1Goteme masiamoli pyoo namba Polo Kataisa Jisasanya aposele katao Gotenya endakali Kataisa Jisasa lao masoo minao Epesasa kalyamino dupanya pepa dake nambame pyao peekelyo.
2Naimanya Takange Gotepa Kamongo Jisasa Kataisapame nyakama kandao mona epe mende palyetala nyakamanya mona doko lyuu lasekena.
3Naimame naimanya Kamongo Jisasa Kataisanya Gote-kisa Takange doko lao tama pimana! Baame baanya ketae kaitinya singi epe dupa pitaka Kataisa-kisa naima dia!
4Goteme yuupi kaitipi wapuala nayao pituu naima baanya enomba ongonya etete epe koopi mende nasingi katataminopa lao baame Kataisa-kisa naima yapao nyia-pyaa.
5Wamba baa tangeme pitona lao auu pyoo masiamoli pyoo naima nea kayao Jisasa Kataisa-kisa naima baanya ikiningina lao yapao nyia-pyaa.
6Naimame baanya mona epe palenge tii pipae doko lao lalyoo kalyepale lao Goteme baanya mona setenge Ikiningi doko-kisa naima etete kondo kaya.
7Gotenya mona setenge Ikiningi dokome baanya taiyoko kai leamo dokome naima kii tamao nyepae koo kunanya nepatae kalyamano. Gotenya mona epe palenge doko eteteaka yale paka!
8Baame baanya mona epe palenge doko naima-kisa epao palisakao baanya mana kandelyamano dupapi dupanya masilyamano dupapi dupa pitaka naima dia.
9Goteme Kataisa-kisa pitona lao yalo pyoo masoo kateamo doko baa tangeme masiamoli pyoo naima kondo kayapala laitaka pia.
10Baame yalo pyoo masiamo doko dapa: indupa Gote baame isoo kalai pilyamo doko pyoaka pao tenda pipenge gii doko ipatamopa baame yuunya singipi kaitinya singipi dupa pitaka Kataisa-kisa nyoo elyambu petala dupa pitakanya Kataisa baa aiyomba joo katena latona lao masia-pyaa.
11Goteme opale mende pipuli lao masilyamo dupa pitaka pingi. Dopaka pyoo wamba baa tangeme masiamoli pyoo naima Kataisa-kisa makande petala baanya endakali joo katataminopa lao yapao nyia-pyaa.
12Naima Kataisa wambao malisoo kateamano endakali dupame Gotenya tii pipae doko lao lalyoo katataminopa lao baame dopa pia-pyaa.
13Goteme nyakama pyoo nyiana lapae kiningi pii epe doko nyakamame apata sepala Kataisa lao masoo miniaminopa Goteme baanya Oli Sipitisa dituna leamoli pyoo diamo dokome nyakama baanyana lao kongali pia.
14Goteme naima epe maitakao ditamo dokonya makande pyoo mende Oli Sipitisa doko wambao ditia. Dopa piamo dokonya baame baanya endakali sambao nyiamo dupa etete mokatana lao masilyamano. Dokonya naimame baanya tii pipae doko lao lalyemana!
15Tenge ongonya minao nyakamame Kamongo Jisasa lao masoo minao katao Gotenya endakali dupa pitaka auu kayao kalyamino lapae sepala, nambame nyakama lao masetala Gote lao yaka pilino leo doko mee lawaka kalyo. Nambame nyakama nisalanya Takange tii pipae naimanya Kamongo Jisasa Kataisanya Gote doko lao loma soo tee lekelyo. Nyakamame baa lao etete auu pyoo masalapale lao Oli Sipitisanya mana kandapenge dokopa Goteme panasekeamo dupa lao masepenge dokopa dolapo baame nyakama dina lao nambame loma sakao kalyo.
18Goteme nyakama nyalapale lao ipupa leamo masoo malisoo kalyamino doko akipi lawapi, baame baanya endakali dupa epe maituna leamo dupa etete longo paka silyamona lawapi, dee baanya pupu lapae naima masoo miningi endakali dupa-kisa singi doko yale etete lamona lawapi nyakamame dutupa masalapale lao Goteme nyakamanya monanya lenge doko tii pisekena lao loma sekelyo.
20Baanya etete pupu lapae naima-kisa silyamo mendai dokomeaka baame Kataisa malunya sakatasetala kaiti yuu dokonya baanya kingi tolae-kaita nyoo pisia-pyaa.
21Kaitinya isingi dupapi, enomba nyoo isoo katenge dupapi, pupu lapae dupapi, kamongo dupapi, yuu dakenya minilyamino kenge dupapi, kaitinya minilyamino kenge dupapi dupa pitakanya Goteme Kataisa etete ketae katena latala dupa pitaka baanya moko pundipundi dokonya sina lea-pyaa. Dupa pitakanya aiyomba joo ulusale katenge Kataisa baa Goteme naima sosa doko dia.
23Sosa doko Kataisanya yonge. Kataisa sosa dokonya tumbatae katenge. Baa yuupi kaitipi dupa pitakanya tumbingi.
