Eklesiastes 2:3-25

³U gu trulnag e gonop, mu gu leamnag ni nggu felfelan’ nigeg ko wayin me fel’ e yafos rog. Gu leamnag ni irera’ e bin th’abi fel’ e kanawo’ ni nge par e yafos ko girdi’ riy, ni aray feni ngoch nap’an u fayleng.

⁴Kug mu’nag boch e maruwel nib gagang’. Ku gu toy boch e naun ngog ma ku gu yung boch e milay’ ni grape.

⁵Gu ngongliy yung i milay’ nge yung i ban’en ni gu fal’eg rogon nggu yung gubin mit e gek’iy ngay nma yib wom’ngin;

⁶gu ker e pi lipath ni nge mit e ran riy, ni fan ko gek’iy.

⁷Gu chuw’iy e sib ni pire’, ma boch e sib e ni diyannag u lan e tabnaw rog. Pire’ e gamanman rog ngak e pi’in ur pired u Jerusalem.

⁸Ku gu ulunguy e silber nge gol ni i yib ko pi chibgil ko pilung ko fapi nam ni ug gagiyegnag. Pumo’on nge ppin e ur tang niged gag, ma urngin e ppin ni yag ngog e ke thum’ ngaru’ oren e tin ma yim’ e pumo’on ni bochan.

⁹Rriyul, ni gu ba madangdang ngak e pi’in ni ku ur pired u lan yu Jerusalem, ma gonop rog e de pageg bangiyal’.

¹⁰Urngin e tin ni gu ba’adag e go’ yag ngog. Dariy bmit e felfelan’ ni gu siyegneg riy. Gu uf uf ko urngin e tin ni gu maruwliy, ma urngin e pin’ey e aram puluwog.

¹¹Ma aram mu ug leamnag rogon urngin e pin’en ni ku gu ngongliy nge feni gel e maruwel ni ug tay riy, mu gu nang ni dariy ban’en ni fan. Bod ni gu be lol’oeg e nifeng ndariy gam’ingin ngabang.

¹²Ya demutrug rogon, ma reb e pilung e kemus nrayag ni nge rin’ e tin ki i rin’ e bin kafram e pilung. Ma aram mu gu tabab i leamnag ko ri mangfan e gonop, tharthar nge balyang.

¹³Ahh, ku gu nang, “Gonop e bfel’ boch ko balyang, ni rbod rogon e tamilang ni bfel’ boch ko lumor.

¹⁴Girdi’ nib gonop e ba tamilangan’ ko uw e gin be sor ngay, ma pi’in yad bbalyang e dar nanged.” Machane ku gu nang ni ta’ab n’en e be son nagdad ni gadad gubin.

¹⁵Mu gu leam mug ga’ar, “N’en ni be buch rok e pi’in balyang e ku ra buch rog. Ere mang e n’en nrayag ngog u fanag gonop?” Mu gu fulweg, “Dariy, ta’abn’en ma dariy.”

¹⁶Dariy be’ nra yib ngan’ e pi’in gonop ara pi’in balyang. U lan e pi rran ni bayib e gadad gubin ni yira pagtalindad. Gadad gubin ndabisiy ni gadad ra yim’, ni pi’in gonop nge pi’in balyang ni ta’reb rogon.

¹⁷Ere yafos e ke yib i aw ni dakriy fan u wun’ug, ya gubin ban’en riy ma dariy ban’en nike yag riy ngog kemus ni oloboch. Urngin riy mab m’ayfan; ku ug lol’oeg e nifeng.

¹⁸Dariy ban’en ni gu maruwliy nggu thognag nib ga’fan u wan’ug, ya bay gu digey nga pa’ e en ni bayib nga luwag,

¹⁹rayag ni be’ nib gonop fa bbalyang, mini e manang? Me milfan gubin e tin ni ku gu maruwliy ngak, nge urngin ni yagnag e gonop rog ngog ko re fayleng ney. Gubin nib m’ayfan.

²⁰Ma aram mu gu kolngan’ug ni ug maruwel nib gel.

²¹Mu maruwliy ban’en u ga’ngin e gonop rom, nge llowan rom, nge fanam salap, ma aram ma ga pag ni urngin nga pa’ be’ nde maruwliy. Rrib m’ayfan, made mat’aw!

²²N’umngin e yafos rom ma um maruwel ma be magafan’um, ere mang e yira guy nike yib riy?

²³N’umngin nap’an ni ga be par, ma urngin e pin’en ni ga be ngongliy e dariy ban’en ni beyib riy ngom ma kemus ni magfan’ nge amith lanyan’. Ni mus ko nep’ ma lanin’um e der toffan. Urngin nib m’ayfan.

²⁴Bin th’abi fel’ ngak be’ ni nge rin’ e nge abich me garbad me felfelan’ ko tin ke thognag. Ma ku gu nangfan e chiney, ni mus ko biney ni yib rok Got.

²⁵Ya ku bu uw rogon me yag ngom ban’en ni ngam koy fa ngam felfelan’ ngay?