Dagiti Salmo 78:19-39

¹⁹Nagsaoda iti maibusor iti Dios; kinunada, “Maikkanatayo ngata ti Dios iti panganantayo idiay let-ang?

²⁰Kitaenyo, idi binaotna ti dakkel a bato, nagpussuak ti danum ket nagluppias dagiti waig. Ngem makaited met kadi iti tinapay? Mangipaay kadi isuna iti karne kadagiti tattaona?”

²¹Idi nangngeg ni Yahweh daytoy, nakaunget isuna; isu a simgiab ti apuyna a maibusor kenni Jacob, ket nagdissuor ti pungtotna ti Israel,

²²gapu ta saanda a namati iti Dios ken saanda a nagtalek iti panangisalakanna.

²³Nupay kasta, binilinna ti tangatang ken linuktanna dagiti ruangan ti tangatang.

²⁴Pinagtudona ti mana nga agpaay a kanenda, ken intedna kadakuada ti trigo manipud iti langit.

²⁵Kinnan dagiti tattao ti tinapay dagiti anghel. Inyegna kadakuada iti aglaplapusanan a taraon.

²⁶Pinagpul-oyna ti angin nga aggapu iti daya a mangpuyot iti tangatang, ken inturongna ti angin ti abagatan babaen iti pannakabalinna.

²⁷Pinagtudona iti karne kadakuada a kasla tapok, dagiti tumatayab a kas kaadu dagiti darat iti baybay.

²⁸Nagtinnagda iti tengnga ti kampoda, iti aglikmot dagiti toldada.

²⁹Isu a nangan ken nabsogda. Intedna kadakuada ti tartarigagayanda.

³⁰Ngem saanda pay latta a nabsog; adda pay laeng kadagiti ngiwatda ti taraonda.

³¹Ket dinarup ida ti pungtot ti Dios ket pinatayna ti kapipigsaan kadakuada. Pinasagna dagiti agtutubo a lallaki iti Israel.

³²Iti laksid daytoy, agbasbasolda latta ken saanda a namati kadagiti nakakaskasdaaw nga aramidna.

³³Ngarud pinaababa ti Dios dagiti al-aldawda, napnoan ti buteng dagiti tawtawenda.

³⁴Tunggal parigaten ida ti Dios, rugianda a biroken isuna, ket agsublida ken sipapasnekda a mangsapul kenkuana.

³⁵Lagipenda a ti Dios ti dakkel a batoda ken ti Kangangatoan a Dios ti mangis-ispal kadakuada.

³⁶Ngem pasabluganda isuna ken agulbodda kenkuana kadagiti sasaoda.

³⁷Ta dagiti pusoda ket saan a nagtalinaed a sipupudno kenkuana ken saanda a napudno iti tulagna.

³⁸Ngem iti kinamanangngaasina, pinakawanna dagiti nagbasolda ket saanna a dinadael ida. Wen, adu a daras a linapdanna ti ungetna ken tineppelanna amin ti pungtotna.

³⁹Nalagipna a naaramidda iti lasag, kasla angin a lumabas ken saanen nga agsubli.