Buk Song 92:6-15

⁶Ol man i no gat tingting na ol longlong man, ol i no inap save long ol dispela samting hia.

⁷Ol man nogut i ken kamap gutpela olsem gras, na ol man i save mekim pasin nogut, ol i ken kisim planti samting, na ol i ken i stap gut, tasol bai yu bagarapim ol olgeta.

⁸Long wanem, Bikpela, yu yet yu stap king oltaim oltaim.

⁹Mipela i save, ol man i birua long yu bai ol i dai, na bai yu daunim ol man i save mekim samting nogut.

¹⁰Yu bin givim bikpela strong long mi, olsem strong bilong wel bulmakau man. Yu mekim gut long mi na mi amamas tru.

¹¹Mi lukim pinis ol birua bilong mi i bagarap, na mi harim krai bilong ol man nogut.

¹²Ol stretpela manmeri bai i kamap gutpela tru olsem diwai i karim gutpela kaikai, na i kamap bikpela olsem ol diwai sida bilong Lebanon.

¹³Ol i olsem ol diwai ol i planim pinis long haus bilong Bikpela. Ol i save kamap gutpela tru insait long haus bilong God bilong yumi.

¹⁴Taim ol i olpela pinis, ol i save karim kaikai yet. Ol i stap strong, na ol i no save drai. Lip bilong ol i stap grin oltaim.

¹⁵Long dispela pasin ol i soim ol manmeri olsem, Bikpela em i stretpela olgeta. Em i save strong long helpim mi, na i no gat rong long em. Nogat tru.