ECLESIASTÉS 3:1-12

¹Toteco quitlalijtoc se cuali hora para sesen tlamantli. Nochi tlamantli catli monequi tijchihuase quipiya tonali quema mochihua.

²Onca se tonal para titlacatis huan onca se tonal para timiquis. Onca tonali para titlatojtocas huan onca tonali para tijhuihuitlas catli tijtoctoc.

³Onca tonali para titlamictis huan onca tonali para titepajtis. Onca tonali para titlasosolos huan onca tonali para tijcualchijchihuas.

⁴Onca tonali para tichocas huan onca tonali para tihuetzcas. Onca tonali para timotequipachos huan onca tonali para timijtotis.

⁵Onca tonali para tiquinsemanas teme huan onca tonali para tiquinsentilis. Onca tonali para tijcuanajnahuas se masehuali huan onca tonali para amo tijchihuas.

⁶Onca tonali para tijtemos huan tijpantis tlamantli huan onca tonali para tijpolos. Onca tonali para titlaajocuis huan onca tonali para tijtepehuas catli ticajoctoc.

⁷Onca tonali para tijtzayanas se tlenijqui huan onca tonali para tiquijtzomas catli tzayantoc. Onca tonali para timocamatzacuas huan onca tonali para ticamanaltis.

⁸Onca tonali para titeicnelis huan onca tonali para titecualancaitas. Onca tonali para tlahuilanalistli huan onca tonali para tlasehuilistli.

⁹Huajca ¿tlaque quitlani se tlacatl tlen nochi itequi catli ohui catli ica mosiyahuiltía?

¹⁰Na nimoilhuijtoc miyac tlen nochi nopa miyac tlamantli tequitl catli Toteco quinmacatoc masehualme para ipan ma motequihuica. Huan ya ni catli niquita.

¹¹Toteco quichijtoc para sesen tlamantli ma eli cuali huan ma mochihua ipan nopa tonali catli quinamiqui. Nojquiya quitlalijtoc ipan iyolo sesen masehuali para ma quimati catli nelía ya amo quema miquis. Nojquiya quimati para nopa tlamantli catli nelía ipati ipan ni tlaltipactli huejcahuas para nochipa. Pero niyon se masehuali amo yajati quimachilía nochi itlalnamiquilis huan itequi Toteco catli yaya quichijtihualajtoc tlen ipejya huan nochi catli quichijtiyas hasta itlamiya.

¹²Huajca amo onca seyoc tlamantli catli achi cuali para masehualme. San monequi paquise huan quichihuase catli cuali quema noja yoltoque.