Dagalene 26:9-64

⁹Eliaba igini ogodagua hene. Nemuelebi Dadanabi Abiramabi henego ai wali agalime Abiramala Dadanala libu haru tinaga agali haguane dabo helearia libugua Mosese Aronolahondo mine halu libu Kora aria hearu baba hatago hene. Ani hatagoho howa ti bibahendeme Anduane Homogonaga bi doga haga hene.

¹⁰Ani bialu hemiria dindi gaibuki bialu gundu uli timbuni mbira wiyagola agali mine hagane uruni bibahende dindi uli ogoniha haealape hai halu dindi lone gegebu dai buwa agali biaru dindime yi hai ho wahene. Agali uruni ti bibahende Kora halu ibu aria handari kirani pira duria (250) biaru irame dai hayangi dege ani homene. Anduane Homogohanda ibunaga wali agali bu hearu mini hongoheore wilo mo wiahalu tigua mana ko ogonidagua nabule lelonaga ani bini.

¹¹Anigo Kora igini hearu ti horo ogoningi nahome hene.

¹²Simiono ibu hameigini ogodagua hene. Nemuelebi Yaminibi Yaginibi

¹³Serabi Saulubi hene.

¹⁴Agali duriali uruninaga aguanene daosini dege pira kirani kira halu handari kira (22,200) bibahende hene.

¹⁵Gada hameigini ogodagua hene. Sebonobi Hagibi Sunibi

¹⁶Osonibi Eribi

¹⁷Arodobi Arelibi uruni hene.

¹⁸Agali karia uruninaga igini aguaneneru bibahende daosini dege pira mariani handari duria (40,500) bibahende hene.

¹⁹Yuda hameigini ti henego ogodagua. Selabi Peresebi Serabi Heseronobi Hamulubi uruni hene. Perese ibu Heserono Hamulula libu aba hene. Bamba Yuda igini kirali Erebi Onanabi Kenana dindiha howa homene.

²²Agali duriali uruni ti aguaneneru dagalamaga howa daosini dege pira kariani waragaria halu handari duria (76,500) bibahende hene.

²³Isaga hameigini ogodagua hene. Tolabi Pubabi Yasububi Simironobi hene. Puba hameigini tinime tini mini Punu laga hene.

²⁵Agali mariali uruni tinaga agali bibahende dagalamaga halu daosini dege pira waragariani maria halu handari tebira (64,300) bibahende hene.

²⁶Sebulunu hameigini ogodagua hene. Seredebi Elonobi Yalelebi tebirali hene.

²⁷Hameigini tebirali uruni tinaga aguaneneru bibahende daosini dege pira waragariani handari duria (60,500) bibahende hene.

²⁸Yosebe ibu igini kirali hangu Manase Eberaimila hene.

²⁹Manase hameigini ogodagua hene. Magiri ibu Manase igini howa ibuni Gileada aba hene. Gileada ibu damene ogodagua hene. Iesebi Helegebi

³¹Asarielebi Segemebi

³²Semidabi Hebebi

³³Hebe igini Selobehada ibu igini mbira nahe wandari dege aba hene. Ibu wane mini Malabi Noabi Hogolabi Miligabi Tirisabi uruni berene.

³⁴Hameigini waragaria uruninaga agali daosini dege pira duriani kira halu handari karia (52,700) bibahende hene.

³⁵Eberaimi hameigini ogodagua hene. Sudelabi Begebi Tahanabi hene.

³⁶Ani henego Sudela ibu Erana damene henerunaga mamali hene.

³⁷Hameigini uruni tinaga agali daosini dege pira tebirani kira halu handari duria (32,500) bibahende hene. Eberaimi hameigini Manase hameiginila libunaga mamali mbiraore Yosebe hene.

³⁸Beniyamini hameigini uru hene. Belabi Asabelebi Ahiramabi

³⁹Sebubamabi Hubamabi hene.

