Godigo Nogi Ugwaba Sabo Tęąbi Po Wabo Buku Dabe 119:65-95

⁶⁵Genuai Bidi, nago wiegi yai kolesaga naga sę bidi, enabolo yai dao. Nago naga dąų wali po wali mu pabo dao.

⁶⁶Nago bomo yai po tigidalide eno homu dąų mu obaso, tama tiyu, nago wiegi yai kolesaga te ola mabo sę ena dali yao.

⁶⁷Nago dene me enaba wasiąbadi digi, te eno nago sunumi wali asobeo. Tiali goli, megi da, eno nago po wali pabo dao.

⁶⁸Nago wiegi yai mu eyu, tama nago olo mu tau sabo kolesaga enade ebao. Nago bomo yai po ena bugagia ola maduao.

⁶⁹Te dwai hagoma ebo bidi dabego tibo po hauwa enade te gasa we bidibolo weyu ebao. Tiali goli, eno gasa homu me isąyu, te eno nago bomai po naga tigidali wali pabo dao.

⁷⁰Te bidi dabe augwaligo wiegi yai homu kolesaga me elalubeo. Tiali goli, eno te nago bomo yai po godolo homu mu ebo dao.

⁷¹Te wiegi yai mu da, te nago dene mabo sę enabolo yali. Te tiali sęgo nago bomo yai po wali pomainogo ena bugagia ola mawai dao.

⁷²Eno te mone godolo homu me egobeo, te eno nago bomo yai po godolo ebo tiwai gilama me egobeo.

⁷³Nago digi nago ena nigali, tama nago ena bugagia tonalubao. Nago wiegi yai homu kolesaga enaba mao, te eno nago bomo yai po tigidali bugagia konea sabo sę emainogo yao.

⁷⁴Te we bidi augwali nagede wi eyu, nage dologode bidibo bage, te augwaligo ena sulama, homu pemene yaibao, magi baso meni, eno nago dąų wali pode homu dąų wabo dao.

⁷⁵Genuai Bidio, eno koneani, nago bomo yai po tigidali te dolo naga mu elalubao. Nago eno ebo kolesaga deli naga dodolabo homu eyu, tama nago enabolo sęgę mawai dao.

⁷⁶Nago dąų wabo po walio, te nago sesemane sogo ena godolo eyu, te naga sę bidi ena haliga dąų walabo po wai. Tialima, megi da, eno homugo nago tama sę emainogo homu ebao.

⁷⁷Nago ena megi hobede eyu da, te ena bidabo ula saibao, magi baso meni, eno nago bomo yai po godolo mu ebao.

⁷⁸Te hagoma ebo bidi dabe augwaligo tibo po weyu, ena olo po tų ilaibao. Augwa te ebo kolesagade hale mu ebo sę ilao. Tiali digi ena, te eno sesemane sogo nago bomo yai po homu konealueibao.

⁷⁹Mena bidi dabe te nagede wi eyu, tama te bidi dabego nago bomo yai po koneyu, te augwali enaba asomainao.

⁸⁰Te eno homugo nago ena tau sobaso, te nago bomo yai po tigidali eno wali peyu, tama ena te ena ebo kolesagade hale sabo sę me egobeo.

⁸¹Nago ena ma sogowe weyu tonalu, te ena haliga sęgę mu ebao, tama eno bomo tigidali silibao. Tiali goli, eno nago pode konealubo homu dąų wai mu elalubo dao.

⁸²Eno te nago dąų wali po mu usu nugowe weyu, nage tonalubadi, te eno gedu magane eyu, hagela mu ebao. Tama eno te po weyu, “Nisu sogo nago eno haliga dua digi nagame iligowe?” eno te po wabo dao.

⁸³Ena te kibu meme wale te augwaligo wain ąį bulama, te dobaso, badia pai sąbo tiwai yali. Tiali digi te eno nago bomo yai po te eno homude gegeda pabo menio.

⁸⁴Nisu naga sogo eno tonalueibawe? Nisu sogo mu enabolo te dwai dene mabo bidi dabeba nago augwaliba dene magowe?

⁸⁵Te dwai hagoma ebo bidi dabego te nago bomo yai po wali pabo meni. Augwaligo geme dualubo kolesaga me badu eyu, te ena tola sainu ebao.

⁸⁶Da we bidigo nago bomo yai po tigidali dąų wabo homu ebao. Tama nago po te tulalugobeo. Te bidi dabe augwaligo tibo po dabego ena dolobao. Tama tibaso, nago ena tau somainu homu ebao.

⁸⁷Pąde tama te augwaligo ena ela mueinu yai. Tiali goli, te eno nago bomo yai po tagala homu me ebeo.

⁸⁸Nago ena bugagia tonalubao, magi baso meni, nago sesemane sogo ena godolo homu ebao. Tama tibaso, eno nago bomo yai po tigidali wali mu pabo dao.

⁸⁹Genuai Bidi, nago po da, sesemane sogo elalua pidu elalua paibao. Te nago bidibo bulude nago pogo bomo munu me siligobeo.

⁹⁰Nago sesemane sogo naga wali po wali pidu bidibao. Nago e tǫ naga gesabidi badu munama elalubao, tama elalubo tiwai tama elalu, te ibaba me kila sesa me pabeo.

⁹¹Naga digi nago po wali gilama te tigidali nai sibi te polobadu elalua asali, megi e sogoba usu nagaselama, megi me elalubao. Magi baso meni, tigidali nai sibigo nago sę naga ebao.

⁹²Te eno nago bomo yai po godolo menigi sogo da, teda nago enaba dene mabo sę ebaso, te isigi dao.

⁹³Eno nago bomo yai po me tagalogobeo, magi baso meni, eno te po dabe wali pobaso, te nago ena bidabo ula mobaso ena bidibao.

⁹⁴Ena naga nai mu tama, tama tiyu, nago ena ma sao. Sesemane sogo eno nago po wali pabo homu ebao.

⁹⁵Te dwai sę ebo bidi dabe geme duala sagaselama, ena ela mueinu ebao. Tiali goli, eno nago bomo yai po tigidali konealubaso, te tama sę eno homu si me egobeo.