Diye Di Odoo 18:14-27

¹⁴Osoloso Poloye epedee to hee takalame molome, Galiyoye Yu odoo dimapoo egeesee takaso, “Yu odoo, edebeeyo goo tokenee toowa too diepi o, Loum gamaleeyo tei gababia diepi, ayo o goo medee meediliyo.

¹⁵Esino nibada tei goo maga goo pepooko tosimiga, niso meedilei tekepo! Esiga a goo egeesi meedilei gowoo,” diso.

¹⁶Eseme yo to hagee dimapoo takoloso goo meedili moso maga diye diso.

¹⁷Eseme goo meedili moso ma kulodu odoo susuga oso howo gisili moso wiligi odoo Sostene toloso weiso. Esino Galiyoye goo hagee ogoloso yimapoo goonee diso.

¹⁸Polo Kolin mi mapoo tei telaga odoo sabolo beeame bei badebeiso. Osoloso yo Silia mi mapoo wedi dilame badolone, Akwila sabolo Plisila sabolo hodobo Kenekeleya mi mapoo sibadeeso. Omapoo Polo yayo Godee sabolo to magoo dodolone, o wudu waso.

¹⁹Osoloso diba du toloso see Epeses mi mapoo soowaso. Epeses mapoo dileso peledoboloso, Plisila dio Akwila dio omapoo holoogooso. Polo Epeses mapoo osee badolone, Yu odoowo howo gisili moso mapoo peleso, Yesuwo goo maga Yu odoo sabolo to moumeleeso.

²⁰Eseme tei telaga odoo oso Polo mapoo egeesee takaso, “No beeame sage ibolo badalai tekepo,” diso. Esino Polo yo mi omapoo badalai goomegele goo takoloso see egeesee takaso,

²¹“Godeeye goomogoga, a see nimapoo wedi sibileiso,” diso. Osoloso yo du toowa toloso Epeses mi maga Kasalia mi mapoo diso.

²²Polo Kasalia mapoo sibileso du oluguloso see Yolusalem mapoo palaso, tei telaga odoo mapoo emegei di to takalame. Poloye Yolusalem tei telaga odoo dimapoo emegei di to takoloso, see Antiyoka mapoo wedi diso.

²³Osoloso Antiyoka mapoo beeame deiyepo badoboso, see Galesia mi sabolo osoloso Piligia mi sabolo mapoo silone, tei telaga odoo diayo tei too kibilame pidimo sileeso.

²⁴Domo omapoo Yu odoo Apolosee, Alesendilia mapoo badeli odoo ee Epeses mapoo simiso. Yo Godeeyo to booka mapoo hogugu dia gooleedoo. Esiga yayo Godeeyo to taka domo mapoo medee tekepo takeli.

²⁵Odoo hagee Lodee Yesuwo goo ee odoo heeso eligiso. Esiga yayo Yesuwo goo ee kitulugu sabolo tekepo eligiliso. Esino yo odoo Yesuwo hu maga howomoo howo sauwidili goo ee gooleedelega badolone, wulo Yoneeye odoo susuga howomoo howo sauwidiga goo ono gooleedoloso badebeiso.

²⁶Osoloso Apoloseeye Yu odoowo howo gisili moso mapoo peleso, ebilega, Godeeyo to ee kitulugu sabolo takemeleeso. Eseme Plisila dio Akwila dio o to dulone dobolone, yo dibada moso mapoo ido dileso, Godeeye odoo mapoo gie badeli teneli eyo goo maga yimapoo medee eligiso.

²⁷Osoloso hamamee Apolosee Akaya mapoo dilei goomogaso. Eseme tei telaga odoo oso tekepo dolone, to hogugu ee Akaya tei telaga odoo mapoo teneeso, yo sibileso dibolo badolone diba pidilame siboga, diayo yimapoo goomoga to tenelame. Eseme yayo omapoo dileso tei telaga odoo medee pidimeleeso. Osoloso odoo hagee diayo Yesu mapoo Godeeye mesilone wulayo pidi goo maga olo tei tooso.