Buk Song 94:4-23

⁴Hamas taim i stap yet bilong ol man nogut i ken bikhet na amamas long pasin nogut ol i bin mekim?

⁵Bikpela, ol i save daunim ol manmeri bilong yu na givim bikpela hevi long ol.

⁶Ol i save kilim i dai ol meri, man bilong ol i dai pinis, na ol pikinini, papa bilong ol i dai pinis, na ol manmeri bilong narapela hap i stap long graun bilong mipela.

⁷Na ol i tok olsem, “Bikpela i no save lukim mipela. God bilong Israel i no wari long samting mipela i mekim.”

⁸Yupela manmeri bilong mi, olsem wanem na yupela i mekim kranki pasin olsem? Yupela ol longlong lain, wanem taim bai yupela i gat save?

⁹God i bin wokim yau bilong yumi. Olsem na ating em i no inap harim, a? Na God i bin wokim ai bilong yumi. Orait ating em yet i no inap lukluk, a?

¹⁰Em i save bosim ol lain manmeri. Orait ating em i no ken stretim ol, a? Na em i tisa bilong olgeta manmeri. Ating em i no gat save, a?

¹¹Bikpela i save pinis long tingting bilong olgeta manmeri. Em i save, olgeta samting ol i tingting long mekim, ol bai i no inap kamap.

¹²Bikpela, sapos yu skulim wanpela man long lo bilong yu, dispela man i ken amamas.

¹³Yu save mekim olsem bilong givim malolo long em, bai ol hevi i no ken painim em, inap ol man nogut i dai na i go long matmat.

¹⁴Long wanem, Bikpela i no inap lusim ol manmeri bilong en. Tru tumas, em i no inap givim baksait long ol manmeri bilong en.

¹⁵Na bihain ol man i mekim kot, bai ol i mekim i go stret tasol, na bai ol stretpela man i orait long en.

¹⁶Husat i bin helpim mi na i daunim ol man nogut? Husat i helpim mi na i sakim ol man i save mekim rong?

¹⁷Sapos God i no bin helpim mi, ating kwiktaim bai mi slip pinis long matmat.

¹⁸Mi tingting olsem, “Lek bilong mi i wel. Bai mi pundaun nau.” Tasol nogat. Bikpela, yu sori tumas long mi na yu holim mi na mi no pundaun long sin.

¹⁹Na taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.

²⁰Yu no save wok wantaim ol hetman nogut. Ol dispela man i save putim lo i tok orait long ol manmeri i mekim pasin nogut.

²¹Ol i save bung na pasim tok bilong bagarapim gutpela man, na ol i save kotim ol man i no bin mekim rong, bilong ol i ken kilim ol i dai.

²²Tasol Bikpela i strong tumas long helpim mi. God bilong mi i save lukautim mi gut.

²³Ol i bin mekim planti pasin nogut, olsem na bai em i bekim rong bilong ol. Em i tingim sin bilong ol na bai em i kilim ol i dai. Em nau, God, Bikpela bilong yumi, bai i bagarapim ol olgeta.