Dehet deng Aan in Nutus sas 2:5-34

⁵Dedeng na, muik atuil Yahudi mamo deng nusa-nusa in ne apan-kloma ki ngias maas nakbua se Yerusalem. Oen dalen nas kom naseke in muid Ama Lamtua Allah.

⁶Nikit oen ming haup hoos na kon, oen maas nakbua se maan na. Kon oen mesa-mesam ming haup oen dasi-dehet esan deng, Lamtua Yesus atulin nas. Undeng na, tiata oen hera-herang.

⁷Oen totoang hera-herang le tek apa noan, “Atuli-atuil in aang nias totoang, atuil Galilea ta loo?

⁸Mo taon elola le kit ming oen aa nini kit mesa-mesam dasi-dehet tia?

⁹Kit mamo maang deng propinsi Patia, Media, Elam, Mesopotamia, Yudea, Kapadokia, Pontus, Asia,

¹⁰Frigia, Pamfilia, Mesir, deng Libia man dani nol kota Kirene; ela kon kit tenga lias maang deng kota Roma;

¹¹muik in maa kon deng nusa Kreta, nol teng deng dale Arab. Kit tenga lias atuil Yahudi, nol muik kon atuil deng bangsa-bangsa didang, man tamas daid agama Yahudi. Molam kit totoang ming haup atuil nias aa deng sa-saa in muun isi, man Ama Lamtua Allah in daek hidi son nas nini kit dasi-dehet mesa-mesa. Wuih, ni muun isi!”

¹²Oen totoang ngaa-bahan le ketan apa mes nol mesa noan, “Taon elola le daid ela lia le? Un nahin na elola le?”

¹³Mo muik atuil didang dehe, man bilu-aa one. Oen tek noan, “Hoeh! Toe mudis deken! Ta oen mahus ngele isi!”

¹⁴Petrus nol Lamtua Yesus aan in nutus at hngul esa kas se na. Kon Petrus keko lako el muka-mata lua, le un nikit in aa nol atuil hut mamo man in maa nakbua se na ngas. Un aa mumuun noan, “Ina-amang nol kaka-paling totoang! Mi man atuil Yahudi, nol mi man maa le daad se kota Yerusalem! Tidi mi hngilan nas le hii auk in aa nia, ta auk le tek mi totoang, mo mi musti nangan auk in aa ni babanan.

¹⁵Mi bali noan atuil nias mahus se? Loo! Nangan, ta taon elol le atuli niun mahu oskaong bii nia? Salolen le halas-sam diuk sipa!

¹⁶Mo mi ming atuil nias aa nini mi dasi-dehet mesa-mesa. In toma ka elia: dedeng na, Ama Lamtua Allah nini Un mee-baha mesa, ngala Yoel, le tek meman deng dais man noan:

¹⁷‘Ama Lamtua Allah tek noan, “Eta lelo-lelon nas mana le hidis sam, Auk le boho Auk Koo Niu ki lako se atuli las totoang. Se mi anan biklobe las, nol mi anan bihata las, le Auk taos daid Auk mee-baha. Mi anan muda kas, mam ngat net asa man Auk in le tulu-balang bel one ngas. Nol mi atuli-atuil blalan nas, mam natloa haup asa man Auk in le tulu-balang bel one ngas.

¹⁸Tom nol lelo-leol man in mana le hidi ngas sam, Auk bel Auk Koo Niu ki lako se Auk atulin in loka-loka ngas totoang. Auk belen lako se biklobe las, nol Auk belen lako se bihata las. Le halin mam oen dehet asa man Auk in tek one ngas.

¹⁹Mam Ama Lamtua Lelon na maa. Mo Lelon na maa lius lo bii kam, Auk tulu tada-taad herang se apan-dapa ku muna. Taad herang nas tuladang el, lelo la dadi mitang; nol bulan na kon daid mea, banansila el dala ka. Auk kon le daek dasi-dais in muun isi se apan-kloma kia. Dasi-dais nas banansila el, dala, ai, nol nus mitang buan-buan sakes lakos bus el apan-dapa kua. Mo mam lius oras na, asii man haman le nodan tulung se Ama Lamtua Allah lam, un man haup boa-blingin.” ’ Yoel in teka ka ela.

