1Abire yãi ò Kirisi yãdannɛna káakupↄnↄ kpá kpɛ, ò gɛ́ arɛ ari ò gↄ̃ gbɛ̃ pɛkɛrɛnanↄ ũ. Adi kɛ óni ɛra ògↄ̃ yãtãkpatɛna dínↄ gbɛ̀ sísi dↄnlo: Kpɛlina yã gɛ̀nↄnɛɛ, ludanaanikɛnaa,
2da'itɛ yãdadanaa, ↄnammanaa, gɛ̀nↄ vuna ke zia yãkpatɛkɛnaa.
3Tó Luda wè, óni yã birenↄ kpá kpado ò gɛ́ arɛ.
4Zaakũ tó gbɛ̃ wɛ́ kɛ̃̀, à Luda gba lè, a baka kú Luda Nini gũmmɛ,
5tó à Luda yã kũ andunia kũ àtɛn su gbãnao í kɛ̀, à a nna dↄ̃̀
6tó à fùa, zɛ́ kun kũ à ɛra à nɛ̀sɛ litɛ doro, zaakũ àtɛn Luda Nɛ́ pá lía dↄmɛ, àtɛn wé'i daa gupuraamɛ.
7Tó legũ tɛn ma zĩtɛ gɛ̃̀n baaakↄ̃ àtɛn mↄtↄ le, akũ à pↄ́ kũ à àre vĩ búbarinↄnɛ bùtɛ, Luda dì arubarika dan.
8Tó à lɛ̀ kũ lɛ̀karaaoo bùtɛ sↄ̃, à ginaamɛ, à zã̀ kũ lɛ́kɛnnɛnaaoro. Ani mì dɛ kũ tɛ́omɛ.
9Ákↄ̃nↄ sↄ̃ ma gbɛ̃ yenyĩdenↄ, bee kũ o ò lɛ, ó laakari kpatɛna á yã musu kũ á kú kũ yã mana kũ ò bò surabana zɛ́ gũnnↄ.
10Luda dì yã kɛ a zɛ́a, á yãkɛnanↄ kũ yenyĩ kũ á vĩ kãaoo ni sãaguro, zaakũ a kpányĩ kɛ̀ a gbɛ̃nↄnɛ, akũsↄ̃ á kpɛ́ átɛn kɛ.
11Ó ye á baadi gↄ̃ ania vĩ lɛ ari a lɛ́a, de ásun sika kɛ pↄ́ kũ á wɛ́ dↄi yã musuro.
12Ásun ma'ã kɛro. À gbɛ̃ kũ òtɛn Luda náani kɛ kũ mɛnao òtɛn pↄ́ kũ Luda a lɛ́ sɛ̀ lenↄ ágba sɛ́.
13Gↄrↄ kũ Luda tɛn lɛ́ sɛ́ Ibrahĩnɛ, kũ gbɛ̃ke kun deala à sí kãaoro, a yãin à sì kũ a kunnaao
14à pìnɛ, áni arubarika daagu yãpura à tó a buri karanɛ.
15Ibrahĩ mɛna fↄ̃̀, akũ à pↄ́ kũ Luda a lɛ́ sɛ̀nɛɛ lè.
16Òdi la da kũ gbɛ̃ kũ à deńla tↄ́omɛ. Ladana mɛ́ àdi tó ò yã yãpura dↄ̃, akũsↄ̃ àdi lɛ́kpakↄ̃ana kɛ̃kↄ̃ańnɛ.
17Luda ye à mↄ́ gbɛ̃ kũ a lɛ́sɛna ni gↄ̃ ń pↄ́ ũnↄnɛ swáswa kũ a lɛ́ litɛna vĩro, akũ à sì kũ a kunnaao.
18Lɛmɛ yã mɛ̀n pla kun kũ à litɛna vĩro, Luda ni fↄ̃ à ɛ́kɛ to a musuro. Yã pìnↄ tɛni ókↄ̃nↄ kũ o nainↄ gba swɛ̃̀ manamana, de ò tãmaa kũ ó wɛ́ dↄi kɛ sikaa sari.
19Ó tãmaa bire vĩ ó wɛ̃̀ndibadↄbↄ ũ. À náani vĩ, akũsↄ̃ à gbãna, àdi gɛ̃ kũoo Luda kúkia lábure kpɛ,
20gu kũ Yesu gĩnakɛ à gɛ̃̀n ó yãi, à gↄ̃̀ sa'oriki ũ ari gↄrↄ sĩnda pínki lán Mɛlɛkizɛdɛki bà.
