Eklisiastes 1:1-9

¹Selusien keil ekek avi selusien onen Solomon, Meatin Tahihiseien, koa vi natin asuv houlu Deved ka asuv houlu onen me-Isrel keil koa ro en taon ten out Serusalem.

²Meatin Tahihiseien viteni vit, “Umen vasi keil orer vi heisav vis vi heisav enges. Anatin, tounah vasi koa romul romumoni en moulien orer hemai hehi heisav enges.”

³En avong vasi en moulien onom kolehkao en umen onom en out netan ekek. ?Ka kovotin asa en keite teni? Matien enges.

⁴Vangi meatin tai, avas keil en out netan, amoul ka umat, ka vangi meatin sav umai akes vulie. Ka out netan lises mul vatte tas, tounah tovuol mul viles.

⁵En avong vasi, meteiai mea ka muloh va vio … vita munu. Evus, kalah eris vina en vulin keke hemea ris.

⁶Eang emun, toio mai ka va, ka lengav emun mai ka va, keilu lukarali heisav va vio … luva ris en vulealu.

⁷Oai keil amue uva en atas, ka atas sakras vahilelau. Oai mul mea mai vi ous. Evus, ous enek mus vita netan ka mue eris vita en atas.

⁸Tounah vasi rovilestei, mul vatte tas. Avek mah en sakien keil enek, ka nasakras emun mahiten etai tounah usili. Meter lele va vio … ka en vati vales tei ris tounah emau. Ralinger longlong va vio … ka en vati valonglong tei ris emau.

⁹Tounah vasi koa mai rohtoh, hemai ris hekistal. Ka tounah koa meatin tai mumoni tuai, meatin sav hemai houmoni hesuvali. En out vasi netan, tounah tovuol vahi heite hau.