²²Tiata kaka-pail atuil Israel me! Tidi mi hngilan nas, le hii asa man auk in teka nia. Ama Lamtua Allah tulu nal Yesus, Atuling Nasaret ta son. Kaim tanan son noan, na toma, undeng kaim net esan son, Ama Lamtua Allah pake Yesus le daek tada-taad herang, nol daek dasi-dais man in muun dui hihidi ngas. Mi kon taan dais nias, undeng Yesus tao tada-taad herang nas se mi hlala son.

²³Mo mi keo tele Una, hidim mi laok aa nol atuil daat tas, le pauk tele Un se kai sangsuli la dapa. Molota, Ama Lamtua Allah taan nas totoang son deng lolo hmunan nua, nol baktebes daid muid Un in ator son na.

²⁴Meman mi tao ela, didiin Un mate baktetebes son. Mo Ama Lamtua Allah kom le Yesus mate napiut lo. Undeng na, le Ama Lamtua sao Un deng hmate ka in kuasa ka, halin Un haup in nuli pait. Tiata hmate ka in kuasa ka nal Un pait lo son.

²⁵Hmunan nu laih Daud dul meman son deng Yesus elia: ‘Auk tana le Ama Lamtua leo-leo nol auk tutungus. Tiata muik tahan asa mes lo kon, man tao nahu nal au, undeng Ama Lamtua Allah se auk halin ni tutungus.

²⁶Tiata auk daleng ngi kolo; hidim auk naka-nahalit Un tutungus, nol auk kon hii-natang Una.

²⁷Ta Un nang soleng auk hmanging ngi napiut se atuil in mate ngas mana la lo. Nol Ama Lamtua nang Un Atulin Niu ka aap-sisin na, le daat se bolo dalen lo.

²⁸Ama Lamtua tulu bel auk lalan in nuil toma ka son. Undeng na, auk daleng ngi kolo isi, lole Ama Lamtua leo-leo nol auk tutungus.’ Ni man laih Daud dul pesang son lolo hmunan nua.

²⁹Elia kaka-paling totoang! Bel auk dola, le auk tek mi langa-langa deng kit upun Daud. Un in aa na, un aa deng un apa ka esa lo. Undeng un mate le puan son, nol un utu ka ne kit hlala kia, maa pes leol neot nia.

³⁰Laih Daud na mo, daid Ama Lamtua Allah mee-baha. Nol un tana le Ama Lamtua hid nini sumpa noan, mam laih Daud in hua-koet mes man kil prenta. Atuling na, man Ama Lamtua tulu meman son deng lolo hmunan nua.

³¹Dedeng na, laih Daud ngat katang laok el mata lua. Nol Un tek muna deng Atuling man Ama Lamtua in tulu meman son na. Mam Atuling na mate, mo Un nuli pait deng Un in mate ka. Hidim laih Daud kon tek noan, Atuling na daad napiut se atuil in mate ngas mana la lo, nol un aap-sisin na kon daat lo.

³²Atuling man laih Daud in teka-tek son na, Yesus! Ama Lamtua Allah bel Un nuli pait son, deng Un in mate ka. Kaim totoang nias net Un in nuli pait ta, nini kaim matan beas esan!

³³Tiata halas nia, Ama Lamtua Allah nikit sakeng Yesus son, le kil pangkat in lapa dudui. Hidim Un daad ne Ama Lamtua Allah halin kanan na, se mana, man Ama Lamtua Allah tao pesang meman son na. Nol Un Ama ka, Lamtua Allah belen Koo Niu ka, muid asa man Un hidan meman son, lolo hmunan nua ka. Hidim Un Ama ka kon hid le bel Un Koo Niu ka bel kita. Tiata asa man mi in ming, nol mi in neta nia, Ama Lamtua bel Un Koo Niu ka.

³⁴Laih Daud esa sake lako sorga lo, mo un dul noan, ‘Ama Lamtua Allah tek auk Lamtuan na noan, “Daad se Auk halin kanan nia, se mana, man Auk tao pesang meman son nia,