobeo. Nago ena tonalubaso, te boi bidi dabego ena me dologobeo, tama te pu aiyanu igulali węgo te ena me mesegeligobeo.

¹⁵Nago ena te ge bo dali węgo somainu me elamuo. Tama nago ena te wę ge bo aiyanu igulali węde hagamainu me elama, te isibo gų pagego ena elalumainu me elamu elao.

¹⁶Genuai Bidi, sesemane sogo nago ena godolo mu ebo tama te wiegi yai mu da, tama tiyu, te nago eno gedu haluasa po wali wei ponao. Nago te olo tau sabo wiegi yai kolesaga umabo mu enaba eba wida, teda nago ena tau sagasao.

¹⁷Ena naga sę bidi da, tama tiyu, nago enade geme me duala selamuo. Eno sęgę genuai elalubao, tama tiyu, nago asesa polo tama te eno gedu haluasa po wali wei ponao.

¹⁸Nage ena pąba aselama, tama ena ma sagasao. Nago ena te ena boi bidi dabego nogode ma sao.

¹⁹Te bidi dabego enaba po dwai wabo te nago koneanio. Tama augwaligo te ena hale emainu eyu, tama ena nogi aiyaba elalubo me, te nago koneai dao.

²⁰Te po dwai wabogo eno homu kolesaga dolama, tama ena haliga sęgę umabo mu elalumainu yai. Tama eno bomo meniyu, me elalubeo. Eno homugo te bidi mebago ena homu dene yaiba homu yali, tiali goli me deli meni yai. Tama eno homugo te bidi mebago te enabolo te haliga dąų walobo wiegi yai po meba mayu, waiba homu yali, tiali goli, te menio.

²¹Te eno nasi ebo sogo, augwaligo te dwai marasin ena mani. Te ena dogoni wa pobaso, tama augwaligo te ha ebo ąį nogi viniga naga ena mayu yai dao.

²²Tialima, nosali augwali te genuai nai tuboba sisinani sogo, eno homugo tego augwali dolomainu yao. Tama augwaligo te ofa me nai dabe sesebaso da, teda tego te augwali tulaluama, hagamainu emainao.

²³Te augwali gedu hulia somainu elama, te augwaligo ma tonono yainu ebaso, te usu munu ma egobeo. Te augwali tudi dili dolobaso da, te augwali bomo elama dolalubaso, te usu me egobeo.

²⁴Nago augwaliba te wado umabo mu eyu, tama augwaliba dwai dene mao. Tama nago haliga sębęgo te augwali selama, tama augwali hagamainu yao.

²⁵Te augwali bidalubo pesage te olo elalumainu elama, tama nago augwali me deli te bede bidibo ula dali bidimainu me elamuo.