Ekaresia 1:9-24

⁹Aminge setiri dadabetiri, God setiri, Iesu nu utuda vitíri, forogai fira gagojiri ne gosuseri.

¹⁰Ne fuge fetedo gosero, gegenembo etoto naká, nenda asugari foyago beká asugusera aimi, fera nemokena isagha useri.

¹¹Isagha edo, siseri, “Ne anakora Frovensi Galilee aminda, Iesu da geka nininguse nemonde dabade ya foa ghedo ghusevu. Ava sedo, erá buneove dae sise resera. Iesu oroko vitíri geva amo, nu kau daba aminga ava, amboda sekago jovereghe vose furarira.”

¹²Aminge setero ainda amboda, Iesu da ambo jimbi enda jiro fumbari javo Orivi aminda ghe itako sokago era, Jerusalem buvurutuseri.

¹³Buvudo, nunda ambo jimbi beká: Peter, John, James, Andrew, Philip, Thomas, Bartholomew, Matthew, James nunda nunombo Alphaeus da mandi, Simon ‘Reighi Susu’ seraera a James da nunombo eni nunda mandi Judas aimi, era nenda kamboda teteruseri. Teredo, kambo duruda á dodo ikáda era viti avido ghusera aminda, era vivituseri.

¹⁴Iesu da ambo jimbi a noi Mary, nunda jamenade a evevetu mendeni ainde dabade sifo ghousa totorugedo, dubo dabako use banungedo ghuseri.

¹⁵Aminguse irero, sifo eni evetu genembo Iesu tumondedo ghusera amo, kau 120 aminga ava, fera totoruguseri. Totorugedo anumbetero, Peter nu eredo geka eminge sisira,

¹⁶“Nanda nano namendi, Asisi Kakara setiri, David rejoá Judas dae gefusira, ava sirorusira. Amo God da Geka ava sedo, setiri sirorusira. Namondeda Bajari Iesu, namane Judas de isambu 12 ava, nunda ambo jimbi aoro dae sedo, anakora gategusira. Avata Judas nune evetu genembo mendeni unumbedo budo fera, Iesu sandi bundiseri.

¹⁸Jusi embo da babojegari moni mutero, Judas aimi budo vare eni ombudo, ira aminda, nu tofo mandi duboda ivasi usira. Ivasi edo jorughe endada duriri, tini de bejedo jetini buvurutusira.

¹⁹Amingetiri, Jerusalem embo ava ningido, vare ainda javo ‘Akeldama’ jijighuseri. Ainda tuka mo, ‘Ororo da Vareri.’ Ava sedo, David God Da Yaru Buku aminda gefusira ava, isagha usira.

²⁰Amo, eminge gefusira: ‘Nunda nati, evetu genembo isambu taraghe tefo aeteri, eni aminda jo irae aeteri.’ A eni mo: ‘Nunda saramana da vasa ava, genembo eniimi barira.’

²¹“Ava sedo, namonde genembo eni saoro nunda vasa bare! Mave John bafataito edo ghusira ainda sifoda, tuturo edo namonde dabade deinghedo ghusira. A nu namonde dabade iriri, Iesu nu ambu jebugedo ere utuda vitisira. Genembo eni aminga ava gi saoro, Judas da vasa bare! Budo, namane isambu 12 ava dabade irise, Iesu nu nange nange ambarida ghe jebuge erorusira, ainda bino ava osa saore!”

²³Aminge setiri, ne eredo gegenembo etoto naká ava setero nengae fefetuseri. Genembo eninda javo mo, isambu etodaba nakári. Amo eviri: Joseph, Barsabbas, a Justus ri. A genembo eninda javo mo, Matthias ri.

²⁴Ne eminge banunguseri, “Bajari, ni evetu genembo da janje joká ava nine kasama eraesa. Judas ninda saramana dodo, ari ekoko mino mutari da vasada isira. Ava sedo, nunda vasa bare dae sedo, mavejo uju eresa ava ijugaso, saoro fetedo, numbarago ninda ambo jimbi arira,” aminge banunguseri.