⁴⁰Ani howa Bela ibu Ada hameigini Namana hameiginila mamali hene.

⁴¹Hameigini duria uruni ti aria agali daosini dege pira mariani duria halu handari waragaria (45,600) bibahende hene.

⁴²Dana ibu hameigini mbiraore Husimi hangu hene.

⁴³Hameigini ogoni ibunaga agali daosini dege pira waragariani maria halu handari maria (64,400) bibahende hene.

⁴⁴Ase hameigini ogodagua hene. Iminabi Isibibi Beriabi hene.

⁴⁵Ani henego ai Beria ibu aguanene kira Hebela Malagielela hene.

⁴⁶Ase ibu wane mbira mini Sera berene.

⁴⁷Hameigini tebira uruni tinaga agali daosini dege pira duriani tebira halu handari maria (53,400) bibahende hene.

⁴⁸Nabadali aria ti hameigini ogodagua hene. Yaselebi Gunibi

⁴⁹Yasebi Silemebi hameigini maria uruni hene.

⁵⁰Ani henego tinaga agali bibahende dagalamaga halu daosini dege pira mariani duria halu handari maria (45,400) bibahende hene.

⁵¹Isaraele hameigini bibahende agali dege dagalamaga hai halu daosini dege handari waragariani mbira halu handari kariani pira tebira (601,730) bibahende hene.

⁵²Mani howa Anduane Homogohanda Mosesehondo lamialu lalu,

⁵³Ai Isaraeleali hameigini mbira mbira ti wali agali kago manda bialu dindi ti karulape holobadago manda bialu tu wa tahabe.

⁵⁴Dindi tu wa taholenaga pigane ái harabe hondole ala ege to̱le̱ wiaru emeneni mini gili buwa baraga halu dindi podene mbira mbira ngago wali agali dewaliore harago ti dindi timbuni tu wa mialu wali agali daga emene harago ti dindi emene tu wa migi bibe, lalu Anduane Homogohanda lene.

⁵⁷Libai ti hameigini tebira Gesonobi Kohadabi Meraribi uruni hene.

⁵⁸Gesonobi Kohadabi Meraribi tinaga aguanene hameigini emeneru ogodagua hene. Libinibi Heberonobi Malibi Musibi Korabi hene. Kohada ibu Amarama aba hene.

⁵⁹Amarama ibu wali mbira Libai wane Yogebede berenego dabu bini. Yogebede ibu Iyibi dindini hemingi howa taba henenego berene. Yogebedehanda igiri kira taba henenego mbirago Arono mendego Mosesela taba henene. Ani bialu ibugua wandari mbiraore hangu Miriama taba henene.

⁶⁰Mani Arono ibu wali dabu bialu ibu oneme igiri maria mini Nadababi Abihubi Eleasabi Idamabi taba henene.

⁶¹Nadaba Abihu libugua Anduane Homogohondo ira hagua ngabilo inisenesi lomabu delaga winidagua ndo delalu hebiria libu homene.

⁶²Libai hameigini igiri gali ege mbira bolangua henegoria howa agali damene bibahende dagalairi halu daosini dege pira kirani tebira (23,000) bibahende hene. Isaraele hameigini maru heba dagalamaga nahe Libai hameigini tini hangu dagalene. Anidagua binidagoni irane Isaraele hameigini maru biaruhondo dindi tu wa miyadagua ti dindi tu wa namiyagonaga ani bini.

⁶³Mosesebi Eleasabi Isaraele agali bibahendebi Yarigo tano abene uyurahayagi Iba Yodana ange dindi ulini tigabi Moaba dindi wiagoria howa libugua mini uruni gili bialu dagalene.

⁶⁴Abale pigane Mosese Aronolame dindi ko iba dalu naibaga Sainai dindi wiagoria howa Isaraele agali bibahende dagalai hene. Daga halu mende ogoni layangi agali Mosesehanda ala mini gili bini uruni aria mbira naheneore.