Föför 19:19-40

¹⁹Pwal chomong me lein chokewe mi föri angangen roong ra uwato nöür kewe puken roong o keniirela mwen mesen ekewe aramas meinisin. Nge lupwen ra apachafengeni liwinin ekewe puk, iwe, a pwä pwe ükükün liwinir lime ngeröü chala.

²⁰Iwe, pokiten ekei mettoch mi amwarar ra fisitä, kapasen ach Samol a chöfetal o chomong aramas ra lükü Jesus.

²¹Mürin an fis ekei mettoch, Paulus a filätä fän emwenien ewe Ngünmifel pwe epwe sai lemenen Masetonia me Akaia o feila Jerusalem. A apasa, “Mürin ai feila ikenan, üpwe pwal fokun tori Rom.”

²²Iei mine a tinala Timoty me Erastus, ruoman me lein ekewe chon alisi lon ewe angang pwe repwe feila Masetonia, nge i epwe nonom lon Asia ekoch fansoun.

²³Lon ena fansoun a fis eu osukosuk watte lon Efisos pokiten ewe Alen ach Samol.

²⁴Iwe, eman mwän mi föri pisek seni silifer itan Temetrius a föri liosun imwenfelin ewe anüfefin Artemis. Iwe, an we angang a aworato watten win ngeni nöün kewe chon angang.

²⁵Iei mine a körifengeniir meinisin fiti chokewe mi föri ewe sokun angang usun ir o a üreniir, “Ämi mwän kana, oua silei pwe ach pisekisek a feito seni ei angang.

²⁶Nge iei oua tongeni püsin küna o rongorong met ätenan Paulus a föri. A apasa pwe ekewe uluulun kot mi för ren pöün aramas resap wesewesen kot. Nge a fen liapenala chomong aramas ikei lon Efisos pwal lon arapakan unusen ei fanü Asia.

²⁷A wor och afeiengau ngenikich, pwe ach angang epwe itengau. Nge a pwal wor och afeiengau, pwe imwenfelin ewe anülap fefin Artemis epwe aücheangauala o an itetekia epwe wesila. Iei i ewe anüfefin aramasen Asia meinisin, pwal chon fanüfan meinisin ra fel ngeni!”

²⁸Iwe, lupwen ekewe aramas lon ewe mwich ra rong ekei kapas, ra fokun lingeringer o ra popuetä le pupuchör, “A lapalap ewe anüfefin Artemis seni Efisos!”

²⁹Ewe akürang a chöfetal lon unusen ewe telinimw. Ekewe aramas mi afitikoko ra turufi Kaius me Aristarkus o müttir etekiniirela lon ewe lenien urumwot. Ätekei me ruoman re Masetonia mi eti Paulus lon an sai.

³⁰Iwe, Paulus a mochen püsin feila mwen ewe mwich, nge ekewe chon lükü Jesus resap mwüt ngeni.

³¹Pwal ekoch nöüwisen ewe fanü, ir chiechien Paulus, ra tinala pworaus ren Paulus o tüngormau ngeni, pwe esap feito lon ewe lenien urumwot.

³²Nge lon ewe otun unusen ewe mwichen aramas a fokun akürang. Ekoch aramas ra pupuchör won och, pwal ekoch ra pupuchör won och, nge chomong me leir resap fen mwo nge silei ika met popun ar chufengen.

³³Ekoch me lein ekewe aramas ra ekieki pwe Aleksanter i popun ei osukosuk, pun ekewe chon Juta ra pese ngeni pwe epwe ütä mwen ewe mwichen aramas. Mürin Aleksanter a änipö ngeni ekewe aramas pwe repwe fanafanala. Iwe, a sotuni le kapas ngeni ekewe aramas pwe esap tipisin me chiechian kewe, pwe a fis ei osukosuk.

³⁴Nge lupwen ra silleni pwe i eman re Juta, ir meinisin ra köpökütä won ewe chök kapas lon ükükün ruu awa, “A lapalap ewe anüfefin Artemis seni Efisos.”

³⁵Iwe, ewe seketerin ei telinimw a tongeni aükala akürangen ekewe aramas. A üreniir, “Ämi chon Efisos! Aramas meinisin ra silei pwe ei telinimw Efisos a tümwünü imwenfelin ewe anülap Artemis, a pwal tümwünü ewe fau mi pin a turutiu seni läng.

³⁶Esap wor eman a tongeni amam won ekei mettoch. Iei mine oupwe fokun mosonosonola, nge ousap föri och mettoch mi ngau.

³⁷Ämi oua emwenato ekei mwän ikei, rese fen mwo nge soläni och seni ekewe imwenfel ika apasatä och kapas mi ngau usun ach we anüfefin.

³⁸Are a wor än Temetrius me nöün kewe chon angang kapasen atutur fän iten eman, a wor ekewe rän mi kefilitä fän iten kapwüng, a pwal wor ekewe sounemenem repwe tongeni apwüngü lon lenien kapwüng.

³⁹Nge are mi pwal wor och lükün met ei oua mochen, ei epwe kapwüngüla me lon ewe mwich än chon ei telinimw mi akökkö me ren ekewe nöüwis.

⁴⁰Pun mürin mine a fis ikenai, repwe tongeni atipisikich pokiten ewe mwichen afitikoko. Esap wor och popun fän iten ei akürang, sisap pwal tongeni pwärätä och popun mi mürina fän iten ei lapalap.”