Föför 10:4-40

⁴Kornelius a newenewen ngeni lon an niuokus o aisini, “Ai samol, met ka mochen?” Ewe chon läng a pölüeni, “Kot a etiwa om iotek me om alisi ekewe chon wöüngau o a chechemenuk.

⁵Iei kopwe tinala ekoch mwän Joppa pwe repwe emwenato reöm eman mwän itan Simon Petrus.

⁶I a wasöla lon imwen eman chon angang ngeni silin man itan Simon, a nom imwan aroset.”

⁷Iwe, lupwen ewe chon läng a feila seni, Kornelius a köri ruoman me lein nöün kewe chon angang me eman sounfiu mi niuokusiti Kot, eman me lein ekewe mi angang ngeni.

⁸Iwe, a apworausa ngeniir meinisin mine a fis o a tiniirela Joppa.

⁹Iwe, sorotän ewe rän lupwen ar sai o ra arap ngeni Joppa, Petrus a tötä won ewe imw leoloas pwe epwe iotek.

¹⁰Mürin a popuetä an echik o a mochen mongö. Nge lupwen ra amolätä anan, a wor künaan.

¹¹A küna pwe läng a sukula, nge och mettoch mi wewe ngeni echö chenikam mi watte a ürütiu me läng, nge a föfö pwokukun me rüanü.

¹²Masouen lon ei mettoch sokopaten man mi wor fofoch pecher, sokun man mi tö won upwer, pwal machang mi mwacho.

¹³Mürin eu möngüngü a üra, “Petrus kopwe ütä! Kopwe niela ekei man o kopwe ochoch fituker!”

¹⁴Nge Petrus a üra, “Ai Samol, esap fokun öch ngeniei. Üsap fokun mwo nge mongö och mine a pin ngeniei o nom lon tettelin limengau.”

¹⁵Iwe, ewe möngüngü a kapassefäl fan aruuan, “Kosap apasa pwe a limengau och mettoch are Kot a apasa pwe a limöch.”

¹⁶Ei lapalap a fis fän ülüngat. Mürin ewe mettoch a ürüsefälitä läng.

¹⁷Iwe, lupwen Petrus a ekieki usun wewen künaan we, ekewe mwän Kornelius a tiniirela ra küna ia imwen Simon we a nom ie, iwe, ra ütä ünükün asamalapan.

¹⁸Ra kökkö o ais are Simon mi pwal iteni Petrus a nom ikenan.

¹⁹Nge lupwen Petrus a chüen chök ekieki usun wewen künaan we, Ngünmifel a kapas ngeni, “Simon, ülüman mwän ra küttok.

²⁰Iei mine kopwe ütä o feitiu rer. Kosap tipemwaramwar om kopwe etiir, pun ngang üa tiniireto ikei.”

²¹Iwe, Petrus a tötiu o üreni ekewe mwän, “Ngang ätewe oua kütta. Pwota oua feito?”

²²Ekewe mwän ra pölüeni, “Kornelius ewe meilapen sounfiu a tinikeemito. I eman mwän mi pwüng o niuokusiti Kot, a wor meninin me ren ekewe aramasen Juta meinisin. Eman chon läng mi pin a üreni pwe epwe titi en, pwe kopwe feila lon imwan, pun a mochen rongorong met kopwe üreni.”

²³Mürin Petrus a köralong ekewe mwän lon ewe imw, pwe repwe wasöla ren. Iwe, sorotän ewe rän Petrus a etiirela, nge pwal ekoch pwipwi seni Joppa ra etala.

²⁴Sorotän ewe rän ra tori Seserea. Iwe, Kornelius a awitiir, a pwal körifengeni aramasan me chiechian kana mi kan ngeni.

²⁵Lupwen Petrus a tolong lon ewe imw, Kornelius a churi o chapetiu mwan lon an meniniti.

²⁶Nge Petrus a apwätai o üreni, “Kopwe ütä, pun ngang pwal eman chök aramas.”

²⁷Lupwen ar kakapasfengen, Petrus a etalong Kornelius lon ewe imw, ikenan a küna chomong aramas mi mwichfengen.

²⁸Iwe, a üreniir, “Ämi oua fokun silei, pwe a ü ngeni ach lamalam pwe eman chon Juta epwe chiechi ngeni eman chon lükün Israel are tolong lon imwan. Nge Kot a aiti ngeniei pwe üsap anomu eman aramas lon tettelin aramas mi limengau ika ngau.

²⁹Iei mine lupwen oua titi ngang, üa feito, nge üsap eäni och kapasen pölüeni. Iei üpwe aisinikemi pwota oua titi ngang?”

³⁰Iwe, Kornelius a pölüeni, “Rüanü rän a la ngang üa nom lon imwei lon ei chök otun kulok ülüngat leolopan. A müttir fis pwe eman mwän mi üföüf üf mi saramaram a ütä mwei

³¹o a apasa, ‘Kornelius! Kot a aüselinga om iotek o chechemeni om alilis ngeni ekewe chon wöüngau.

³²Kopwe tinala ekoch aramas Joppa ren Simon a pwal iteni Petrus pwe epwe feito. I a wasöla lon imwen Simon eman chon angang ngeni silin man, a nom imwan aroset.’

³³Iei mine üa müttir titi en, nge a mürina pwe ka feito. Iei äm meinisin aia nonom mwen mesen Kot, pwe aipwe aüseling ngeni meinisin mine ewe Samol a allük ngonuk pwe kopwe aiti ngenikem.”

³⁴Mürin Petrus a popuetä le kapas, “Iei üa fokun mefi pwe a let pwe Kot esap lifilifil aramas,

³⁵nge a etiwa aramas mi niuokusiti i o föri mine a pwüng seni ekewe mwü meinisin.

³⁶Oua silei ewe kapas Kot a tinala ngeni ekewe aramasen Israel, a arongafeili ewe Pworausen Manau pwe sipwe kinamwefengen me Kot ren Jesus Kraist, i ewe Samol mi nemeni aramas meinisin.

³⁷Oua silei met a fis lon unusen Jutea, a popuetä me lon Kalilea mürin ewe papatais Johannes a afalafal usun.

³⁸Oua silei usun Jesus Kraist seni Nasaret, pwal usun än Kot tinatiu won ewe Ngünmifel o ngeni an manaman. A fetalfeil ekis meinisin, a föri föför mürina o apöchöküla meinisin mi nom fän nemenien ewe Tefil, pun Kot a eti.

³⁹Äm aia chon pwärätä usun ekewe mettoch meinisin a föri lon fanüen chon Juta pwal lon Jerusalem. Mürin ra niela i ren ar chüfölüetä won efoch iräpenges.

⁴⁰Nge Kot a amanauasefäli seni mäla lon aülüngatin rän o a föri pwe a pwä ngeni aramas.