Dagalene 11:7-28

⁷Mena odagoni ira lini egene ale ambuabini pele emene mbira parahagabi wini.

⁸Mbiragaha balai anda bu heagoria ginu ti ibira haradagua menabi mandagi ibira ho wiaga wini.

⁹Egerebagi hayagola wali agali biarume ilumu buwa budabaga biaga alerume budubagabi ndoyagua nde ege to̱le̱me dambigi buwa balawa ale haealabagabu ngelaga. Ani bu ngelowa todobeneni dawawa mbisegedi ale ho wiaga. Nalu karia dende mberedi olibe lini ibane heba biamaga howa wabini nene mbau laga wini.

¹⁰Wali agali biarume tininaga balai anda harabani wabuni hagahaga bu howa gi̱ga̱ lalu gimigomo dewaore layuane Mosese ibu hale hene. Ani hale howa Mosesehanda Anduane Homogo ibugua tihondo keba hayago hondowa ibu genda timbuni ho hene.

¹¹Genda howa ibugua Anduane Homogohondo lalu, Í̠na i̱ mo genda haregoni irane aginaga berebe. I̱la turu nahe kegoni aginagabe. Wali agali o bu karunaga biabe bia holene ogoni í̠na i̱hondo abule ngiribe.

¹²Ti wabinibi hono winibi mbira i̱ ndoya hendedeni. Gali taba yaradagua dindi tinaga mamaliruhondo ngulebero lo winiyagoria pole ogoni agida.

¹³Wali agali o karu bibahende nelo mule nogo egaru mbira agohayagi tai buadabe. Lawanana bialu howa nogo egaru ngi laho wiaabo kagoni.

¹⁴Wali agali bibahende karunaga biabe biahalu handaya ho holene genda ho ko. Biabe ogoni i̱ hangume bulene gendabioredago nabibehe kogoni.

¹⁵Í̠na i̱hondo ogonidagua buleyagua genda timbuni o ngereru nahondoliya í̠na i̱ dara halu bo home lolene karulapeda, lene.

¹⁶Ani layagola Anduane Homogohanda Mosesehondo lalu, Agali pira karia (70) wali agalime galone bibehe mini lene kalo mandabiru dabowa i̱naga Balai Anda i̱ni íbu hagagoria mo ngoai howa í̠ kegoria mandagi halimu.

¹⁷I̱na ibuwa í̠ heba bi lalu i̱naga Dinini mugube ala í̠ha helaruru maru agali uruni tihondo muliya. Ani berogola gendabi ngaru maru agali uruni tigua í̠ biamogo bia haragola tí haru mandagi buleberami.

¹⁸Áyu wali agali lamialu nogo egaru mbira yawi noleberami. Ani nole howa Ngode Datagaliwabe deni tíni mo tiga bialu manda manda bayuwa bilimu lalu, lamibe. Tígua lawanana bialu lalu nogo egaru mbira nane kama. Iyibi dindini howa ina baya gibiore harima larimigo Anduane Homogo hale haya. Anduane Homogo i̱na yawi nogo egaru maru nalimulo ngulebero. Ani ngerogola tígua nogo egaru nguleberoru noleberami.

¹⁹Noleberamidagoni bame horo mbiru kiru agima bidaru piru agimabi ndo horo pira kira agimabi ndo dege.

²⁰Nalu kamine hangu ngui harigaha bidi bede lalu tagira pialu magu taguialu bilimulo ege mbira naho wiaabo halu holeberami. Anduane Homogo i̱na tí heba mandagi ogoria henego tígua wara a̱i̱ halu gimigomo lalu howa lalu Iyibi dindiore yu wahabe nahego yu waharima larimigonaga ani bulebero laya lamibe, lene.

²¹Mosesehanda Anduane Homogohondo lalu, Wali agali o haru kogo daosini hangu handari waragariadago (600,000) i̱na nogo egaru ege mbira no karulapelo ngule larigo wali agali o karubigo nelo agiha ngaria muleberebe, lalu hale hene.

²²Wali agali bibahendeme nai helo nogo bulumaga sibibi bibahende bai harimayagua no karulo polobadabe. Iba solowaraha wena bedaru bibahende bayaguabi ti ogoni no karulo polobadabe, lene.

²³Anduane Homogohanda ladai bialu lalu, I̱ hongo nakarulape kalo mitangi bu kebe. I̱na larudaguaore abale buleberogo í̠ hondolebere, lene.

²⁴Anduane Homogohanda layadagua Mosese ibu tagira puwa ibugua wali agali hearuhondo lamini. Ani lamialu ibugua agali haru hagane pira karia (70) biaruni haru puwa Balai Anda biagoha ho mabu bu helene.

²⁵Ani bu heagola Anduane Homogo beralibaha daluwa Mosesehondo bi lene. Ibugua Dinininaga mugube Moseseha heleneyaru maru yamuwa haru haga pira karia (70) biaruhondo mini. Dinininaga mugube agali biaruha íbu heagola tigua Anduane Homogonaga mana latagi hagarume ga̱ lalu bi lagadagua lenegoyu ti emene tigi mbira dege ani lene.

²⁶Agali pira karia (70) dabayaru aria kirali Eledada Medadala libu Balai Anda biagoha nape libuni balai andaha bereria libuhabi Anduane Homogo Dinininaga mugube ibini. Libuha ibiyagola libuguabi Anduane Homogonaga mana latagi haga agalirume ga̱ lalu bi lagadagua dege lalu lene.

²⁷Ani layagola igiri mbirame Mosese hearia puwa Eledada Medadalame ogobi bialu ka lalu lamini.

²⁸Ani layago hale howa Nunu igini Yosua ibu Mosese biamogo biaga heago ibugua Mosesehondo lalu, Haru haga-o libu wahadaba larene, lene.