Godigo Nogi Ugwaba Sabo Tęąbi Po Wabo Buku Dabe 135:10-20

¹⁰Genuai Bidigo te bulu tǫ pedai hauwa dolama, tama te bomai king meba ela muai dao.

¹¹Agai te Sihon elali, te Amor dabego king, tama Ok, te Basan bulu king da, tama te Kenan tǫ king tigidali ela silai dao.

¹²Tama agai te king dabego tǫ te aga hani bageba mani, te Israel dabebolo mawai dao.

¹³Genuai Bidi, sesemane sogo te we bidi dabego te nage koneama, te naga digi nage te God da homu yaibao. Tama te nosali pedalubo hani dabe, augwaligo me te nage homu konealuaibao.

¹⁴Tama Genuai Bidigo te seselalubo kolesaga te aga we bidi dabeba eyu, tama aga te sę bidi dabeba homu dene yaibao.

¹⁵Te gasa hani dabe augwaligo te augwa tibo god dabe te silva me golgo nigali. Te bidi dabe augwa nogogo digi te tibo god dabe nigai.

¹⁶Te tibo god dabe augwa pedauwali elalubao, tiali goli augwa po wabo usu meni yai. Tama augwa gedu elalubao, tiali goli augwa nai dabe me subeo.

¹⁷Tama augwa olo elalubao, tiali goli augwa po wabo me odosiąwai, tama augwa mobo sabo usu meni yai.

¹⁸Eno homugo te tibo god nigibo bidi dabego tama augwa homu te nai dabeba mubaso, augwa te tibo god dabe tobage tiwai pedelaibao.

¹⁹Dage Israel we bidi dabe, te Genuai Bidi nogi ugwaba siąo. Dage Genuai Bidigo pris dabe, te Genuai Bidigo nogi ugwaba sao.

²⁰Te Livai hani dabe, te Genuai Bidigo nogi ugwaba siąo. Dage te Genuai Bidide wi eyu aga dologode bidibo we bidi dabe, te aga nogi ugwaba sao.